അമർനാഥ് യാത്ര; ഭക്തർക്ക് സുരക്ഷിതമായ തീർത്ഥാടനം ഉറപ്പ് വരുത്തി ബിഎസ്എഫ്: കൈയ്യടിച്ച് ജനം

ജമ്മു കശ്മീരിൽ നടന്നുകൊണ്ടിരിക്കുന്ന പ്രശസ്തമായ അമർനാഥ് യാത്രയിൽ ആയിരക്കണക്കിന് തീർഥാടകർക്ക് സുരക്ഷയും കരുതലും നൽകുന്നതില്‍ നിർണ്ണായക പങ്ക് വഹിച്ച് ബോർഡർ സെക്യൂരിറ്റി ഫോഴ്സ് (ബിഎസ്എഫ്). വൈദ്യസഹായം മുതൽ രക്ഷാപ്രവർത്തനങ്ങൾക്ക് വരെ ബി എസ് എഫ് സംഘങ്ങൾ ദുഷ്കരമായ കാലാവസ്ഥയിലും സജീവമായി പ്രവർത്തിച്ച് അനേകായിരങ്ങള്‍ക്ക് സുരക്ഷിതമായ തീർത്ഥാടനം ഉറപ്പ് വരുത്തുന്നു.

ഈ വർഷത്തെ അമർനാഥ് യാത്ര ജൂലൈ 3-നാണ് ആരംഭിച്ചത്. ഇതിനോടകം ഏകദേശം 1.75 ലക്ഷം പേർ അമർനാഥ് ഗുഹാക്ഷേത്രം സന്ദർശിച്ച് മടങ്ങി. എന്നാൽ, കുത്തനെയുള്ള കയറ്റം, തണുപ്പുള്ള കാലാവസ്ഥ, കുറഞ്ഞ ഓക്സിജൻ ലഭ്യത എന്നിവ മൂലം പല തീർഥാടകർക്കും തലകറക്കം, ക്ഷീണം, ശ്വാസതടസ്സം എന്നിവ അനുഭവപ്പെടുന്നുണ്ട്.

ബിഎസ്എഫ് വൈദ്യസഹായം

ഇത്തരം ആരോഗ്യപരമായ പ്രശ്നങ്ങള്‍ പരിഹരിക്കാൻ, പഹൽഗാം, ബാൾട്ടാൽ എന്നീ രണ്ട് പ്രധാന യാത്രാമാർഗങ്ങളിൽ ബി എസ് എഫ് പ്രത്യേക വൈദ്യസഹായസംഘങ്ങളെ വിന്യസിച്ചിട്ടുണ്ട്. അടിയന്തര സാഹചര്യങ്ങൾ കൈകാര്യം ചെയ്യാൻ പരിശീലനം ലഭിച്ച ഈ ടീമുകൾ ഓക്സിജൻ സിലിണ്ടറുകൾ, പ്രഥമശുശ്രൂഷ കിറ്റുകൾ, മറ്റ് വൈദ്യ ഉപകരണങ്ങൾ എന്നിവയുമായി ഏത് സാഹചര്യവും നേരിടാന്‍ തയ്യാറാണ്.

"ഞങ്ങൾ 24 മണിക്കൂറും തീർഥാടകരെ സഹായിക്കാൻ ഇവിടെയുണ്ട്. അവരുടെ സുരക്ഷയാണ് ഞങ്ങളുടെ മുൻഗണന," ബിഎസ്എഫ് വക്താവ് പറഞ്ഞു.

ബിഎസ്എഫിന്റെ വേഗത്തിലുള്ള ഇടപെടലിന്റെ ഫലമായി ശ്വസന പ്രശ്നങ്ങൾ ഉള്ള നിരവധി ആളുകൾക്ക് യഥാസമയം ഓക്സിജൻ പിന്തുണ ലഭിച്ചു. ഗുരുതരമായ കേസുകളിൽ, ആളുകളെ സുരക്ഷിതമായ സ്ഥലങ്ങളിലേക്ക് കൊണ്ടുപോകാനും ബി എസ് എഫ് ടീമുകൾ സഹായിച്ചു. ചില ആളുകളുടെ കൂടുതൽ ചികിത്സയ്ക്കായി ആശുപത്രിയിലേക്ക് മാറ്റുകയും ചെയ്തു.

ശുചിത്വം

യാത്രാമാർഗം വൃത്തിയായി സൂക്ഷിക്കുന്നതിനും ബിഎസ്എഫ് സഹായിക്കുന്നു. ഗ്രാമീണ ശുചിത്വ ഡയറക്ടറേറ്റിനൊപ്പം ചേർന്ന്, മൊബൈൽ ടോയ്‌ലറ്റുകൾ, മാലിന്യ ബിന്നുകൾ, കമ്പോസ്റ്റിംഗ് യൂണിറ്റുകൾ എന്നിവ ബി എസ് എഫ് വിവിധ ഇടങ്ങളില്‍ സ്ഥാപിച്ചിട്ടുണ്ട്.

തീർഥാടകരുടെ പ്രശംസ

നിരവധി തീർഥാടകർ ബിഎസ്എഫിന്റെ അർപ്പണ മനോഭാവത്തെ പ്രശംസിച്ചുകൊണ്ട് രംഗത്ത് വന്നിട്ടുണ്ട്. "മല കയറ്റം വളരെ ബുദ്ധിമുട്ടായിരുന്നു. ആളുകൾ ആരോഗ്യപ്രശ്നങ്ങള്‍ നേരിട്ടതിനെ തുടർന്ന് തളർന്ന് വീഴുന്നത് ഞാൻ കണ്ടു. പക്ഷേ, ബിഎസ്എഫ് എപ്പോഴും സഹായത്തിനായി തയ്യാറായിരുന്നു. അവർ ദൈവത്തിന്റെ ജോലിയാണ് ചെയ്യുന്നത്." ഉത്തർപ്രദേശിൽ നിന്നുള്ള സുനിത ദേവി പറഞ്ഞു. "ഞാൻ പല യാത്രകളും ചെയ്തിട്ടുണ്ട്, പക്ഷേ ഇത്ര മികച്ച വൈദ്യ, രക്ഷാസഹായം ഞാൻ മറ്റൊരിടത്തും കണ്ടിട്ടില്ല. ബിഎസ്എഫ് ഞങ്ങളെ പൂർണമായും സുരക്ഷിതരാക്കി." എന്ന് മഹാരാഷ്ട്രയിൽ നിന്നുള്ള രാജേഷ് മേത്തയും അഭിപ്രായപ്പെട്ടു.

കശ്മീർ താഴ്വരയിൽ ചെറിയ മഴ ഉണ്ടായിട്ടും, ബിഎസ്എഫിന്റെ അർപ്പണബോധത്താൽ യാത്ര പ്രശ്നങ്ങളില്ലാതെ മുന്നോട്ട് പോകുകയാണ്. ആയിരക്കണക്കിന് തീർഥാടകർക്ക് അവരുടെ ആത്മീയ യാത്ര സുരക്ഷിതമായി പൂർത്തിയാക്കാൻ ബിഎസ്എഫ് നിരന്തരം സഹായം ഉറപ്പ് വരുത്തുന്നു.