പെൻഷനുകാർക്ക് വൻ ആശ്വാസം! 5 പ്രധാന ആവശ്യങ്ങളിൽ ഉറപ്പുമായി സർക്കാർ; എട്ടാം ശമ്പള കമ്മീഷനിൽ വലിയ മാറ്റം

കേന്ദ്ര സർക്കാർ ജീവനക്കാരുടെയും പെൻഷനുകാരുടെയും ദീർഘകാല ആവശ്യങ്ങൾ പരിഗണിക്കുന്ന എട്ടാം ശമ്പള കമ്മീഷൻ (8th Pay Commission) ചർച്ചകൾ നിർണായക ഘട്ടത്തിലേക്ക്. കഴിഞ്ഞയാഴ്ച ന്യൂഡൽഹിയിൽ വെച്ച് ക്യാബിനറ്റ് സെക്രട്ടറി ടി.വി. സോമനാഥന്റെ അധ്യക്ഷതയിൽ നടന്ന നാഷണൽ കൗൺസിൽ - ജോയിന്റ് കൺസൾട്ടേറ്റീവ് മെഷിനറി (NC-JCM) വാർഷിക യോഗത്തിലാണ് ലക്ഷക്കണക്കിന് പെൻഷനുകാർക്ക് നിർണ്ണായകമാകുന്ന 5 പ്രധാന ആവശ്യങ്ങൾ ചർച്ച ചെയ്തത്. പാർലമെന്ററി സ്റ്റാൻഡിങ് കമ്മിറ്റിയുടെ ശുപാർശകൾ ഉൾപ്പെടെയുള്ള പെൻഷൻ പരിഷ്കരണ ആവശ്യങ്ങൾ എട്ടാം ശമ്പള കമ്മീഷന്റെ പരിഗണനയ്ക്ക് വിടുമെന്ന് ക്യാബിനറ്റ് സെക്രട്ടറി ജീവനക്കാരുടെ സംഘടനകൾക്ക് ഉറപ്പ് നൽകിയിട്ടുണ്ട്.

യോഗത്തിൽ ഉയർന്ന പ്രധാന പെൻഷൻ വിഷയങ്ങൾ

1. ഓരോ 5 വർഷത്തിലും പെൻഷൻ വർദ്ധനവ്

നിലവിൽ ശമ്പള കമ്മീഷനുകൾ രൂപീകരിക്കുന്ന 10 വർഷത്തെ ഇടവേളകളിലാണ് പെൻഷൻ പരിഷ്കരണം നടക്കാറുള്ളത്. എന്നാൽ കുതിച്ചുയരുന്ന പണപ്പെരുപ്പത്തിന് ആനുപാതികമായി പെൻഷൻ തുക വർദ്ധിക്കാത്തത് പ്രായമായ പെൻഷനുകാരെ കടുത്ത സാമ്പത്തിക ബുദ്ധിമുട്ടിലാക്കുന്നുണ്ട്. അതിനാൽ ഓരോ 5 വർഷം കൂടുമ്പോഴും പെൻഷൻ തുക പരിഷ്കരിക്കണമെന്ന പാർലമെന്ററി സ്റ്റാൻഡിങ് കമ്മിറ്റിയുടെ നിർദ്ദേശം എട്ടാം ശമ്പള കമ്മീഷന്റെ പരിഗണനയ്ക്ക് സമർപ്പിക്കുമെന്ന് യോഗത്തിൽ ഉറപ്പ് ലഭിച്ചു.

2. ഫാമിലി പെൻഷൻ 30 ശതമാനമായി കുറയ്ക്കരുത്

സർക്കാർ ജീവനക്കാരനോ പെൻഷനുകാരനോ മരണപ്പെട്ടാൽ ആശ്രിതർക്ക് നൽകുന്ന ഫാമിലി പെൻഷൻ നിലവിൽ അവസാന ശമ്പളത്തിന്റെ 30 ശതമാനമായി കുറയ്ക്കുകയാണ് ചെയ്യുന്നത്. (പൂർണ്ണ പെൻഷൻ 50 ശതമാനമാണ്). ഈ തുക ആശ്രിതർക്ക് ജീവിക്കാൻ പര്യാപ്തമല്ലെന്ന് സംഘടനകൾ ചൂണ്ടിക്കാണിച്ചു. ഫാമിലി പെൻഷൻ തുക ഇത്തരത്തിൽ വെട്ടിക്കുറയ്ക്കരുതെന്ന ആവശ്യവും ശമ്പള കമ്മീഷന് വിടാൻ തീരുമാനമായിട്ടുണ്ട്.

