ഏഴ് വര്ഷം മുമ്പ് മരിച്ച നടിയെ മനോരമ ജീവിപ്പിച്ചോ... അതോ നടി മരിച്ചിട്ടില്ലേ...
ചെന്നൈ: മലയാളം, തമിഴ് സിനിമകളില് സജീവമായിരുന്ന നടി ആരും നോക്കാനില്ലാതെ തെരുവിലെന്ന് വാര്ത്ത. സംഭവം ശ്രദ്ധയില് പെട്ട ദേശീയ മനുഷ്യാവകാശ കമ്മീഷന് ഇക്കാര്യത്തില് റിപ്പോര്ട്ട് തേടിയതായും മനോരമ ഓണ്ലൈനില് വാര്ത്തയുണ്ട്. എന്നാല് നിഷ നൂര് 2007 ല് മരിച്ചു എന്നാണ് ചിലരുടെ വാദം.
ആയ്യര് ദ ഗ്രേറ്റ് എന്ന മമ്മൂട്ടി ചിത്രത്തിലൂടെ മലയാളത്തില് ശ്രദ്ധ നേടിയ താരമാണ് നിഷ എന്ന നൂര് നിഷ. മലയാളത്തിലും തമിഴിലും ആയി ഒട്ടേറെ ചിത്രങ്ങളില് ഇവര് അഭിനയിച്ചിട്ടുണ്ട്. മിമിക്സ് ആക്ഷന് 500 ആണ് മലയാളത്തില് ഒടുവില് അഭിനയിച്ച ചിത്രം.
എന്നാല് നടി ജീവിച്ചിരിക്കുന്നു എന്ന് തന്നെയാണ് വിക്കി പീഡിയയില് നിന്നുള്ള വിവരം. നടിക്ക് ഗുരുതരമായ ലൈംഗിക രോഗമാണ്. ഒരു പ്രമുഖ നിര്മാതാവാണ് താരത്തെ വഴിവിട്ട ജീവിതത്തിലേക്ക് തള്ളിവിട്ടത്. തമിഴ്നാട്ടിലെ നാഗൂരില് അതീവ ഗുരുതരാവസ്ഥയിലാണ് നടി ഇപ്പോഴുള്ളത്- വിക്കി പീഡിയ നല്കുന്ന വിരങ്ങള് ഇത്രയൊക്കെയാണ്. അതേ സമയം നിഷ നൂര് ഡെത്ത് എന്ന് ഗൂഗിളില് തിരഞ്ഞാല് 2007 ല് മരിച്ചു എന്നാണ് വിവരം കിട്ടുക.
നിഷയുടെ ചിത്രങ്ങളും രോഗ വിവരങ്ങളും ഒക്കെ കാണിച്ച് വാട്സ് ആപ്പില് ചില സന്ദേശങ്ങളും ഇപ്പോള് പ്രചരിക്കുന്നുണ്ട്.
നാഗപട്ടണത്തിലെ തെരുവിലാണ് നടിയെ ഉപേക്ഷിക്കപ്പെട്ട നിലയില് കണ്ടെത്തിയതെന്നാണ് മനോരമ വാര്ത്ത. നിഷക്ക് ചികിത്സ നല്കണം എന്നും നാലാഴ്ചക്കകം റിപ്പോര്ട്ട് നല്കണം എന്നും മനുഷ്യാവകാശ കമ്മീഷന് ആവശ്യപ്പെട്ടിട്ടുണ്ടെന്നും മനോരമ വാര്ത്തയില് പറയുന്നു.
തമിഴില് നായികയായി തിളങ്ങിയ താരമായിരുന്നു നിഷ നൂര്. എമ്പതുകളില് ഏറെ തിരക്കുള്ള നടിയായിരുന്നു. കമല്ഹാസനൊപ്പം ടിക് ടിക് ടിക് എന്ന ഹിറ്റ് ചിത്രത്തിലും നിഷ അഭിനയിച്ചിട്ടുണ്ട്.