ജയലളിതയുടെ നിര്യാണത്തോടെ മരിച്ചത് 280 പേരെന്ന് എഐഎഡിഎംകെ, അമ്മയെ ദൈവമായി കാണുന്നവര്‍ക്ക് സംഭവിച്ചത്

പാര്‍ട്ടി ആസ്ഥാനമാണ് ജയലളിതയുടെ മരണത്തെ തുടര്‍ന്ന് മരിച്ച 280 പേരുടെ വിവരങ്ങള്‍ പുറത്തുവിട്ടത്

By Sandra

Updated: Saturday, December 10, 2016, 17:23 [IST]

ചെന്നൈ: തമിഴ്‌നാട് മുഖ്യമന്ത്രിയായിയിരുന്ന ജയലളിതയുടെ രോഗത്തിലും മരണത്തിലുമുള്ള ഞെട്ടലിനെ തുടര്‍ന്ന് മരിച്ചവരുടെ എണ്ണം 280 ആയി. നേരത്തെ 203 പേര്‍ മരിച്ചതായി എഐഎഡിഎംകെ പുറത്തിറക്കിയ വാര്‍ത്താക്കുറിപ്പില്‍ അറിയിച്ചിരുന്നു.

പാര്‍ട്ടി ആസ്ഥാനമാണ് ജയലളിതയുടെ മരണത്തെ തുടര്‍ന്ന് മരിച്ച 280 പേരുടെ വിവരങ്ങള്‍ പുറത്തുവിട്ടത്. ചെന്നൈ, വെല്ലൂര്‍, കടലൂര്‍, കൃഷ്ണഗിരി, ഇറോഡ്, തിരുപ്പൂര്‍ ജില്ലകളിലായി 280 പേരാണ് ഇതിനകം മരണമടഞ്ഞത്. മരണപ്പട്ടവര്‍ക്ക് അനുശോചനം രേഖപ്പെടുത്തിയ പാര്‍ട്ടി മരിച്ചവരുടെ കുടുംബത്തിന് മൂന്ന് ലക്ഷം രൂപ നഷ്ടപരിഹാരമായി പ്രഖ്യാപിച്ചു. നേരത്തെ 77 പേര്‍ മരിച്ചുവെന്നാണ് എഐഎഡിഎംകെ വ്യക്തമാക്കിയിരുന്നത്.

സെപ്തംബര്‍ 22നാണ് പനിയും നിര്‍ജലീകരണവും അനുഭവപ്പെട്ടതിനെ തുടര്‍ന്ന് ചെന്നൈയിലെ അപ്പോളോ ആശുപത്രിയില്‍ പ്രവേശിപ്പിച്ചത്. 75 ദിവസത്തെ ആശുപത്രി വാസത്തിന് ശേഷം ഡിസംബര്‍ അഞ്ചിനാണ് മരണമടയുന്നത്. ഡിസംബര്‍ നാലിനുണ്ടായ ഹൃദയാഘാതത്തെ തുടര്‍ന്ന് അതീവ ഗുരുതരാവസ്ഥയിലായതോടെ ദില്ലി എയിംസിലെയും ലണ്ടനില്‍ നിന്നുള്ള ഡോ. റിച്ചാര്‍ഡ് ബെയ്‌ലിന്റെ നിര്‍ദേശത്തിലുള്ള ചികിത്സ ലഭ്യമാക്കിയെങ്കിലും ജീവന്‍ രക്ഷിക്കാന്‍ കഴിഞ്ഞിരുന്നില്ല.