ഹരിയാന നിയമസഭയില് ഒറ്റക്ക് മത്സരിക്കും: കോണ്ഗ്രസ് സഖ്യം ലോക്സഭയിലേക്ക് മാത്രമെന്നും കെജ്രിവാള്
ഡല്ഹി: ഹരിയാനയിലെ 90 നിയമസഭാ സീറ്റുകളിലും പാർട്ടി ഒറ്റയ്ക്ക് മത്സരിക്കുമെന്ന് ഡൽഹി മുഖ്യമന്ത്രിയും എ എ പി ദേശീയ കൺവീനറുമായ അരവിന്ദ് കെജ്രിവാൾ. എന്നാൽ ലോക്സഭാ തിരഞ്ഞെടുപ്പിൽ പ്രതിപക്ഷ സഖ്യമായ ഇന്ത്യ ബ്ലോക്കിൻ്റെ ഭാഗമായിട്ടായിരിക്കും മത്സരിക്കുകയെന്നും അരവിന്ദ് കെജ്രിവാള് വ്യക്തമാക്കി.
ലോക്സഭാ തിരഞ്ഞെടുപ്പ് ഏപ്രിൽ-മെയ് മാസങ്ങളിൽ നടക്കാനിരിക്കെ, പൊതുതെരഞ്ഞെടുപ്പിന് ഏതാനും മാസങ്ങൾക്ക് ശേഷം ഹരിയാനയിലെ നിയമസഭാ തിരഞ്ഞെടുപ്പ് ഈ വർഷം അവസാനം നടക്കും. "ഇന്ന് ജനങ്ങൾക്ക് ഒരു പാർട്ടിയിൽ മാത്രമേ വിശ്വാസമുള്ളൂ, അത് ആം ആദ്മി പാർട്ടിയാണ്. ഒരു വശത്ത് അവർ പഞ്ചാബും മറുവശത്ത് ഡൽഹിയിലെ നമ്മുടെ സർക്കാരും കാണുന്നു. ഇന്ന് ഹരിയാന വലിയ മാറ്റമാണ് തേടുന്നത്. ഡൽഹിയിലും പഞ്ചാബിലും ആളുകൾ നേരത്തെ ഈ വലിയ മാറ്റം വരുത്തി, ഇപ്പോൾ അവിടെയുള്ള ആളുകൾ സന്തുഷ്ടരാണ്," ഹരിയാനയിലെ ജിന്ദിൽ തൻ്റെ പാർട്ടിയുടെ പരിപാടിയില് പങ്കെടുത്തുകൊണ്ട് അരവിന്ദ് കെജ്രിവാള് പറഞ്ഞു.
'ഹരിയാനയിലെ 90 നിയമസഭാ സീറ്റുകളിലും ആം ആദ്മി പാർട്ടി ഒറ്റയ്ക്ക് മത്സരിക്കുമെന്നും എന്നാൽ ലോക്സഭാ തെരഞ്ഞെടുപ്പിൽ ഇന്ത്യ ബ്ലോക്കിൻ്റെ ഭാഗമായിട്ടായിരിക്കും മത്സരിക്കുക' കെജ്രിവാൾ പറഞ്ഞു. പഞ്ചാബ് മുഖ്യമന്ത്രി ഭഗവന്ത് മാനും ചടങ്ങിൽ സന്നിഹിതനായിരുന്നു. ഇവിടെ ഭരിക്കുന്ന എല്ലാ പാർട്ടികളോടും സംസ്ഥാനത്തെ ജനങ്ങൾക്ക് മടുപ്പ് അനുഭവപ്പെട്ടതിനാല് ഹരിയാന ഒരു വലിയ മാറ്റത്തിനായി കാത്തിരിക്കുകയാണ്. അവർ മറ്റെല്ലാ പാർട്ടികളെയും പരീക്ഷിച്ചു, ഈ പാർട്ടികൾ അവരുടെ സ്വന്തം ഖജനാവ് നിറയ്ക്കുക മാത്രമാണ് ചെയ്തതെന്ന് എഎപി ദേശീയ കൺവീനർ ആരോപിച്ചു.
ഡൽഹിയിലും പഞ്ചാബിലും ചെയ്തതുപോലെ ജനങ്ങൾക്ക് 24 മണിക്കൂറും വൈദ്യുതി വിതരണവും മറ്റ് സൗകര്യങ്ങളും നൽകാൻ എഎപിക്ക് മാത്രമേ കഴിയൂ. കോൺഗ്രസിനും ബി ജെ പിക്കും ജെ ജെ പിക്കും ഇത് ചെയ്യാൻ കഴിയുമോ? അവർക്ക് കഴിയില്ല. എ എ പിക്ക് മാത്രമേ ഇത് ചെയ്യാൻ കഴിയുമെന്നും കെജ്രിവാൾ പറഞ്ഞു.
ഹരിയാനയിൽ ബി ജെ പി - ജെ ജെ പി സഖ്യം അധികാരത്തിലാണ്. മുഖ്യമന്ത്രി മനോഹർ ലാൽ ഖട്ടറിൻ്റെ നേതൃത്വത്തിലാണ് സർക്കാർ മുന്നോട്ട് പോകുന്നത്.
ബി ജെ പിയുടെ നേതൃത്വത്തിലുള്ള കേന്ദ്രത്തെ ലക്ഷ്യമിട്ട്, തന്നെ അറസ്റ്റ് ചെയ്യാൻ എല്ലാ ശക്തിയും ഉപയോഗിച്ചുവെന്നും ജയിലിൽ പോകുന്നതിൽ തനിക്ക് ഭയമില്ലെന്നും ഡൽഹി മുഖ്യമന്ത്രി ആരോപിച്ചു.
ആദായനികുതി വകുപ്പ്, സി ബി ഐ, ഇ ഡി, ഡൽഹി പൊലീസ് എന്നിവരെ എനിക്കെതിരെ അവർ ഉപയോഗിച്ചു. ജയിലിൽ പോകുന്നതിൽ എനിക്ക് ഭയമില്ല. ഞാൻ ഹരിയാനക്കാരനാണ് 'ഹരിയാനവാല'യെ ഭയപ്പെടുത്താൻ ശ്രമിക്കരുതെന്ന് അവരോട് പറയാൻ ഞാൻ ആഗ്രഹിക്കുന്നു. ഞാൻ ഹരിയാനയുടെ മകനാണെന്നും അദ്ദേഹം പറഞ്ഞു.
Click it and Unblock the Notifications
Sign in with Google