മെയ് നാല് മുതൽ ആഭ്യന്തര സർവീസ്: ബുക്കിംഗ് തുടങ്ങി എയർ ഇന്ത്യ, നിർദേശം ഇങ്ങനെ...

Published: Saturday, April 18, 2020, 18:15 [IST]

ദില്ലി: മെയ് നാല് മുതൽ ബുക്കിംഗ് ആരംഭിക്കാൻ എയർ ഇന്ത്യ. മെയ് നാല് മുതൽ ആഭ്യന്തര സർവീസും ജൂൺ ഒന്ന് മുതൽ രാജ്യാന്തര റൂട്ടുകളിൽ സർവീസ് നടത്താനുമാണ് നീക്കം. മെയ് മൂന്നുവരെ ആഭ്യന്തര യാത്രകൾക്ക് ബുക്കിംഗ് സ്വീകരിക്കില്ലെന്ന് എയർ ഇന്ത്യ നേരത്തെ തന്നെ വ്യക്തമാക്കിയിരുന്നു. രാജ്യവ്യാപക ലോക്ക്ഡൌൺ മെയ് മൂന്ന് വരെ നീട്ടിയതിന് പിന്നാലെയാണ് പ്രഖ്യാപനം പുറത്തുവന്നത്. എന്നാൽ മെയ് 31 ന് ശേഷം മാത്രമായിരിക്കും എയർ ഇന്ത്യ രാജ്യാന്തര യാത്രകൾക്കുള്ള ബുക്കിംഗ് സ്വീകരിക്കുക. സാഹചര്യം കൃത്യമായി വിലയിരുത്തിയ ശേഷം കുടുതൽ വിവരങ്ങൾ അറിയിക്കാമെന്നാണ് എയർ ഇന്ത്യ വ്യക്തമാക്കിയത്.

എന്നാൽ കൊറോണ പ്രതിസന്ധി രൂക്ഷമായതോടെ എയർഇന്ത്യ ചരക്കുഗതാഗതത്തിന് രാജ്യത്തിനകത്തും രാജ്യാന്തര റൂട്ടുകളിലും എയർ ഇന്ത്യ സർവീസ് നടത്തിവരുന്നുണ്ട്. ഡിസംബർ മുതൽ ചൈന ഉൾപ്പെടെയുള്ള രാജ്യങ്ങളിലേക്കാണ് സർവീസ് നടത്തിവരുന്നത്. എയർ ഇന്ത്യയുടെ ബി- 787 വിമാനമാണ് ചൈനയിലെ ഗ്വാങ്സുവിലേക്ക് മരുന്നുകളെത്തിക്കുന്നതിനായി ശനിയാഴ്ച പുറപ്പെട്ടതെന്നാണ് എഎൻഐ റിപ്പോർട്ട് ചെയ്യുന്നത്. ബുധനാഴ്ച ഹോങ്കോങ്ങിൽ നിന്നും ഷാങ്ഹായിയിൽ നിന്നുമായി 170 ടൺ കൊവിഡ് 19 മരുന്നുകളും മെഡിക്കൽ ഉൽപ്പന്നങ്ങളുമാണ് എത്തിച്ചതെന്നും എയർ ഇന്ത്യ വ്യക്തമാക്കി.

നിലവിൽ ആഗോള തലത്തിലുള്ള ആരോഗ്യ പ്രതിസന്ധി കണക്കിലെടുത്ത് മെയ് മൂന്ന് വരെ ഞങ്ങൾ ആഭ്യന്തര വിമാന സർവീസുകളുടെ ബുക്കിംഗ് നിർത്തിവെച്ചിരിക്കുകയാണ്. രാജ്യാന്തര വിമാന സർവീസ് മെയ് 31 വരെയും നിർത്തലാക്കിയിട്ടുണ്ടെന്നാണ് എയർ ഇന്ത്യ വ്യക്തമാക്കിയത്. എന്നാൽ മെയ് 4 മുതൽ തിരഞ്ഞെടുക്കപ്പെടുന്ന ചില ആഭ്യന്തര റൂട്ടുകളിലും ജൂൺ ഒന്നിന് ശേഷം രാജ്യാന്തര റൂട്ടുകളിലും ബുക്കിംഗ് ആരംഭിക്കുമെന്നും എയർ ഇന്ത്യ വ്യക്തമാക്കി.

കൊറോണ വൈറസ് വ്യാപനം തടയുന്നതിനായി മാർച്ച് 25 മുതൽ രാജ്യത്ത് സമ്പൂർണ്ണ ലോക്ക് ഡൌൺ പ്രഖ്യാപിച്ചതോടെ എല്ലാ ആഭ്യന്തര- രാജ്യാന്തര വിമാന സർവീസുകളും നിർത്തലാക്കിയിരുന്നു. ഏപ്രിൽ 14ന് രാജ്യത്തെ അഭിസംബോധന ചെയ്ത് സംസാരിച്ച പ്രധാനമന്ത്രി നരേന്ദ്രമോദി രാജ്യം രണ്ടാം ഘട്ട ലോക്ക്ഡൌണിലേക്ക് പോകുകയാണെന്ന സന്ദേശമാണ് നൽകിയത്. ഇതോടെ രാജ്യത്തെ ലോക്ക് ഡൌൺ മെയ് മൂന്ന് വരെ നീട്ടുകയും ചെയ്യുകയായിരുന്നു. നിലവിൽ ചരക്ക് വിമാനങ്ങൾക്ക് മാത്രമാണ് സർവീസ് നടത്താൻ അനുമതിയുള്ളത്.