ഷൂട്ടിങിനിടെ നിക്കി ഗല്റാണിക്ക് പരിക്ക്, താരത്തിന്റെ കൈ ഒടിഞ്ഞു
ചെന്നൈ: സിനിമാ ഷൂട്ടിങിനിടെ തെന്നിന്ത്യന് താരം നിക്കി ഗല്റാണിക്ക് പരിക്ക്. തമിഴ് ചിത്രത്തിന്റെ അവസാന പണിപുരയിലാണ് അപകടമുണ്ടാകുന്നത്. അപകടത്തില് നിക്കി ഗല്റാണിയുടെ കൈയൊടിഞ്ഞു. ഏഴില് സംവിധാനം ചെയ്യുന്ന പുതിയ തമിഴ് ചിത്രത്തിലെ സ്റ്റണ്ട് സീന് അഭിനയിക്കുന്നതിനിടെയാണ് പരിക്കേറ്റത്.
ഡ്യൂപ്പില്ലാതെ സ്റ്റണ്ട് സീന് അഭിനയിച്ചതാണ് താരത്തിന് പണി കിട്ടിയത്. ചിത്രത്തില് പോലീസ് ഉദ്യോഗസ്ഥയുടെ വേഷത്തിലാണ് നിക്കി എത്തുന്നത്. സിമന്റ് കട്ട കൈ കൊണ്ട് അടിച്ചു പൊട്ടിക്കുന്ന സീനാണ് ഷൂട്ട് ചെയ്യേണ്ടിയിരുന്നത്. സ്ലാബുകള് പൊട്ടിക്കാനുള്ള ശ്രമത്തിനിടെയാണ് കൈയ്ക്ക് പരിക്കേല്ക്കുന്നത്.
ഇടതു കൈയ്യിലെ ചെറുവിരലിന് പൊട്ടലുണ്ടെന്ന് ഡോക്ടര് വ്യക്തമാക്കി. മൂന്നോ നാലോ ആഴ്ച വിശ്രമം ആവശ്യമാണെന്ന് ഡോക്ടര് അറിയിച്ചു. വ്യത്യസ്ത വേഷത്തിലൂടെ ആരാധകരെ ഞെട്ടിക്കാനാണ് നിക്കിയുടെ ശ്രമം. ഏഴില് സംവിധാനം ചെയ്യുന്ന ആക്ഷന് ചിത്രത്തിനുവേണ്ടി കളരിയും ആയോധന കലകളും നിക്കി പഠിച്ചിരുന്നു.
വിഷ്ണു വിശാലാണ് ചിത്രത്തിലെ നായക വേഷം കൈകാര്യം ചെയ്യുന്നത്. പുരുഷനെ പോലെ പോരാടുന്ന പല രംഗങ്ങളും ചിത്രത്തിനുവേണ്ടി നിക്കിക്ക് ചെയ്യേണ്ടി വന്നിട്ടുണ്ട്.