എട്ടാം ശമ്പള കമ്മീഷനിൽ വമ്പൻ ട്വിസ്റ്റ്! ഒരൊറ്റ മാറ്റത്തിലൂടെ ശമ്പളം ലക്ഷങ്ങൾ കടക്കും; ആർക്കൊക്കെ ലഭിക്കും?

കേന്ദ്ര സർക്കാർ ജീവനക്കാരുടെ എട്ടാം ശമ്പള കമ്മീഷൻ നടപ്പിലാക്കുന്നതുമായി ബന്ധപ്പെട്ട ചർച്ചകൾ സജീവമായി പുരോഗമിക്കുകയാണ്. ഇതിനിടയിൽ റെയിൽവേ ജീവനക്കാരുടെ ശമ്പള പരിഷ്കരണവുമായി ബന്ധപ്പെട്ട് അതീവ നിർണായകമായ ഒരു പുതിയ നിർദേശം സമർപ്പിക്കപ്പെട്ടിരിക്കുന്നു. ഇന്ത്യൻ റെയിൽവേ ടെക്നിക്കൽ സൂപ്പർവൈസേഴ്സ് അസോസിയേഷൻ (IRTSA) ആണ് ശമ്പള കമ്മീഷന് മുന്നിൽ വ്യത്യസ്തമായ ഒരു മാതൃക മുന്നോട്ടുവെച്ചിരിക്കുന്നത്.

സാധാരണയായി എല്ലാ ജീവനക്കാർക്കും ഒരൊറ്റ ഫിറ്റ്മെന്റ് ഫാക്ടർ (Fitment Factor) നിശ്ചയിക്കുന്ന രീതിക്ക് പകരം, ജീവനക്കാരുടെ തസ്തികയും പേ ലെവലും അനുസരിച്ച് 5 വ്യത്യസ്ത ഫിറ്റ്മെന്റ് ഫാക്ടറുകൾ അനുവദിക്കണമെന്നാണ് സംഘടനയുടെ പ്രധാന ആവശ്യം.

എന്താണ് IRTSA മുന്നോട്ടുവെക്കുന്ന നിർദേശം?

എല്ലാവർക്കും ഒരേ ഗുണനഘടകം നൽകുന്നതിന് പകരം താഴേത്തട്ടിലുള്ളവർ മുതൽ സീനിയർ ലെവലിലുള്ളവർ വരെയുള്ള ജീവനക്കാരുടെ ശമ്പള ഘടനയിൽ കൃത്യമായ സന്തുലിതാവസ്ഥ ഉറപ്പാക്കാൻ മൾട്ടിപ്പിൾ ഫിറ്റ്മെന്റ് ഫാക്ടറുകൾ സഹായിക്കുമെന്ന് അസോസിയേഷൻ വ്യക്തമാക്കുന്നു. 2.92 മുതൽ 4.38 വരെയുള്ള ഫിറ്റ്മെന്റ് ഫാക്ടറുകളാണ് ഇവർ ആവശ്യപ്പെട്ടിരിക്കുന്നത്.

നിർദേശിക്കപ്പെട്ടിരിക്കുന്ന ഫിറ്റ്മെന്റ് ഫാക്ടറുകൾ

ലെവൽ 1 - 5 വരെ: 2.92

ലെവൽ 6 - 8 വരെ: 3.50

ലെവൽ 9 - 12 വരെ: 3.80

ലെവൽ 13 - 16 വരെ: 4.09

ലെവൽ 17 - 18 വരെ: 4.38

ഏഴാം ശമ്പള കമ്മീഷനിൽ എല്ലാ ജീവനക്കാർക്കും പൊതുവായി 2.57 ആയിരുന്നു ഫിറ്റ്മെന്റ് ഫാക്ടർ നിശ്ചയിച്ചിരുന്നത്. അതായത് നിലവിലുള്ള അടിസ്ഥാന ശമ്പളത്തെ 2.57 കൊണ്ട് ഗുണിച്ചായിരുന്നു പുതിയ അടിസ്ഥാന ശമ്പളം കണക്കാക്കിയിരുന്നത്. എന്നാൽ പുതിയ നിർദേശം അംഗീകരിക്കപ്പെട്ടാൽ ശമ്പളത്തിൽ വൻ വർധനവുണ്ടാകും.

