ജൂനിയര്‍ വീരപ്പന്‍? 20കാരന്‍ പ്രശാന്ത് 2 ആനകളെ കൊന്ന് കൊമ്പെടുത്തു!

ബെംഗളൂരു: 20 വയസ്സേ പ്രായമുള്ളൂ പ്രശാന്തിന്. പി യു സി ഒന്നാം വര്‍ഷം പഠനം നിര്‍ത്തിയതാണ്. എന്താണ് പ്രശാന്തിന്റെ ഹോബി എന്നറിയാമോ. ആനകളെ കൊല്ലുക, കൊമ്പെടുക്കുക. ഇത് കേട്ട് പ്രശാന്ത് വീരപ്പന് പഠിക്കുകയാണോ എന്ന് ആരെങ്കിലും അത്ഭുതപ്പെട്ടാലും തെറ്റ് പറയാനില്ല. ഇതിനോടകം രണ്ട് ആനകളെ കൊന്ന് പ്രശാന്ത് കൊമ്പുകള്‍ മോഷ്ടിച്ചുകഴിഞ്ഞു.

തമിഴ്‌നാട് അതിര്‍ത്തിയിലുള്ള കര്‍ണാടക ഗ്രാമമായ കാടുസിവനഹളളി സ്വദേശിയാണ് പ്രശാന്ത്. കനകപുര ഫോറസ്റ്റ് ഡിവിഷന് സമീപത്താണ് ഈ സ്ഥലം. രണ്ട് ആനകളെ താന്‍ കൊന്നതായി പ്രശാന്ത് പോലീസിനോട് സമ്മതിച്ചുകഴിഞ്ഞു. ഒരു ആനയുടെ കൊമ്പ് മാത്രമേ താന്‍ എടുത്തിട്ടുള്ളൂ എന്നാണ് പ്രശാന്ത് പറയുന്നത്. എന്നാല്‍ പോലീസ് ഇത് വിശ്വസിച്ചിട്ടില്ല.

വീരപ്പനെ പോലെ തന്നെ വെടിവെച്ചാണ് പ്രശാന്തും ആനകളെ കൊല്ലുന്നത്. ഇടത്തരം കര്‍ഷക കുടുംബമാണ് പ്രശാന്തിന്റേത്. വീരപ്പന്റെ കഥയും ഇങ്ങനെ തന്നെ. തമിഴ്‌നാട് - കര്‍ണാടക അതിര്‍ത്തി പ്രദേശത്തെ കാടുകളായിരുന്നു വീരപ്പന്റെയും വിഹാരരംഗം. സ്‌കൂളില്‍ നിന്നും പുറത്തായ ശേഷം ചില്ലറ തട്ടിപ്പുകളിലൂടെ പ്രശാന്ത് റൈഫിള്‍ വാങ്ങാനുള്ള പണമുണ്ടാക്കി എന്നാണ് പോലീസ് കരുതുന്നത്. ഇയാള്‍ക്ക് വലിയൊരു സംഘത്തിന്റെ പിന്തുണയുളളതായും സംശയമുണ്ട്.

പ്രശാന്തിന്റെ സ്വദേശമായ കാടുസിവനഹള്ളി സ്വദേശിയായ മുനിനഞ്ച എന്നയാളെ ആനക്കൊമ്പുകള്‍ വില്‍ക്കാനുള്ള ശ്രമത്തിനിടെ പോലീസ് പിടിച്ചതോടെയാണ് ഈ സംഭവങ്ങളെല്ലാം പുറത്തായത്. ചോദ്യം ചെയ്യലിനിടെ പ്രശാന്താണ് ആനയെ കൊന്നത് എന്ന കാര്യം മുനിനഞ്ച വെളിപ്പെടുത്തി. പ്രശാന്തും ഇക്കാര്യം സമ്മതിക്കുകയും ആനകളെ കൊല്ലാനുപയോഗിച്ച തോക്ക് പോലീസിന് നല്‍കുകയും ചെയ്തു.

English summary

20-year-old kills two elephants for tusks in Karnataka, arrested.