അദാനിയുടെ പിറന്നാൾ ദിനത്തിൽ പ്രത്യേക രക്തദാന ക്യാമ്പെയ്ൻ;52,306 യൂണിറ്റ് രക്തം ശേഖരിച്ച് അദാനി ഫൗണ്ടേഷൻ
അദാനി ഗ്രൂപ്പ് ചെയർമാൻ ഗൗതം അദാനിയുടെ 64-ാം ജന്മദിനത്തോടനുബന്ധിച്ച് അദാനി ഫൗണ്ടേഷൻ സംഘടിപ്പിച്ച രക്തദാന ക്യാമ്പെയിനിൽ 52,306 യൂണിറ്റ് രക്തം ശേഖരിച്ചു. ഇന്ത്യയിലും വിദേശത്തുമായി 750-ലധികം സ്ഥലങ്ങളിൽ നടത്തിയ വിപുലമായ ഡ്രൈവ് രാജ്യത്തെ തന്നെ ഏറ്റവും വലിയ രക്തദാന ക്യാമ്പെയിനുകളിൽ ഒന്നായാണ് വിലയിരുത്തപ്പെടുന്നത്.
21 സംസ്ഥാനങ്ങൾ, 5 കേന്ദ്രഭരണ പ്രദേശങ്ങൾ, 4 അന്താരാഷ്ട്ര കേന്ദ്രങ്ങൾ എന്നിവിടങ്ങളിലെ 754 കേന്ദ്രങ്ങളിലായാണ് ക്യാമ്പെയ്ൻ സംഘടിപ്പിച്ചത്. കഴിഞ്ഞ വർഷം ശേഖരിച്ച 28,090 യൂണിറ്റുമായി താരതമ്യപ്പെടുത്തുമ്പോൾ ഇത്തവണ വലിയ വർധനവാണ് രേഖപ്പെടുത്തിയത്.
“സേവാ ഹി സാധനാ ഹേ” എന്നതായിരുന്നു പരിപാടിയുടെ സന്ദേശം. പരിപാടിയിൽ ആയിരക്കണക്കിന് രക്തദാതാക്കളും 6,000-ത്തിലധികം വോളണ്ടിയർമാരും പങ്കെടുത്തു. ഡോക്ടർമാർ, പാരാമെഡിക്കൽ സ്റ്റാഫ്, അഡ്മിനിസ്ട്രേറ്റീവ് ജീവനക്കാർ, അദാനി ഗ്രൂപ്പ് കമ്പനികളിലെ ജീവനക്കാർ എന്നിവരും സജീവമായി പങ്കാളികളായി. രാജ്യത്തുടനീളം പ്രവർത്തിക്കുന്ന 764-ലധികം രക്തബാങ്കുകളുടെ സഹകരണത്തോടെയാണ് ക്യാമ്പെയിൻ നടന്നത്. റെഡ് ക്രോസ് കേന്ദ്രങ്ങൾ, സർക്കാർ ആശുപത്രികൾ, ട്രസ്റ്റ് ആശുപത്രികൾ എന്നിവയും ഇതിൽ ഉൾപ്പെടുന്നു.
അദാനി ഫൗണ്ടേഷൻ നൽകിയ കണക്കുകൾ പ്രകാരം ശേഖരിച്ച 52,306 യൂണിറ്റ് രക്തം (ഏകദേശം 23,538 ലിറ്റർ) വഴി 1.56 ലക്ഷത്തിലധികം രോഗികൾക്ക് സഹായം ലഭിക്കുമെന്നാണ് പ്രതീക്ഷ. പ്ലാസ്മ, പ്ലേറ്റ്ലെറ്റുകൾ, പാക്ക്ഡ് റെഡ് സെൽസ്, ഫ്രെഷ് ഫ്രോസൺ പ്ലാസ്മ തുടങ്ങിയ രക്തഘടകങ്ങൾ അടിയന്തര ചികിത്സകൾ, വലിയ ശസ്ത്രക്രിയകൾ, കാൻസർ ചികിത്സ, മാതൃത്വാരോഗ്യ സേവനങ്ങൾ തുടങ്ങിയവയ്ക്കും ഇത് ഉപയോഗിക്കാം.
ഈ ക്യാമ്പെയിൻ വലിയൊരു കൂട്ടായ്മയുടെ ഫലമാണെന്ന് അദാനി ഫൗണ്ടേഷൻ ചെയർപേഴ്സൺ ഡോ. പ്രീതി അദാനി സമൂഹമാധ്യമത്തിൽ പങ്കുവെച്ച കുറിപ്പിൽ പറഞ്ഞു. “ഗൗതം അദാനിയുടെ 'സേവാ ഹി സാധനാ ഹേ’ എന്ന വിശ്വാസം ഈ ജന്മദിനത്തിൽ ഈ മഹത്തായ രക്തദാന ക്യാമ്പെയിനിലൂടെ യാഥാർത്ഥ്യമായി. പങ്കെടുത്ത എല്ലാ അദാനിയന്മാർക്കും ആരോഗ്യപ്രവർത്തകർക്കും എന്റെ ഹൃദയപൂർവമായ നന്ദി,” എന്നും അവർ കുറിച്ചു.
2011-ൽ ഏകദേശം 1,300 യൂണിറ്റ് രക്തം ശേഖരിച്ചുകൊണ്ടാണ് ഈ വാർഷിക ക്യാമ്പെയിൻ ആരംഭിച്ചത്. വർഷങ്ങളായി ഇത് രാജ്യത്തെ തന്നെ ഏറ്റവും വലിയ രക്തദാന പരിപാടികളിലൊന്നായി വളർന്നു. ജീവനക്കാർ, പങ്കാളികൾ, പ്രാദേശിക സമൂഹങ്ങൾ എന്നിവയുടെ പങ്കാളിത്തത്തോടെ ഇത് തുടർച്ചയായി വിപുലമാകുകയാണ്.
1996-ൽ സ്ഥാപിതമായ അദാനി ഫൗണ്ടേഷൻ വിദ്യാഭ്യാസം, ആരോഗ്യം, പോഷകാഹാരം, സ്ഥിരതയുള്ള ജീവിതോപാധി, കാലാവസ്ഥാ പ്രവർത്തനം, സാമൂഹിക വികസനം തുടങ്ങിയ മേഖലകളിൽ പ്രവർത്തിക്കുന്നു. നിലവിൽ ഇന്ത്യയിലെ 22 സംസ്ഥാനങ്ങളിലായി 7,200-ത്തിലധികം ഗ്രാമങ്ങളിലും നഗര വാർഡുകളിലും പ്രവർത്തനമുണ്ട്. ലക്ഷക്കണക്കിന് ആളുകളുടെ ജീവിതത്തിൽ ഇതിന്റെ പ്രവർത്തനങ്ങൾ സ്വാധീനം ചെലുത്തുന്നതായും ഫൗണ്ടേഷൻ പറഞ്ഞു.
Click it and Unblock the Notifications
Sign in with Google