3. ഭിന്നശേഷിക്കാരായ മക്കൾക്ക് വരുമാന സർട്ടിഫിക്കറ്റ് ഒഴിവാക്കുക

മരണപ്പെട്ട പെൻഷനുകാരുടെ ഭിന്നശേഷിക്കാരായ മക്കൾക്ക് ഫാമിലി പെൻഷൻ ലഭിക്കുന്നതിനായി മെഡിക്കൽ ബോർഡിൽ നിന്നോ സിവിൽ അധികാരികളിൽ നിന്നോ 'വരുമാന സർട്ടിഫിക്കറ്റ്' ഹാജരാക്കേണ്ടതുണ്ട്. പലപ്പോഴും ഇത്തരം സർട്ടിഫിക്കറ്റുകൾ സമയത്തിന് ലഭിക്കാത്തത് ഇവരെ ദുരിതത്തിലാക്കുന്നു. മാനുഷിക പരിഗണന നൽകി ഈ നിബന്ധന പൂർണ്ണമായി ഒഴിവാക്കണമെന്ന ആവശ്യത്തിൽ യുക്തിസഹവും പ്രായോഗികവുമായ തീരുമാനം എടുക്കാൻ പെൻഷൻ വകുപ്പിന് ക്യാബിനറ്റ് സെക്രട്ടറി നിർദ്ദേശം നൽകി.

4. ചില പ്രത്യേക ജീവനക്കാർക്ക് പഴയ പെൻഷൻ പദ്ധതി (OPS)

2003 ഡിസംബർ 22-ന് മുൻപ് വിജ്ഞാപനം ഇറങ്ങിയ ഒഴിവുകളിലേക്ക് അപേക്ഷിക്കുകയും എന്നാൽ ഈ തീയതിക്ക് ശേഷം മാത്രം ജോലിയിൽ പ്രവേശിക്കുകയും ചെയ്ത ജീവനക്കാരെ എൻപിഎസിന് (NPS) പകരം പഴയ പെൻഷൻ പദ്ധതിയുടെ (OPS) പരിധിയിൽ കൊണ്ടുവരണമെന്ന് യോഗത്തിൽ ശക്തമായ ആവശ്യമുയർന്നു. കാരുണ്യനിയമനത്തിലൂടെ ജോലി ലഭിച്ചവരിൽ, 2003 ഡിസംബർ 22-ന് മുൻപ് അപേക്ഷ സമർപ്പിച്ചവരെയും ഒപിഎസിൽ ഉൾപ്പെടുത്തണമെന്ന് സംഘടനകൾ ആവശ്യപ്പെട്ടു.

5. വിധവകളായ മരുമക്കൾക്കും ഫാമിലി പെൻഷൻ

പെൻഷൻ നിയമങ്ങളിലെ 'കുടുംബം' എന്ന നിർവ്വചനത്തിൽ മാറ്റം വരുത്തണമെന്നതാണ് അഞ്ചാമത്തെ പ്രധാന ആവശ്യം. മരണപ്പെട്ട ജീവനക്കാരനെ ആശ്രയിച്ച് കഴിഞ്ഞിരുന്ന വിധവകളായ മരുമക്കളെക്കൂടി ഫാമിലി പെൻഷന് അർഹരായവരുടെ പട്ടികയിൽ ഉൾപ്പെടുത്തണമെന്ന് സംഘടനകൾ ആവശ്യപ്പെട്ടു. ഈ വിഷയം നിയമ മന്ത്രാലയവുമായി ആലോചിച്ച് പരിശോധിക്കാൻ പേഴ്സണൽ മന്ത്രാലയത്തോട് ക്യാബിനറ്റ് സെക്രട്ടറി ആവശ്യപ്പെട്ടിട്ടുണ്ട്.

പെൻഷൻ മേഖലയിൽ വലിയ മാറ്റങ്ങൾക്ക് വഴിവെക്കാവുന്ന ഈ നിർദ്ദേശങ്ങൾ ലക്ഷക്കണക്കിന് വരുന്ന കേന്ദ്ര സർക്കാർ പെൻഷനുകാർക്ക് വലിയ പ്രതീക്ഷയാണ് നൽകുന്നത്. എട്ടാം ശമ്പള കമ്മീഷൻ തങ്ങളുടെ അന്തിമ റിപ്പോർട്ട് സമർപ്പിക്കുന്നതോടെ ഈ ആവശ്യങ്ങളിൽ ഔദ്യോഗിക തീരുമാനമുണ്ടാകും.