എട്ടാം ശമ്പള കമ്മീഷൻ; ഇങ്ങനെ കണക്കാക്കിയാൽ അടിസ്ഥാന ശമ്പളം 46,260രൂപ..ഫോർമുല എന്താകും?

എട്ടാം ശമ്പള കമ്മീഷൻ ശുപാർശകൾക്കായി പ്രതീക്ഷയോടെ കാത്തിരിക്കുകയാണ് ലക്ഷക്കണക്കിന് വരുന്ന കേന്ദ്രസർക്കാർ ജീവനക്കാർ. റിപ്പോർട്ട് സമർപ്പിക്കാൻ 18 മാസത്തെ സമയമാണ് കമ്മീഷന് അനുവദിച്ചിട്ടുള്ളത്. 2027 മധ്യത്തോടെ (ഏകദേശം ഏപ്രിൽ-മെയ്) ശുപാർശകൾ ഉണ്ടായേക്കുമെന്നാണ് പ്രതീക്ഷിക്കപ്പെടുന്നത്.

നിലവിലെ ശമ്പള ഘടന നിശ്ചയിച്ച ഏഴാം ശമ്പള കമ്മീഷൻ 2025 ഡിസംബർ അവസാനത്തോടെ കാലാവധി പൂർത്തിയാക്കിയിരുന്നു. മുൻകാല രീതികൾ അനുസരിച്ച്, പുതിയ ശമ്പള സ്കെയിലുകൾ 2026 ജനുവരി 1 മുതൽ പ്രാബല്യത്തിൽ വരുമെന്ന് സർക്കാരും ജീവനക്കാരുടെ യൂണിയനുകളും പ്രതീക്ഷിക്കുന്നുണ്ട്..അതായത്, 2027-ലോ ഒരുപക്ഷേ 2028-ലോ ശുപാർശകൾ സർക്കാർ അംഗീകരിച്ചാൽ, കേന്ദ്ര സർക്കാർ ജീവനക്കാർക്കും പെൻഷൻകാർക്കും 2026 ജനുവരി 1 മുതൽ മുൻകാല പ്രാബല്യത്തോടെ പുതുക്കിയ ശമ്പളവും പെൻഷനും ലഭിക്കുമെന്ന് സാരം.

ശമ്പളത്തിലും പെൻഷനുകളിലും എത്ര വർധനവ് ഉണ്ടാകുമെന്ന കാര്യം ഇതുവരെ വ്യക്തമല്ല. ഫിറ്റ്മെൻ്റ് ഫാക്ടർ അടിസ്ഥാനപ്പെടുത്തിയാകും പുതിയ ശമ്പളം നിശ്ചയിക്കുക. ഏഴാം ശമ്പള കമ്മീഷൻ അനുസരിച്ച്, കേന്ദ്ര സർക്കാർ ജീവനക്കാരുടെ ഏറ്റവും കുറഞ്ഞ അടിസ്ഥാന ശമ്പളം 7,000 രൂപയിൽ നിന്ന് 18,000 ആയി ഉയർത്തിയിരുന്നു. 2.57 എന്ന ഫിറ്റ്മെൻ്റ് ഘടകമാണ് ഇതിനായി നിശ്ചയിച്ചത്. ഇത് ഏകദേശം 157 ശതമാനത്തിന്റെ വലിയൊരു വർദ്ധനവായി രേഖാമൂലം കണക്കാക്കപ്പെട്ടെങ്കിലും, യഥാർത്ഥ ശമ്പളത്തിലെ വർദ്ധനവ് 14 ശതമാനം മാത്രമായിരുന്നു. നിലവിലെ ജീവിതച്ചെലവ് ക്രമീകരിക്കുന്നതിന്, ഏഴാം ശമ്പള കമ്മീഷൻ അന്നത്തെ ക്ഷാമബത്ത (ഡിയർനസ് അലവൻസ്) അടിസ്ഥാന ശമ്പളവുമായി ലയിപ്പിച്ചു. 2016 ജനുവരി 1-ലെ കണക്കനുസരിച്ച് ആറാം ശമ്പള കമ്മീഷൻ പ്രകാരം ക്ഷാമബത്ത അടിസ്ഥാന ശമ്പളത്തിന്റെ 125% ആയിരുന്നു. പുതിയ ശമ്പള ഘടന തയ്യാറാക്കുമ്പോൾ കമ്മീഷൻ ഈ നിലവാരമാണ് പരിഗണിച്ചത്.

നിലവിൽ 20,000 അടിസ്ഥാന ശമ്പളമുള്ള ഒരാൾക്ക്, ഫിറ്റ്മെൻ്റ് ഫാക്ടർ 2.8 ആണെങ്കിൽ പുതിയ അടിസ്ഥാന ശമ്പളം 56,000 (20,000 × 2.8) ആയിരിക്കും. യൂണിയനുകൾ 3.0 അല്ലെങ്കിൽ 3.25 വരെ ഫിറ്റ്മെൻ്റ് ഫാക്ടർ ആണ് ആവശ്യപ്പെടുന്നത്. ഫാക്ടർ 3.0 ആയാൽ, കുറഞ്ഞ അടിസ്ഥാന ശമ്പളം 18,000-ൽ നിന്ന് ഏകദേശം 54,000 ആയി ഉയരും, .വിദഗ്ദ്ധരും റിപ്പോർട്ടുകളും സൂചിപ്പിക്കുന്നത് ഫിറ്റ്മെൻ്റ് ഫാക്ടർ 2.6-നും 2.85-നും ഇടയിലായിരിക്കുമെന്നാണ് (യാഥാസ്ഥിതികമായി 2.28 വരെ). ക്ഷാമബത്ത ലയിച്ചാലും 25-35% ഫലപ്രദമായ വർദ്ധനവ് ഇത് നൽകും. ഇനി 2.57 തന്നെയാണ് ഫിറ്റ്മെൻ്റ് ഫാക്ടറെങ്കിൽ കുറഞ്ഞ അടിസ്ഥാന ശമ്പളം 46,260 രൂപയായിരിക്കും. എന്തായാലും അന്തിമ തീരുമാനമറിയാൻ കാത്തിരുന്നേ മതിയാകൂ.