പികെ വേദനിപ്പിച്ചെങ്കില് ക്ഷമ ചോദിക്കുന്നതായി ആമിര്
മുംബൈ: ബോളിവുഡിലെ എക്കാലത്തെയും വലിയ സൂപ്പര്ഹിറ്റായി മാറിയ പികെ എന്ന സിനിമയ്ക്കെതിരെ ഉയര്ന്ന വിമര്ശനങ്ങള്ക്ക് ഒടുവില് നടന് ആമിര് ഖാന് പ്രതികരിച്ചു. പികെ സിനിമ ആരെയെങ്കിലും വേദനിപ്പിച്ചെങ്കില് മാപ്പു ചോദിക്കുന്നതായി അദ്ദേഹം പറഞ്ഞു. സിനിമയുടെ ഡിവിഡി റിലീസ് വേദിയില് വെച്ചായിരുന്നു ക്ഷമാപണം.
രാജ് കുമാര് ഹിരാനിയുടെ പികെ എന്ന സിനിമ അന്ധവിശ്വാസങ്ങളെയും ആള്ദൈവങ്ങളെയും കണക്കറ്റ് കളിയാക്കുന്നതായിരുന്നു. ഇതേ തുടര്ന്ന് ഹിന്ദു സംഘടനകള് രാജ്യമെമ്പാടും പ്രതിഷേധവും സംഘടിപ്പിച്ചു. തീയേറ്ററുകളുടെ പ്രവര്ത്തനം തടസ്സപ്പെടുത്തുകയും ചില തീയേറ്ററുകളില് അക്രമം നടത്തുകയും ചെയ്തിരുന്നു.
ഇക്കാലയളവില് ആമിര് പ്രതിഷേധങ്ങള്ക്ക് മറുപടി പറഞ്ഞിരുന്നില്ല. ഇതാദ്യമായാണ് സിനിമയ്ക്കെതിരെ ഉയര്ന്ന പ്രതിഷേധത്തിന് ആമിര് പൊതുവേദിയില് പ്രതികരിക്കുന്നത്. സിനിമ ഭൂരിപക്ഷം ആളുകള്ക്കും ഇഷ്ടപ്പെട്ടതില് സന്തോഷമുണ്ട്. എന്നാല് ചിലരെ സിനിമയിലെ ചില ഭാഗങ്ങള് വേദനിപ്പിച്ചതായി പരാതി ഉയര്ന്നിരുന്നു.
ആരെയും വേദനിപ്പിക്കുക ആയിരുന്നില്ല തങ്ങളുടെ ഉദ്ദേശം പറയാനുള്ള കാര്യങ്ങള് അവതരിപ്പിക്കുക മാത്രമാണ് ചെയ്തത്. ആരുടെയെങ്കിലും വികാരങ്ങളെ സിനിമ വേദനിപ്പിച്ചെങ്കില് മാപ്പു ചോദിക്കുകയാണെന്നും ആമിര് പറഞ്ഞു. ഇന്ത്യയിലും വിദേശത്തുമടക്കം ഏറ്റവും കൂടുതല് കലക്ഷന് നേടിയ ബോളിവുഡ് ചിത്രമെന്ന ഖ്യാതി പികെ നേടിയിരുന്നു.