ടെക്നിക്കൽ സൂപ്പർവൈസർമാർക്ക് പുതിയ കേഡർ ഘടന
റെയിൽവേയിലെ സാങ്കേതിക വിഭാഗം ജീവനക്കാർക്കായി ഒഎൻജിസി പോലുള്ള പൊതുമേഖലാ സ്ഥാപനങ്ങൾക്ക് സമാനമായ അഞ്ച് ഗ്രേഡുകളുള്ള ശമ്പള ഘടന വേണമെന്നും IRTSA ആവശ്യപ്പെടുന്നുണ്ട്. സാങ്കേതിക ജീവനക്കാരുടെ ജോലിയിലെ റിസ്ക്, അധിക ജോലി സമയം, പ്രത്യേക സേവന വ്യവസ്ഥകൾ എന്നിവ പരിഗണിച്ച് ഇതര ജീവനക്കാരിൽ നിന്ന് വ്യത്യസ്തമായി ഉയർന്ന ശമ്പളം നിശ്ചയിക്കണമെന്നാണ് ആവശ്യം.

അസോസിയേഷൻ നിർദേശിക്കുന്ന പ്രാരംഭ ശമ്പള ഘടന

*ജൂനിയർ എഞ്ചിനീയർ (ലെവൽ-7): ₹1,57,400

*സീനിയർ സെക്ഷൻ എഞ്ചിനീയർ - ഗ്രേഡ് ബി (ലെവൽ-8): ₹1,66,800

*അസിസ്റ്റന്റ് മാനേജർ - ഗ്രേഡ് ബി (ലെവൽ-9): ₹2,01,600

*മാനേജർ - ഗ്രേഡ് ബി (ലെവൽ-10): ₹2,13,000

*സീനിയർ മാനേജർ - ഗ്രേഡ് എ (ലെവൽ-11): ₹2,57,000

ഇതിനുപുറമെ, ജീവനക്കാരുടെ കരിയർ വളർച്ചയ്ക്കായി മോഡിഫൈഡ് അഷ്വേർഡ് കരിയർ പ്രോഗ്രഷൻ (MACP) പ്രകാരം 30 വർഷത്തെ സർവീസിനിടയിൽ 5 തവണ സാമ്പത്തിക അപ്ഗ്രേഡേഷൻ നൽകണമെന്നും ആവശ്യപ്പെട്ടിട്ടുണ്ട്. (6, 12, 18, 24, 30 വർഷങ്ങളിൽ).

ശമ്പളം എങ്ങനെ മാറും?

പുതിയ ശമ്പള കാൽക്കുലേറ്റർ അനുസരിച്ച് ഈ ഫിറ്റ്മെന്റ് ഫാക്ടറുകൾ നടപ്പിലായാൽ ശമ്പളത്തിൽ വരാവുന്ന മാറ്റങ്ങൾ ഇങ്ങനെയാണ് (ഇത് ഏകദേശ കണക്കുകൾ മാത്രമാണ്).

ലെവൽ 1 മുതൽ 5 വരെയുള്ള ജീവനക്കാർ: നിലവിൽ അടിസ്ഥാന ശമ്പളം ₹20,000 ഉള്ള ഒരു ജീവനക്കാരന് 2.92 ഫിറ്റ്മെന്റ് ഫാക്ടർ ലഭിച്ചാൽ പരിഷ്കരിച്ച അടിസ്ഥാന ശമ്പളം ₹58,400 ആയി ഉയരും.

ലെവൽ 6 മുതൽ 8 വരെയുള്ള ജീവനക്കാർ: നിലവിലെ അടിസ്ഥാന ശമ്പളം ₹45,000 ആണെങ്കിൽ, 3.50 ഫിറ്റ്മെന്റ് ഫാക്ടർ പ്രകാരം പുതിയ ശമ്പളം ₹1,57,500 ആകും.

ലെവൽ 13 മുതൽ 16 വരെയുള്ള ജീവനക്കാർ: നിലവിൽ ₹1,20,000 അടിസ്ഥാന ശമ്പളമുള്ള ഉദ്യോഗസ്ഥർക്ക് 4.09 ഫിറ്റ്മെന്റ് ഫാക്ടർ വഴി അത് ₹4,90,800 രൂപയായി വർധിക്കും.

ലക്ഷക്കണക്കിന് വരുന്ന റെയിൽവേ ജീവനക്കാർക്ക് പുറമെ മറ്റ് കേന്ദ്ര സർക്കാർ ജീവനക്കാരും വലിയ പ്രതീക്ഷയോടെയാണ് എട്ടാം ശമ്പള കമ്മീഷന്റെ അന്തിമ തീരുമാനങ്ങൾക്കായി കാത്തിരിക്കുന്നത്. ഈ നിർദേശങ്ങൾ എട്ടാം ശമ്പള കമ്മീഷൻ എത്രത്തോളം പരിഗണിക്കുമെന്നാണ് ഇനി കേന്ദ്ര സർക്കാർ ജീവനക്കാർ ഉറ്റുനോക്കുന്നത്.