പണക്കാരുടെ പട്ടികയിലേക്ക് കയറാൻ കേരളത്തിന് ഇനി വെറും 26 ഡോളർ മാത്രം! ഒന്നാമത് ഈ സംസ്ഥാനം

ഇന്ത്യയെന്ന രാജ്യം മൊത്തത്തിൽ സാമ്പത്തികമായി വലിയ മുന്നേറ്റം നടത്തുന്നുണ്ടെങ്കിലും, രാജ്യത്തെ വിവിധ സംസ്ഥാനങ്ങൾ തമ്മിൽ ജീവിതനിലവാരത്തിലും വരുമാനത്തിലും വലിയ വ്യത്യാസങ്ങളുണ്ടെന്ന് വ്യക്തമാക്കുന്ന പുതിയ റിപ്പോർട്ട് പുറത്തുവന്നു. ലോകബാങ്കിന്റെ പ്രതിശീർഷ വരുമാന കണക്കുകൾ പ്രകാരം ഇന്ത്യയിലെ അഞ്ച് സംസ്ഥാനങ്ങളും കേന്ദ്രഭരണ പ്രദേശങ്ങളും 'അപ്പർ മിഡിൽ ഇൻകം' അഥവാ ഉയർന്ന മധ്യവർഗ്ഗ വരുമാനമുള്ള പ്രദേശങ്ങളുടെ പട്ടികയിലേക്ക് ഉയർന്നിരിക്കുകയാണ്. ഇന്ത്യ മൊത്തത്തിൽ ഇപ്പോഴും 'ലോവർ മിഡിൽ ഇൻകം' വിഭാഗത്തിലാണ് ഉള്ളതെങ്കിലും ചില സംസ്ഥാനങ്ങളുടെ സാമ്പത്തിക വളർച്ച ലോകത്തിലെ വികസിത നഗരങ്ങളോട് കിടപിടിക്കുന്നതാണെന്ന് റിപ്പോർട്ട് വ്യക്തമാക്കുന്നു.

ലോകബാങ്കിന്റെ മാനദണ്ഡപ്രകാരം ഒരു രാജ്യം അല്ലെങ്കിൽ പ്രദേശം അപ്പർ മിഡിൽ ഇൻകം വിഭാഗത്തിൽ എത്തണമെങ്കിൽ അവിടുത്തെ ശരാശരി പ്രതിശീർഷ വരുമാനം 4,636 ഡോളറിന് മുകളിലായിരിക്കണം. ഇന്ത്യയുടെ ആകെ ശരാശരി വരുമാനം നിലവിൽ 2,760 ഡോളർ മാത്രമാണ്. എന്നാൽ ഇന്ത്യയിലെ അഞ്ച് പ്രധാന പ്രദേശങ്ങൾ ഈ പരിധി വളരെ എളുപ്പത്തിൽ മറികടന്നു.

വരുമാനത്തിൽ മുന്നിലുള്ള സംസ്ഥാനങ്ങൾ

ഈ പട്ടികയിൽ ഏറ്റവും മുന്നിൽ നിൽക്കുന്നത് രാജ്യതലസ്ഥാനമായ ഡൽഹിയാണ്. 6,217 ഡോളറാണ് ഡൽഹിയിലെ പ്രതിശീർഷ വരുമാനം. ഇത് ദക്ഷിണാഫ്രിക്ക, ഫിജി, മംഗോളിയ തുടങ്ങിയ രാജ്യങ്ങളിലെ ജനങ്ങളുടെ ജീവിതനിലവാരത്തിന് തുല്യമാണ്. ഡൽഹിക്ക് തൊട്ടുപിന്നാലെ ദക്ഷിണേന്ത്യൻ സംസ്ഥാനങ്ങളായ കർണാടകയും (5,579 ഡോളർ) തെലങ്കാനയും (5,407 ഡോളർ) ഇടംപിടിച്ചു. തമിഴ്‌നാടാണ് 5,329 ഡോളറുമായി നാലാം സ്ഥാനത്ത്. ഈ മൂന്ന് ദക്ഷിണേന്ത്യൻ സംസ്ഥാനങ്ങളിലെയും ജനങ്ങളുടെ ശരാശരി വരുമാനം വിയറ്റ്നാം, ഇന്തോനേഷ്യ തുടങ്ങിയ രാജ്യങ്ങളേക്കാൾ വളരെ മുന്നിലാണ്. ഗുജറാത്താണ് (4,734 ഡോളർ) ലോകബാങ്കിന്റെ ഈ ഉയർന്ന യോഗ്യത മറികടന്ന അഞ്ചാമത്തെ സംസ്ഥാനം. മഹാരാഷ്ട്രയ്ക്ക് വെറും 8 ഡോളറിന്റെ കുറവിലാണ് (4,628 ഡോളർ) ഈ പദവി നഷ്ടമായത്. ഹരിയാനയ്ക്ക് 9 ഡോളറിന്റെ കുറവും രേഖപ്പെടുത്തി.

