'നടി അഞ്ജു മരിച്ചു....' വൈറലായി വ്യാജ വാർത്ത, പ്രതിഷേധവുമായി നടി രംഗത്ത്, മാനസികമായി തളർത്തുന്നു...

Published: Monday, November 19, 2018, 21:32 [IST]

മലയാളത്തിലെ ഏറ്റവും മികച്ച പ്രതികാരത്തിന്റെ കഥ പറഞ്ഞ ചിത്രമായിരുന്നു താഴ്വാരം. താഴ്വാരത്തിലൂടെ നായികയായി കടന്നുവന്ന നടിയായിരുന്നു അഞ്ജു. എന്നാൽ അതിനു മുന്നേയും അഞ്ജു മലയാളികളുടെ ഹൃദയങ്ങളിൽ ഇടം പിടിച്ചിരുന്നു. "തുമ്പി വാ തുമ്പക്കുടത്തിന്‍ തുഞ്ചത്തായ്‌ ഊഞ്ഞാലിടാം..." എന്ന പാട്ട്‌ ഒരിക്കല്‍ എങ്കിലും മൂളിയിട്ടില്ലാത്ത മലയാളിയുണ്ടാവില്ല. വലിയ പൊട്ടും അഴിച്ചിട്ട മുടിയുമായി ഈ പാട്ടു പാടി അഭിനയിച്ച പൂര്‍ണിമ ജയറാമിനൊപ്പം ആ പാട്ടിലുള്ള രണ്ട്‌ കുട്ടികളെയും നമ്മള്‍ നെഞ്ചേറ്റി.

1982ല്‍ ഓളങ്ങള്‍ എന്ന സിനിമയില്‍ പൂര്‍ണിമ ജയറാമിന്റെ മകനായി സിനിമാ ജീവിതം തുടങ്ങിയ അഞ്‌ജു താഴ്‌വാരത്തില്‍ മോഹൻലാലിന്റെ നായികയായി എത്തുകയായിരുന്നു. തുടർന്ന് കാട്ടുകുതിര, നീലഗിരി, പണ്ടു പണ്ടൊരു രാജകുമാരി തുടങ്ങി നിരവധി സിനിമകളിൽ അഭിനയിച്ചു. തമിഴിലും മലയാളത്തിലും നിരവധി നല്ല സിനിമകളിൽ അഭിനയിച്ച ബേബി അഞ്ജു മരിച്ചെന്ന വാർത്തയാണ് ഇപ്പോൾ സോഷ്യൽ മീഡിയ കൊണ്ടാടുന്നത്. വ്യാജ വാർത്തയ്ക്കെതിരെ പ്രതിഷേധവുമായി അഞ്ജു തന്നെ രംഗത്തെത്തി.

മാനസികമായി തളർത്തുന്നു

ഇത് വ്യാജ വാർത്തയാണെന്ന് പറഞ്ഞാണ് അഞ്ജു തന്നെ രംഗത്തെത്തിയിരിക്കുന്നത്. നിരവധി പേർക്ക് ഇത്തരത്തിലുള്ള പ്രശ്നങ്ങൾ അനുഭവിക്കേണ്ടി വന്നിട്ടുണ്ട്. ആ പട്ടികയിൽ ഞാനും ഉൾപ്പെട്ടിരിക്കുകയാണ്. എനിക്കും എന്റെ കുുടുംബത്തിനും ഇത് വലിയ അസ്വസ്ഥത ഉണ്ടാക്കുന്നെന്ന് അഞ്ജു പറഞ്ഞു. ഇത്തരം വ്യാജ വാർത്തകൾ തന്നെ മാനസികമായി തളർത്തുന്നുവെന്നും അവർ കൂട്ടിച്ചേർത്തു.

സന്തോഷത്തോടെ ജീവിക്കുന്നു

അഞ്ജുവിന്റെ സുഹൃത്തായ ക്യാമറാമാനും നടനുമായ നാട്ടിയും വ്യാജ വാർത്തയ്ക്കെതിരെ പ്രതികരിച്ചിട്ടുണ്ട്. അവർ തമിഴ്നാട്ടിലെ വലസരവക്കം എന്ന സ്ഥലത്ത് സന്തോഷത്തോടെ ജീവിക്കുകയാണ്. പിന്നെന്തിനാണ് ഉത്തരത്തിലുള്ള വ്യാജ വാർത്ത പടച്ചുവിടുന്നതെന്ന് അദ്ദേഹം ചോദിച്ചു.

രണ്ടാം വയസിൽ സിനിമയിലേക്ക്

തന്റെ രണ്ടാം വയസ്സിൽ സിനിമ ജീവിതം ആരംഭിച്ച നടിയാണ് അഞ്ജു. മഹേന്ദ്രന്റെ ഉത്തിരി പൂക്കൾ എന്ന സിനിമയിലൂടെയായിരുന്നു അരങ്ങേറ്റം. തുടർന്ന് നിരവധി സിനിമയിൽ ചൈൽഡ് ആർട്ടിസ്റ്റ് ആയി അഭിനയിച്ച അവർ 'ബേബി അഞ്ജു' അറിയപ്പെട്ടു. തുടർന്ന് നിരവധി സിനിമകളിൽ നായികയായും ഉപനായികയായും പ്രേക്ഷകരുടെ മനസിൽ ചേക്കേറുകയായിരുന്നു. ചിത്തി എന്ന തമിഴ് സീരിയലിലും അഞ്ജു അഭിനയിച്ചിട്ടുണ്ട്. 450 എപ്പിസോഡ് വരെ സംപ്രേഷണം ചെയ്തിരുന്നു. മദ ആനൈ കൂട്ടം എന്ന തമിഴ്സിനിമയിലാണ് അഞ്ജു അവസാനമായി അഭിനയിച്ചത്.

ഇതാദ്യമല്ല കൊല്ലുന്നത്...

മലയാള സിനിമയിലെ പല പ്രമുഖർക്കെതിരെയും ഇത്തരത്തിലുള്ള വ്യാജ വാർത്തകൾ സോഷ്യൽ മീഡിയയിൽ നേരത്തെ വന്നിരുന്നു. ഏറ്റവും അവസാനമായി നടൻ വിജയരാഘവൻ മരിച്ചെന്നായിരുന്നു വാർത്ത വന്നിരുന്നത്. വ്യാജ വാര്‍ത്തയറിഞ്ഞ് വിജയരാഘവന്‍ തന്നെ രംഗത്തെത്തുകയായിരുന്നു. ഇതാദ്യമായല്ല സോഷ്യല്‍ മീഡിയ നടന്‍മാരെ കൊല്ലുന്നത്. സലിം കുമാര്‍, ഇന്നസെന്റ്, മാമുക്കോയ, കനക എന്നിവരെയും സോഷ്യല്‍ മീഡിയ ഇതുപോലെ കൊന്നിട്ടുണ്ട്.

Published On November 19, 2018