പെരമ്പൂരില് എസി ഓഫീസ്; വിജയ്ക്ക് മറ്റൊരു വെല്ലുവിളി, സംഗീതയുടെ ആസ്തി പരസ്യമാക്കുമോ
തമിഴ്നാട് നിയമസഭാ തിരഞ്ഞെടുപ്പിൽ മത്സരിക്കാനുള്ള നീക്കങ്ങൾ സജീവമാക്കുന്നതിനിടെ, നടനും തമിഴക വെട്രി കഴകം (ടിവികെ) നേതാവുമായ വിജയ്ക്ക് വ്യക്തിപരമായ വെല്ലുവിളി. ഭാര്യ സംഗീത വിവാഹമോചനം ആവശ്യപ്പെട്ട് കോടതിയെ സമീപിച്ചത് അദ്ദേഹത്തിൻ്റെ രാഷ്ട്രീയ ഭാവിയെ ചോദ്യം ചെയ്തേക്കാം. ഏപ്രിൽ 23-ന് നടക്കാനിരിക്കുന്ന തിരഞ്ഞെടുപ്പും അതിനായുള്ള ഒരുക്കങ്ങളും സജീവമായിരിക്കെയാണ് വിജയുടെ രാഷ്ട്രീയ ഭാവി സംബന്ധിച്ച ചർച്ച സാമൂഹിക മാധ്യമങ്ങളിൽ ചൂടുപിടിക്കുന്നത്.
വരാനിരിക്കുന്ന തിരഞ്ഞെടുപ്പിൽ തമിഴക വെട്രി കഴകം ഒറ്റയ്ക്ക് മത്സരിക്കുമെന്ന് ഏതാണ്ട് ഉറപ്പായിട്ടുണ്ട്. ബിജെപിയുമായി സഖ്യമുണ്ടാക്കുന്നതിനെപ്പറ്റി അഭ്യൂഹങ്ങൾ പ്രചരിച്ചിരുന്നെങ്കിലും, 234 മണ്ഡലങ്ങളിലും ഒറ്റയ്ക്ക് മത്സരിക്കാനാണ് ടിവികെ നേതൃത്വം തീരുമാനിച്ചിരിക്കുന്നത്. പാർട്ടിയുടെ 60 മണ്ഡലങ്ങളിലേക്കുള്ള സ്ഥാനാർത്ഥി അഭിമുഖങ്ങൾ വിജയ് പൂർത്തിയാക്കുകയും ചെയ്തു.
വിജയ് ചെന്നൈയിലെ പെരമ്പൂർ മണ്ഡലത്തിൽ നിന്ന് മത്സരിക്കുമെന്നാണ് നിലവിലെ റിപ്പോർട്ടുകൾ വ്യക്തമാക്കുന്നത്. നേരത്തെ തിരുച്ചി, നാഗൈ എന്നിവിടങ്ങളിൽ മത്സരിക്കാൻ സാധ്യതയുണ്ടെന്ന് ചർച്ചകൾ ഉയർന്നെങ്കിലും, പെരമ്പൂരിൽ ടിവികെ ഒരു എസി തിരഞ്ഞെടുപ്പ് ഓഫീസ് തുറക്കുന്നതുൾപ്പെടെയുള്ള ഒരുക്കങ്ങൾ ആരംഭിച്ചു കഴിഞ്ഞു. ഇത് പെരമ്പൂർ മണ്ഡലത്തിൽ വിജയ് മല്സരിക്കുമെന്ന സൂചനയായി കണക്കാക്കുന്നു.
എന്നാൽ, വിജയ്യുടെ തിരഞ്ഞെടുപ്പ് പ്രവേശനത്തിന് തടസ്സമായേക്കാവുന്ന ഒരു പ്രധാന വിഷയമാണ് ഭാര്യ സംഗീതയുമായുള്ള വിവാഹമോചനക്കേസ്. വിജയ്ക്ക് ഒരു നടിയുമായി വിവാഹേതര ബന്ധമുണ്ടെന്നും തന്നോട് അവഗണന കാണിച്ചെന്നും ആരോപിച്ച് സംഗീത ചെങ്കൽപേട്ട് കുടുംബക്ഷേമ കോടതിയിൽ ഹർജി നൽകിയിട്ടുണ്ട്. ഈ വിഷയം 2021 ഏപ്രിൽ മുതൽ തുടങ്ങിയതാണെന്നും സംഗീത ആരോപിക്കുന്നു.
വിജയ്യുടെ സാമൂഹിക നിലവാരത്തിനും സ്വത്ത് വിവരങ്ങൾക്കും അനുസരിച്ചുള്ള ജീവനാംശവും, വിവാഹമോചനക്കേസ് തീരും വരെ നിലാങ്കരയിലെ വീട്ടിൽ താമസിക്കാൻ അനുമതിയും സംഗീത ആവശ്യപ്പെട്ടിട്ടുണ്ട്. ഏപ്രിൽ 20-ന് ചെങ്കൽപേട്ട് കുടുംബക്ഷേമ കോടതി ഈ കേസ് പരിഗണിക്കും. ഇത് വിജയിയുടെ രാഷ്ട്രീയ ജീവിതത്തിലെ നിർണായകമായ ഒരു ഘട്ടമാണ്.
വിവാഹമോചനം ഔദ്യോഗികമായി നടക്കാത്തതുകൊണ്ട്, വിജയ് നാമനിർദ്ദേശ പത്രിക സമർപ്പിക്കുമ്പോൾ ഭാര്യയുടെ സ്വത്ത് വിവരങ്ങൾ കൂടി രേഖപ്പെടുത്തേണ്ടി വരും. അഭിപ്രായവ്യത്യാസങ്ങൾ നിലനിൽക്കുന്നതിനാൽ, സംഗീതയുടെ സ്വത്ത് വിവരങ്ങൾ നൽകുന്നതിൽ എന്തെങ്കിലും പിഴവുകൾ സംഭവിച്ചാൽ വിജയ്യുടെ നാമനിർദ്ദേശ പത്രിക തള്ളാൻ സാധ്യതയുണ്ടെന്ന് രാഷ്ട്രീയ നിരീക്ഷകർ പറയുന്നു. ബ്രിട്ടനില് ഉള്പ്പെടെ കോടികളുടെ ആസ്തിയുടെ വ്യക്തിയാണ് സംഗീത.
അങ്ങനെ സംഭവിച്ചാൽ, വിജയ്ക്ക് തിരഞ്ഞെടുപ്പിൽ മത്സരിക്കാൻ കഴിയാത്ത സാഹചര്യം വന്നേക്കാം. 1999-ൽ വിവാഹിതരായ ഇവർ 27 വർഷത്തെ ദാമ്പത്യജീവിതത്തിലാണ് വേർപിരിയുന്നത്. കരൂർ സിബിഐ അന്വേഷണം, 'ജനനായകൻ' സിനിമയുടെ റിലീസ് തടസ്സങ്ങൾ എന്നിവ ഉൾപ്പെടെയുള്ള മറ്റ് വെല്ലുവിളികളും വിജയ് നേരിടുന്നുണ്ട്. ഈ വിവാഹമോചനക്കേസ് വിജയ്യുടെ രാഷ്ട്രീയ ഭാവിക്ക് കടുത്ത പ്രതിസന്ധിയാണ് സൃഷ്ടിച്ചിരിക്കുന്നത്.
Click it and Unblock the Notifications
Sign in with Google