നേട്ടത്തിന്റെ തൊട്ടരികിൽ കേരളം!

സാമൂഹിക പുരോഗതിയിലും ജീവിതനിലവാരത്തിലും എപ്പോഴും മുൻപന്തിയിൽ നിൽക്കുന്ന കേരളം ഈ ചരിത്രനേട്ടത്തിന്റെ തൊട്ടരികിലാണ്. ലോകബാങ്കിന്റെ ഉയർന്ന വരുമാനക്കാരുടെ പട്ടികയിലേക്ക് കടക്കാൻ കേരളത്തിന് ഇനി വെറും 26 ഡോളറിന്റെ കുറവ് മാത്രമാണുള്ളത്. നിലവിലെ വളർച്ചാനിരക്ക് പ്രകാരം അടുത്ത സാമ്പത്തിക വർഷത്തിന്റെ തുടക്കത്തിൽ തന്നെ കേരളം ഈ സുപ്രധാന നാഴികക്കല്ല് പിന്നിടുമെന്നാണ് സാമ്പത്തിക വിദഗ്ദ്ധർ വിലയിരുത്തുന്നത്. പ്രവാസികളിൽ നിന്നുള്ള വരുമാനവും മികച്ച വിദ്യാഭ്യാസ-ആരോഗ്യ മേഖലകളും കേരളത്തിലെ ജനങ്ങളുടെ ശരാശരി ജീവിതനിലവാരം രാജ്യത്തെ മറ്റ് വലിയ സംസ്ഥാനങ്ങളേക്കാൾ ഉയർന്ന നിലയിൽ നിലനിർത്താൻ സഹായിക്കുന്നുണ്ട്.

വർദ്ധിച്ചുവരുന്ന സാമ്പത്തിക അസമത്വം

ഈ റിപ്പോർട്ട് ഇന്ത്യയിലെ സംസ്ഥാനങ്ങൾ തമ്മിലുള്ള വലിയ സാമ്പത്തിക അസമത്വവും തുറന്നുകാട്ടുന്നുണ്ട്. വികസിത സംസ്ഥാനങ്ങൾ അതിവേഗം മുന്നേറുമ്പോൾ ഉത്തരേന്ത്യൻ സംസ്ഥാനങ്ങൾ ഇപ്പോഴും വളരെ പിന്നിലാണ്. വലിയ സംസ്ഥാനങ്ങളിൽ ഏറ്റവും കുറഞ്ഞ പ്രതിശീർഷ വരുമാനമുള്ളത് ബീഹാറിലാണ്, വെറും 984 ഡോളർ മാത്രമാണ് ഇവിടുത്തെ കണക്ക്. ഉത്തർപ്രദേശ് (1,403 ഡോളർ), ജാർഖണ്ഡ് (1,470 ഡോളർ) എന്നിവയാണ് തൊട്ടുപിന്നിൽ. ഏറ്റവും ഉയർന്ന വരുമാനമുള്ള ഡൽഹിയും ഏറ്റവും പിന്നിലുള്ള ബീഹാറും തമ്മിലുള്ള വ്യത്യാസം ഏതാണ്ട് ആറ് മടങ്ങോളമാണ്. സംസ്ഥാനങ്ങൾ തമ്മിലുള്ള ഈ വരുമാന വ്യത്യാസം അളക്കുന്ന 'ഗിനി കോഫിഫിഷ്യന്റ്' 1994-95 കാലഘട്ടത്തിൽ 0.230 ആയിരുന്നത് 2025-26 ആയപ്പോഴേക്കും 0.261 ആയി വർദ്ധിച്ചു. അതായത് രാജ്യത്തിന്റെ സാമ്പത്തിക പുരോഗതിയുടെ ഗുണങ്ങൾ എല്ലാ സംസ്ഥാനങ്ങളിലേക്കും ഒരേപോലെയല്ല എത്തുന്നതെന്ന് ഈ കണക്കുകൾ തെളിയിക്കുന്നു.