എട്ടുവയസുള്ള കാശ്മീരി പെണ്കുട്ടിക്ക് ലോക കിക്ക്ബോക്സിങ്ങില് സ്വര്ണം
അമേരിക്കക്കാരിയായ എതിരാളിയെ കീഴ്പ്പെടുത്തിയാണ് സബ്ജൂനിയര് ലെവല് സ്വര്ണമെഡല് തജാമുള് കഴുത്തിലണിഞ്ഞത്.
ശ്രീനഗര്: കാശ്മീരില് നിന്നും സംഘര്ഷത്തിന്റെയും വെടിയൊച്ചകളുടെയും വാര്ത്തകള് മാത്രം പുറത്തുവന്നുകൊണ്ടിരിക്കെ ഒരു എട്ടു വയസുകാരി രാജ്യത്തിന്റെയും സംസ്ഥാനത്തിന്റെയും അഭിമാനമായി മാറിയിരിക്കുകയാണ്. ഇറ്റലിയില് നടന്ന ലോക കിക്ക്ബോക്സിങ്ങില് സ്വര്ണം നേടി തജാമുള് ഇസ്ലാം എന്ന പെണ്കുട്ടിയാണ് താഴ്വരയുടെ താരമായി മാറിയിരിക്കുന്നത്.
മുസ്ലീം പെണ്കുട്ടികള്ക്ക് സ്കൂള് പഠനം പോലും നിഷേധിക്കുന്ന തീവ്രവാദ സംഘടനകള് നിറഞ്ഞു നില്ക്കുന്ന സ്ഥലത്തുനിന്നുമാണ് തജാമുള് ലോകത്തിന്റെ നെറുകയില് എത്തിനില്ക്കുന്നത് എന്നത് പെണ്കുട്ടിയെ നേട്ടത്തിന്റെ മാറ്റുകൂട്ടുന്നു. അമേരിക്കക്കാരിയായ എതിരാളിയെ കീഴ്പ്പെടുത്തിയാണ് സബ്ജൂനിയര് ലെവല് സ്വര്ണമെഡല് തജാമുള് കഴുത്തിലണിഞ്ഞത്.
അന്താരാഷ്ട്ര തലത്തില് കിക്ക് ബോക്സിങ്ങില് സ്വര്ണം നേടുന്ന ഏറ്റവും പ്രായക്കുറവുള്ള പെണ്കുട്ടിയാണ് തജാമുള് എന്ന് കോച്ച് ഫസില് അലി പറയുന്നു. പെണ്കുട്ടി സ്വര്ണം നേടിയ വാര്ത്ത പുറത്തുവന്നയുടനെ കശ്മീര് മുന് മുഖ്യമന്ത്രി ഒമര് അബ്ദുള്ള പെണ്കുട്ടിക്ക് അഭിനന്ദനം അറിയിച്ച് ട്വീറ്റ് ചെയ്തു.
യുകെജി കഴിഞ്ഞയുടനാണ് പെണ്കുട്ടി തന്റെയടുക്കല് കിക്ക്ബോക്സിങ് പഠിക്കാനെത്തിയതെന്ന് അലി പറയുന്നു. പെണ്കുട്ടിയുടെ അസാധാരണ കഴിവ് മനസിലാക്കിയ അലി കുട്ടിക്ക് മികച്ച രീതിയിലുള്ള പരിശീലനം നല്കുകയും ചെയ്തു. 2015ല് സബ്ജൂനിയര് തലത്തില് ദേശീയ ചാമ്പ്യനായിരുന്നു തജാമുള്. വളരെ ചെറിയ സൗകര്യങ്ങള് മാത്രമുണ്ടായിട്ടും ലോക മികവിനൊപ്പം ഉയരാന് കഴിഞ്ഞതില് അഭിമാനമുണ്ടെന്ന് അലി പറഞ്ഞു.