ആപ്പ് ഏഴാമത് സ്ഥാനാര്ഥി പട്ടിക പുറത്ത് വിട്ടു
ദില്ലി: ആംആദ്മി പാര്ട്ടി ഏഴാമത് സ്ഥാനാര്ത്ഥി പട്ടിക പുറത്ത് വിട്ടു. കൂടംകുളം സമരനായകന് എസ്പി ഉദയകുമാര് ഉള്പ്പടെയുള്ള പ്രമുഖര് പട്ടികയില് ഇടം നേടി. കന്യാകുമാരിയില് നിന്നാണ് ഉദയകുമാര് ജനവിധി തേടുന്നത്. 26 സ്ഥാനാര്ത്ഥികളുടെ പേരാണ് പട്ടികയില് ഉള്പ്പെട്ടിട്ടുള്ളത്.
ഹിമാത് സിംഗ് ഷെര്ഗില് പഞ്ചാബിലെ ആനന്ദ്പൂര് സാഹിബ് സീറ്റില് നിന്ന് മത്സരിയ്ക്കും. ഏഴാം ഘട്ട സ്ഥാനാര്ത്ഥി പട്ടികയില് ബീഹാറില് ആറ് മണ്ഡലങ്ങളിലെ സ്ഥാനാര്ത്ഥികള്, തമിഴ് നാട്ടില് എട്ട് മണ്ഡലങ്ങളിലെ സ്ഥാനാര്ത്ഥികള്, ഉത്തര്പ്രദേശില് നാല് മണ്ഡലങ്ങളിലെ സ്ഥാനാര്ത്ഥികള് എന്നിവരെയും പ്രഖ്യാപിച്ചു.
മഹാരാഷ്ട്ര, ത്രിപുര, സിക്കീം, രാജസ്ഥാന്, പഞ്ചാബ്, പുതുച്ചേരി, മിസോറാം, മണിപ്പൂര് എന്നീ സംസ്ഥാനങ്ങളില് ഓരോ സ്ഥാനാര്ത്ഥികളെ വീതവും പട്ടികയില് എഎപി ഉള്പ്പെടുത്തിയിട്ടുണ്ട്. ഏഴാമത്തെ ലിസ്റ്റും പുറത്ത് വിട്ടതോടെ 543 സീറ്റുകളില് 268 സീറ്റുകളിലെ സ്ഥാനാര്ത്ഥികളെ പ്രഖ്യാപിയ്ക്കാന് എഎപിയ്ക്ക് കഴിഞ്ഞു.
ഇതിനിടയില് ആപ്പില് അംഗമായ ബോളിവുഡ് ഗായിക ജസ്പീന്ദര് നരൂല പാര്ട്ടി വിടുന്നുവെന്ന് സ്ഥിരീകിയ്ക്കാത്ത റിപ്പോര്ട്ടുകളുണ്ട്. വൈകുന്നേരം നാല് മണിയോടെ ഇത് സംബന്ധിച്ച ഔദ്യോഗിക പ്രഖ്യാപനം ഉണ്ടാകുമെന്നാണ് പ്രതീക്ഷിയ്ക്കുന്നത്.