ആംഫോട്ടെറിസിന്‍ ബി ഇറക്കുമതി വർധിപ്പിക്കണം; കേന്ദ്രത്തോട് ദില്ലി ഹൈക്കോടതി

Updated: Friday, May 21, 2021, 10:13 [IST]

ദില്ലി; രാജ്യത്തുടനീളം ബ്ലാക്ക് ഫംഗസ് കേസുകള്‍ റിപ്പോര്‍ട്ട് ചെയ്യുന്ന പശ്ചാത്തലത്തിൽ ആന്റിഫംഗല്‍ മരുന്നായ ആംഫോട്ടെറിസിന്‍ ബി കൂടുതലായി ഇറക്കുമതി ചെയ്യണമെന്ന് കേന്ദ്രത്തോട് ദില്ലി ഹൈക്കോടതി. മരുന്നിന്റെ ആഭ്യന്തര ഉത്പാദനം ഇന്നത്തെ ആവശ്യകതയേക്കാൾ വളരെ കുറവാണെന്ന് കോടതി നിരീക്ഷിച്ചു. അതുകൊണ്ട് തന്നെ ഇവിടെ ഉത്പാദിപ്പിക്കുന്ന മരുന്നുകൾ പര്യാപ്തമാകുമോയെന്ന ആശങ്ക നിലനിൽക്കുന്നുണ്ടെന്നും കോടതി പറഞ്ഞു.

അടിയന്തരമായി മരുന്നുകൾ ലഭ്യമാക്കിയില്ലേങ്കിൽ നിരവധി പേരുടെ ജീവൻ നഷ്ടമാകുന്നതിന് കാരണമാകുമെന്ന് കോടതി പറഞ്ഞു. നിലവിലെ ഉൽപാദന ശേഷി വെളിപ്പെടുത്താൻ കേന്ദ്രത്തിന് കോടതി നിർദ്ദേശം നൽകി;.മരുന്ന് നിർമ്മിക്കാൻ ലൈസൻസുള്ള നിർമ്മാതാക്കളുടെ വിശദാംശങ്ങൾ, അവരുടെ നിലവിലെ ശേഷി, വർദ്ധിച്ച ശേഷി എന്നിവ അറിയിക്കാനും കോടതി പറഞ്ഞു. മാത്രമല്ല നിലവിൽ എത്ര രോഗികൾ ഉണ്ടെന്നും വരും ആരാഴ്ചകളിൽ രോഗം വർധിക്കുമോയെന്നത് ഉൾപ്പെടെയുള്ള വിവരങ്ങൾ നൽകാനും കോടതി ആവശ്യപ്പെട്ടു.

20,000 വയലുകൾ ഇന്ത്യയിലേക്ക് ഗിലെയാദ് അയക്കുമെന്നും അഞ്ച് പ്രാദേശിക നിർമ്മാതാക്കൾ കഴിഞ്ഞ 20 ദിവസത്തിനുള്ളിൽ ഉൽപാദനം ഇരട്ടിയാക്കിയതായും കേന്ദ്രം കോടതിയെ അറിയിച്ചു.നിലവിൽ വിഭവങ്ങൾ പരിമിതമാണെന്നും ഡൽഹി ഉൾപ്പെടെയുള്ള സംസ്ഥാനങ്ങൾക്ക് രോഗികളുടെ എണ്ണത്തിന് അനുസരിച്ചുള്ള വിഹിതം നൽകിയിട്ടുണ്ടെ്നും കേന്ദ്രം കോടതിയിൽ പറഞ്ഞു.

ബ്ലാക്ക് ഫംഗസ് ചികിത്സയ്ക്ക് ആവശ്യമായ പ്രാഥമിക മരുന്നാണ് ആംഫോട്ടെറിസിന്‍ ബി. സാധരണ സമയങ്ങളില്‍ ആവശ്യകത കുറവായിരുന്നിന് ബ്ലാക്ക് ഫംഗസ് വ്യാപനത്തിന്റെ പശ്ചാത്തലത്തില്‍ വലിയ തോതില്‍ ആവശ്യകത വര്‍ദ്ധിച്ചിരിക്കുകയാണ്.