ജയപ്രകാശ് അസോസിയേറ്റ്സിന് വമ്പന് ഓഫറുമായി അദാനി, ഉപാധികളില്ലാതെ 8000 കോടി! ലേലം അദാനി പിടിക്കുമോ?
ജയ്പ്രകാശ് അസോസിയേറ്റ്സിനെ ഏറ്റെടുക്കാനുള്ള ലേലത്തില് കോടികള് വാരിയെറിഞ്ഞ് ശതകോടീശ്വരനായ ഗൗതം അദാനിയുടെ നേതൃത്വത്തിലുള്ള അദാനി ഗ്രൂപ്പ്. ജയ്പ്രകാശ് അസോസിയേറ്റ്സിനെ ഏറ്റെടുക്കാനുള്ള ബിഡ് സമര്പ്പിച്ച സാധ്യതാ പട്ടികയില് അദാനി ഗ്രൂപ്പ്, വേദാന്ത, ജെഎസ്പിഎല് (നവീന് ജിന്ഡാല്), സുരക്ഷാ ഗ്രൂപ്പ്, ഡാല്മിയ ഭാരത്, പിഎന്സി ഇന്ഫ്രാടെക് എന്നിവ ഉള്പ്പെടുന്നു.
അടിസ്ഥാന സൗകര്യ, റിയല് എസ്റ്റേറ്റ് സ്ഥാപനമായ ജയ്പ്രകാശ് അസോസിയേറ്റ്സ് ലിമിറ്റഡ് സാമ്പത്തികമായി പ്രതിസന്ധിയിലായതോടെയാണ് ലേലത്തിന് വെച്ചത്. ലേലത്തില് ആറ് ഓഫറുകളാണ് വന്നത്. അദാനി ഗ്രൂപ്പിന്റെ ബിഡ് 12,500 കോടി രൂപയാണെന്ന് ബിസിനസ് സ്റ്റാന്ഡേര്ഡ് റിപ്പോര്ട്ട് ചെയ്യുന്നു. ജൂണ് 24 ചൊവ്വാഴ്ച സമര്പ്പിച്ച അദാനി ഗ്രൂപ്പിന്റെ ഏറ്റെടുക്കല് നിര്ദേശത്തില് മുഴുവന് കമ്പനിയെയും ഏറ്റെടുക്കാന് ലക്ഷ്യമിടുന്നു.
മുന്കൂര് ആയി 8,000 കോടി രൂപയില് കൂടുതല് നല്കാമെന്ന് വാഗ്ദാനം ചെയ്തുകൊണ്ട് അദാനി ശക്തമായ ഒരു ഓഫര് നല്കിയിട്ടുണ്ടെന്നും, അതും യാതൊരു നിബന്ധനകളും വെക്കാതെയാണെന്നും വൃത്തങ്ങള് പറഞ്ഞു. മൊത്തം ക്ലെയിമുകള് 57,185 കോടി രൂപയാണ്.
ഗ്രേറ്റര് നോയിഡയിലെ ജെപി ഗ്രീന്സ്, നോയിഡയിലെ വിഷ്ടൗണിന്റെ ഭാഗങ്ങള്, വരാനിരിക്കുന്ന ജെവാര് ഇന്റര്നാഷണല് എയര്പോര്ട്ടിന് സമീപം സ്ഥിതി ചെയ്യുന്ന ജെപി ഇന്റര്നാഷണല് സ്പോര്ട്സ് സിറ്റി എന്നിവയുള്പ്പെടെ ജെഎഎല്ലിന് നിരവധി സ്വത്തുക്കള് ഉണ്ട്. ഡല്ഹി-എന്സിആര്, ആഗ്ര, മുസ്സൂറി എന്നിവിടങ്ങളിലെ ഹോസ്പിറ്റാലിറ്റി സ്ഥാപനങ്ങളിലും ജെപി അസോസിയേറ്റ്സിന് ഓഹരിയുണ്ട്.
ഇത് കൂടാതെ ഉത്തര്പ്രദേശിലെയും മധ്യപ്രദേശിലെയും മൂന്ന് വാണിജ്യ പ്രോപ്പര്ട്ടികള്, നാല് നിഷ്ക്രിയ സിമന്റ് നിര്മ്മാണ സൗകര്യങ്ങള് എന്നിവയിലേക്കും അവരുടെ പ്രോപ്പര്ട്ടി പോര്ട്ട്ഫോളിയോ വ്യാപിച്ചിരിക്കുന്നു. എസ്ബിഐ ഉള്പ്പെടെയുള്ള 90% കടക്കാരില് നിന്നും മാര്ച്ചില് ജെഎഎല്ലിന്റെ 12,000 കോടി രൂപയുടെ കടം ഏറ്റെടുത്ത നാഷണല് അസറ്റ് റീകണ്സ്ട്രക്ഷന് കമ്പനി ലിമിറ്റഡ് (എന്എആര്സിഎല്) ആണ് പ്രാഥമിക അവകാശി.
അസറ്റ് കെയര് & റീകണ്സ്ട്രക്ഷന് എന്റര്പ്രൈസ് (എസിആര്ഇ), ആര്സില്, എസ്ബിഐയുടെയും ബാങ്ക് ഓഫ് ബറോഡയുടെയും വിദേശ വാണിജ്യ വായ്പക്കാര് എന്നിവരും ക്രെഡിറ്റര് പട്ടികയില് ഉള്പ്പെടുന്നു. കൊട്ടക് ആള്ട്ടര്നേറ്റ് അസറ്റ് മാനേജേഴ്സ്, ഒബറോയ് റിയാലിറ്റി എന്നിവയുള്പ്പെടെ ഏകദേശം ഇരുപത് സാധ്യതയുള്ള നിക്ഷേപകര് പ്രാരംഭ താല്പ്പര്യം പ്രകടിപ്പിച്ചെങ്കിലും അന്തിമ ബിഡുകള് സമര്പ്പിക്കേണ്ടെന്ന് തീരുമാനിച്ചതായാണ് റിപ്പോര്ട്ട്.
അതേസമയം സാധ്യമായ ഏറ്റവും മികച്ച പരിഹാരം തിരഞ്ഞെടുക്കുന്നതിനായി എല്ലാ ഓഫറുകളും ശ്രദ്ധാപൂര്വ്വം അവലോകനം ചെയ്തുവരികയാണെന്ന് ജയപ്രകാശ് അസോസിയേറ്റ്സ് പറഞ്ഞു ഇതുവരെ അന്തിമ തീരുമാനമെടുത്തിട്ടില്ലെങ്കിലും, അദാനി ഗ്രൂപ്പിന്റെ 12,500 കോടി രൂപയുടെ ഓഫര് നിലവില് ഏറ്റവും പ്രതീക്ഷ നല്കുന്നതാണെന്നും ലേല പ്രക്രിയയില് മറ്റുള്ളവരേക്കാള് മുന്നിലാണെന്നും വൃത്തങ്ങള് പറയുന്നു.
Click it and Unblock the Notifications
Sign in with Google