ഉത്തരാഖണ്ഡിൽ എ എ പിയുടെ മുഖ്യമന്ത്രി സ്ഥാനാർത്ഥി ബിജെപിയിൽ ചേർന്നു

Published: Wednesday, May 25, 2022, 1:44 [IST]

ഡറാഡൂൺ; ഉത്തരാഖണ്ഡിൽ എ എ പിയുടെ മുഖ്യമന്ത്രി സ്ഥാനാർത്ഥിയായിരുന്ന റിട്ടയേർഡ് കേണൽ അജയ് കൊത്തിയാൽ ബിജെപിയിൽ ചേർന്നു.മുഖ്യമന്ത്രി പുഷ്കർ സിങ് ധാമിയുടെ സാന്നിധ്യത്തിലായിരുന്നു ബി ജെ പി പ്രവേശം. ആറ് ദിവസം മുൻപ് കൊത്തിയാൽ ആം ആദ്മിയിൽ നിന്നും രാജിവെച്ചിരുന്നു.

രാജ്യത്തെ മുൻ സൈനികരുടെയും, മുതിർന്നവരുടെയും സ്ത്രീകളുടെയും യുവാക്കളുടെയും ബുദ്ധിജീവികളുടെയും വികാരം മാനിച്ച് കൊണ്ട് താൻ ആം ആദ്മിയിൽ നിന്നും രാജിവെക്കുന്നുവെന്നായിരുന്നു കൊത്തിയാൽ രാജിക്കത്തിൽ പറഞ്ഞത്.

ആം ആദ്മിയിൽ ചേർന്ന തന്റെ തീരുമാനം തെറ്റായി പോയിരുന്നുവെന്ന് കൊത്തിയാൽ പറഞ്ഞു. ഞാൻ ആം ആദ്മി പാർട്ടിക്കൊപ്പമായിരുന്നപ്പോഴോ കേദാർനാഥ് ധാമിന്റെ നവീകരണത്തിന് വേണ്ടി പ്രവർത്തിച്ചപ്പോഴോ ഇത്രയധികം ക്യാമറകൾക്ക് മുന്നിൽ ഞാൻ അഭിമുഖീകരിച്ചിട്ടില്ല. നാമെല്ലാവരും മനുഷ്യരാണ്, ചിലപ്പോൾ നമ്മൾ വൈകാരികമായി തീരുമാനമെടുക്കും. ചിലപ്പോൾ ആ തീരുമാനങ്ങൾ ശരിയായേക്കും. ചിലപ്പോൾ അവ തെറ്റായേക്കും. തെറ്റായ തീരുമാനമാണ് എടുത്തിരിക്കുന്നതെന്ന് പകുതിയിൽ വെച്ച് തിരിച്ചറിഞ്ഞാൽ തിരുത്തണം, അതാണ് ബുദ്ധിപരമായ കാര്യം, കൊത്തിയാൽ പറഞ്ഞു.

തുടക്കത്തിൽ ആം ആദ്മിയുടെ പ്രവർത്തന രീതികൾ തന്നെ വളരെ അധികം ആകർഷിച്ചിരുന്നു. എന്നാൽ ഉത്തരാഖണ്ഡിന്റെ ക്ഷേമത്തിനായി ആം ആദ്മിക്ക് ഒന്നും ചെയ്യാൻ സാധിക്കില്ലെന്ന് പിന്നീട് ഞാൻ തിരിച്ചറിഞ്ഞു, കൊത്തിയാൽ പറഞ്ഞു. അതേസമയം കൊത്തിയാലിന്റെ വരവ് തുടക്കം മാത്രമാണെന്നും രാജ്യത്ത് നിന്ന് തന്നെ ആം ആദ്മിയെ പുറത്താക്കുമെന്നും മുഖ്യമന്ത്രി പുഷ്കർ സിംഗ് ധാമി പറഞ്ഞു. അദ്ദേഹത്തിന്റെ (കൊതിയാലിന്റെ) പെരുമാറ്റം ഒരിക്കലും ആ പാർട്ടിക്ക് (എഎപി) അനുസരിച്ചുള്ളതായിരുന്നില്ല, ഞങ്ങൾ എതിർ പക്ഷത്തായിരുന്നിട്ടും ഞങ്ങൾ അദ്ദേഹത്തെക്കുറിച്ച് ഒരു അഭിപ്രായവും പറഞ്ഞിട്ടില്ല... കേണൽ കൊത്തിയാലും മറ്റുള്ളവരും എഎപി വിട്ടതോടെ ബി ജെ പിയെ ഉത്തരാഖണ്ഡിൽ നിന്നും തുടച്ച് നീക്കാനുള്ള പ്രചരണത്തിന് തുടക്കമായെന്നും ധാമി പറഞ്ഞു.

ഇക്കഴിഞ്ഞ നിയമസഭ തിരഞ്ഞെടുപ്പിൽ വലിയ അട്ടിമറി പ്രതീക്ഷിച്ച് കൊണ്ടായിരുന്നു ഉത്തരാഖണ്ഡിൽ ആം ആദ്മി മത്സരിച്ചത്. കൊത്തിയാലിനെ മുഖ്യമന്ത്രി സ്ഥാനാർത്ഥിയായി പ്രഖ്യാപിച്ച് കൊണ്ടായിരുന്നു ആപ്പ് തിരഞ്ഞെടുപ്പിനെ നേരിട്ടത്. എന്നാൽ പാർട്ടി തിരഞ്ഞെടുപ്പിൽ സംപൂജ്യരായി. 3.31 ശതമാനം വോട്ട് മാത്രമായിരുന്നു പാർട്ടിക്ക് ലഭിച്ചത്. ഗംഗോത്രി നിയോജക മണ്ഡലത്തിൽ നിന്ന് മത്സരിച്ച കൊത്തിയാലിന് കെട്ടിവെച്ച കാശ് പോലും നഷ്ടമായി.