നിരോധനം നീക്കി ജല്ലിക്കെട്ട് തിരിച്ചെത്തെണമെന്ന് ജയറാം
ചെന്നൈ: തമിഴകത്തെ പ്രമുഖ കായിക വിനോദമായ ജല്ലിക്കെട്ടിനെ പിന്തുണച്ച് പ്രശസ്ത നടന് ജയറാം രംഗത്തെത്തി. നിരോധനം നീക്കി ജല്ലിക്കെട്ട് തിരിച്ചെത്തണമെന്നാണ് തന്റെ ആഗ്രഹമെന്ന് ജയറാം പറഞ്ഞു. ജല്ലിക്കെട്ടിനെക്കുറിച്ചുള്ള ഫോട്ടോ പ്രദര്ശനം ചെന്നൈയില് നടക്കുകയാണ്. പ്രദര്ശനം കാണുന്നതിനിടയായിരുന്നു താരം ഇങ്ങനെ അഭിപ്രായപ്പെട്ടത്.
ജല്ലിക്കെട്ട് തമിഴ് സാംസ്കാരിക പൈതൃകമെന്ന് കഴിഞ്ഞ ദിവസം കമല്ഹാസനും അഭിപ്രായപ്പെട്ടിരുന്നു. ശരീരത്തിന്റെ ശക്തിയും മനക്കരുത്തും ഒത്തുചേരുന്നതാണ് ജല്ലിക്കെട്ടെന്നും ജയറാം പറഞ്ഞു. കുതിച്ചെത്തുന്ന കാളക്കുട്ടന്മാരെ ധീരന്മാര് കീഴ്പ്പെടുത്തുന്ന ഈ പരമ്പരാഗത കായിക വിനോദം തിരിച്ചെത്തണമെന്നാണാഗ്രഹിക്കുന്നതെന്നും താരം പറഞ്ഞു.
നവംബര് രണ്ടിനു ചെന്നൈ ഗ്രീംസ് റോഡ് ലളിതകലാ അക്കാദമി ആര്ട്ട് ഗാലറിയില് ആരംഭിച്ച 'വീര വിളയാട്ട്' എന്ന ഫോട്ടോ പ്രദര്ശനം നവംബര് എട്ടുവരെ തുടരും. ഒട്ടേറെ ചലച്ചിത്ര പ്രമുഖര് പ്രദര്ശനം കാണാന് എത്തുന്നുണ്ട്. ഉലകനായകന് കമല്ഹാസനാണ് മേള ഉദ്ഘാടനം ചെയ്തത്.
ജയറാമിനൊപ്പം മകന് കാളിദാസനും പ്രദര്ശനം കാണാനെത്തിയിരുന്നു. ഫോട്ടോഗ്രാഫര് സുരേഷിന്റെ അറുപതിലധികം ചിത്രങ്ങളാണ് പ്രദര്ശനത്തിനുള്ളത്.