കുട്ടികള്ക്ക് വിമാനത്തില് സൗജന്യ ടിക്കറ്റില് പറക്കാം!
ദില്ലി: കുട്ടികള്ക്ക് വിമാനത്തില് പറക്കാന് സുവര്ണ്ണാവസരം.. നവംബര് 14 ശിശുദിനം പ്രമാണിച്ച് എയര് ഇന്ത്യ കുട്ടികള്ക്ക് ഗോള്ഡണ് ഓഫറുമായിട്ടാണ് രംഗത്തെത്തിയത്. സൗജന്യ ടിക്കറ്റില് കുട്ടികള്ക്ക് വിമാനത്തില് പറക്കാം. നറുക്കെടുപ്പില് വിജയിക്കുന്ന കുട്ടികള്ക്കാണ് വിമാന ടിക്കറ്റ് സൗജന്യമായി നല്കുന്നത്.
നറുക്കെടുപ്പില് ഒന്നാം സമ്മാനം നേടുന്ന കുട്ടിക്ക് നാല് എക്കണോമിക് ക്ലാസ് ടിക്കറ്റാണ് നല്കുക. ദില്ലിയില് നിന്നും സാന്ഫ്രാന്സിസ്കോയിലേക്കുള്ള വിമാനത്തിലാണ് യാത്ര ഒരുക്കിയിരിക്കുന്നത്. നാല് ടിക്കറ്റ് ലഭിക്കുന്ന കുട്ടിക്ക് കുടുംബത്തോടൊപ്പം വിമാനത്തില് പറക്കാം.
രണ്ടാം സമ്മാനം ലഭിക്കുന്ന കുട്ടിക്ക് ഡൊമസ്റ്റിക് സെക്ടറില് നാല് ടിക്കറ്റാണ് സൗജന്യമായി ലഭിക്കുക. മൂന്നാം സമ്മാനം ലഭിക്കുന്ന കുട്ടിക്ക് ഡൊമസ്റ്റിക് സെക്ടറില് നാല് അപ്ഗ്രേഡ് വൗച്ചറും ലഭിക്കും.
12 വയസിനു താഴെയുള്ള കുട്ടികള്ക്കാണ് ഈ ഭാഗ്യ ഓഫര് ലഭിക്കുക. ഡിസംബര് ആദ്യവാരം നറുക്കെടുപ്പ് നടക്കും. വിമാന യാത്രക്കാരെ ആകര്ഷിക്കാനാണ് എയര് ഇന്ത്യ ഇങ്ങനെയൊരു ഓഫറുമായി രംഗത്തെത്തിയത്.