എആര്‍ റഹ്മാന്റെ വീടും സ്റ്റുഡിയോയും വെള്ളപ്പൊക്കത്തില്‍പ്പെട്ടു!!

ചെന്നൈ: കനിഹ, സിദ്ധാര്‍ത്ഥ് എന്നീ ചലച്ചിത്ര താരങ്ങള്‍ മാത്രമല്ല പ്രശസ്ത സംഗീത സംവിധായകന്‍ എആര്‍ റഹ്മാനും ചെന്നൈയിലെ വെള്ളപ്പൊക്കത്തില്‍ പെട്ടിരിക്കുകയാണ്. എആര്‍ റഹ്മാന്‍ ഫേസ്ബുക്കിലൂടെയാണ് ഇക്കാര്യം അറിയിച്ചത്. സംഗീത സ്റ്റുഡിയോയും വീടും വെള്ളപ്പൊക്കത്തില്‍ പെട്ടിരിക്കുകയാണെന്ന് റഹ്മാന്‍ പറയുന്നു.

ഓരോ പതിനഞ്ച് മിനിട്ട് കൂടുമ്പോഴും വീട്ടിനുള്ളിലെയും സ്റ്റുഡിയോയിനുള്ളിലെയും വെള്ളം പമ്പ് ചെയ്ത് പുറത്തു കളയുകയാണ് ചെയ്യുന്നതെന്ന് അദ്ദേഹം പറയുന്നു. വല്ലാത്തൊരു അവസ്ഥയാണിതെന്നും തമിഴ്‌നാട് മുഴുവന്‍ ഭീതിയിലാണെന്നും അദ്ദേഹം ഫേസ്ബുക്കിലൂടെ പങ്കുവെച്ചു.

തമിഴ്‌നാടിന് സഹായമായി എത്തുന്നവര്‍ക്കും പ്രാര്‍ത്ഥിക്കുന്നവര്‍ക്കും നന്ദിയുണ്ടെന്നും എആര്‍ റഹ്മാന്‍ ഫേസ്ബുക്കില്‍ കുറിച്ചു. ചെന്നൈയുടെ ഇപ്പോഴത്തെ അവസ്ഥ കാണാനുള്ള മനക്കട്ടി തനിക്കില്ലെന്നും എആര്‍ റഹ്മാന്‍ പറയുന്നു. ഇപ്പോള്‍ തമിഴ്‌നാട്ടിലെ ജനങ്ങള്‍ ഒരു അഭയാര്‍ത്ഥികളെ പോലെയാണെന്നും അദ്ദേഹം പറയുന്നു.

മഴ ശമിച്ച് ചെന്നൈ പഴയ രൂപത്തിലേക്ക് പെട്ടെന്ന് തിരിച്ചെത്തുമെന്നാണ് പ്രതീക്ഷിക്കുന്നത്. ഇനി ഇങ്ങനെയൊരു ദുരന്തം ഉണ്ടാകല്ലേയെന്ന പ്രാര്‍ത്ഥനയാണ് ഉള്ളതെന്നും അദ്ദേഹം പറഞ്ഞു. എല്ലാത്തിനും ദൈവം അനുഗ്രഹിക്കട്ടേയെന്നും എആര്‍ റഹ്മാന്‍ ഫേസ്ബുക്കില്‍ കുറിച്ചു.

English summary

Music composer A.R Rahman facebook post about Chennai flood