കെജിഎഫിനെ വെല്ലാൻ ആന്ധ്രയിലെ ജോന്നഗിരി; വമ്പൻ സ്വർണ്ണ നിക്ഷേപം കണ്ടെത്തി, ഖനനം ഉടൻ ആരംഭിക്കും

ഇന്ത്യയിലെ സ്വർണ്ണ വിപണിയിലും ആഭ്യന്തര ഉത്പാദനത്തിലും വലിയ വിപ്ലവത്തിന് വഴിതുറന്നുകൊണ്ട് ആന്ധ്രാപ്രദേശ് രാജ്യത്തെ ഏറ്റവും വലിയ സ്വർണ്ണ ഉത്പാദകരായി മാറാനൊരുങ്ങുന്നു. കുർണൂൽ ജില്ലയിലെ ജോന്നഗിരി ഗ്രാമത്തിൽ മാത്രം ഏകദേശം 50 ടൺ സ്വർണ്ണ നിക്ഷേപമുണ്ടെന്നാണ് ഖനന വകുപ്പിന്റെ ഏറ്റവും പുതിയ കണക്കുകൾ വ്യക്തമാക്കുന്നത്. ഏതാനും വർഷങ്ങൾക്കുള്ളിൽ ഇന്ത്യയിൽ ഏറ്റവും കൂടുതൽ സ്വർണ്ണം ഉത്പാദിപ്പിക്കുന്ന സംസ്ഥാനമായി ആന്ധ്ര മാറുമെന്ന് ഖനന വകുപ്പ് പ്രിൻസിപ്പൽ സെക്രട്ടറി മുകേഷ് കുമാർ മീന വാർത്താ സമ്മേളനത്തിൽ അറിയിച്ചു. ജോന്നഗിരിക്ക് പുറമെ രാമഗിരി, ജവ്വകുല, ചിഗുരുകുണ്ഡ ബിസ്നാഥം തുടങ്ങി സ്വർണ്ണ ഖനനത്തിന് വലിയ സാധ്യതയുള്ള മറ്റ് നാല് പ്രദേശങ്ങൾ കൂടി സംസ്ഥാന സർക്കാർ തിരിച്ചറിഞ്ഞിട്ടുണ്ട്.

ജോന്നഗിരിയിലെ സ്വർണ്ണ ഖനനം

ജോന്നഗിരിയിൽ ഇതിനകം തന്നെ വാണിജ്യാടിസ്ഥാനത്തിലുള്ള സ്വർണ്ണ ഉത്പാദനം ആരംഭിച്ചിട്ടുണ്ട്. ഏകദേശം പത്ത് വർഷങ്ങൾക്ക് മുൻപാണ് ഈ ഗ്രാമത്തിൽ സ്വർണ്ണ ഖനനത്തിനായി 1,500 ഏക്കർ ഭൂമി അനുവദിച്ചത്. എന്നാൽ ഇതിൽ 500 ഏക്കറിൽ മാത്രമാണ് നിലവിൽ കൃത്യമായ പര്യവേക്ഷണം നടന്നിട്ടുള്ളത്. ഈ കുറഞ്ഞ പ്രദേശത്തുനിന്ന് തന്നെ 13 ടൺ സ്വർണ്ണം ലഭിക്കുമെന്നാണ് കണ്ടെത്തിയിരിക്കുന്നത്. ബാക്കിയുള്ള 1,000 ഏക്കർ ഭൂമിയിൽ കൂടി ഖനന പര്യവേക്ഷണം ഉടൻ ആരംഭിക്കും. ഇതും കൂടി പൂർത്തിയാകുന്നതോടെ ജോന്നഗിരിയിൽ നിന്ന് മാത്രം മൊത്തം 50 ടൺ സ്വർണ്ണം വിപണിയിലേക്ക് എത്തിക്കാൻ സാധിക്കുമെന്നാണ് സർക്കാർ കണക്കുകൂട്ടുന്നത്.

സ്വകാര്യ പങ്കാളിത്തവും വെല്ലുവിളികളും

ഏറ്റവും പുതിയ സാങ്കേതികവിദ്യയും വൻതോതിലുള്ള നിക്ഷേപവും ആവശ്യമായ ഒരു മേഖലയായതുകൊണ്ടാണ് ടെൻഡറുകളിലൂടെ സ്വർണ്ണ ഖനനം സ്വകാര്യ കമ്പനികൾക്ക് കൈമാറാൻ സർക്കാർ തീരുമാനിച്ചതെന്ന് മുകേഷ് കുമാർ മീന വ്യക്തമാക്കി. വർഷങ്ങൾ കഴിയുംതോറും ഖനികളിൽ നിന്ന് സ്വർണ്ണം വേർതിരിച്ചെടുക്കുന്നതിന്റെ അളവ് വലിയ രീതിയിൽ കുറഞ്ഞുവരുന്നത് ഈ മേഖല നേരിടുന്ന പ്രധാന വെല്ലുവിളിയാണ്. മുൻപ് ഒരു ടൺ ഖനന അവശിഷ്ടങ്ങൾ പ്രോസസ്സ് ചെയ്യുമ്പോൾ മൂന്ന് ഗ്രാം വരെ സ്വർണ്ണം ലഭിച്ചിരുന്നു. ഇപ്പോൾ സാങ്കേതികവിദ്യ ഇത്രയും വികസിച്ചിട്ടും ഒരു ടൺ അസംസ്കൃത വസ്തുവിൽ നിന്ന് കഷ്ടിച്ച് ഒരു ഗ്രാം സ്വർണ്ണം മാത്രമാണ് വേർതിരിച്ചെടുക്കാൻ സാധിക്കുന്നത്. ഒരു ടണ്ണിൽ നിന്ന് ലഭിക്കുന്ന സ്വർണ്ണത്തിന്റെ അളവ് 0.8 ഗ്രാമിലും താഴേക്ക് പോയാൽ ആ ഖനനം സാമ്പത്തികമായി ലാഭകരമാകില്ലെന്നും അദ്ദേഹം ചൂണ്ടിക്കാണിച്ചു.

ഈ മാസം അവസാനത്തോടെ ആന്ധ്രാപ്രദേശ് മുഖ്യമന്ത്രി എൻ. ചന്ദ്രബാബു നായിഡു ജോന്നഗിരി സ്വർണ്ണ ഖനന പദ്ധതി ഔദ്യോഗികമായി ഉദ്ഘാടനം ചെയ്യും. പദ്ധതി പൂർണ്ണതോതിൽ സജ്ജമാകുന്നതോടെ ഇന്ത്യയുടെ സ്വർണ്ണ ഇറക്കുമതി ആശ്രയത്വം വലിയ രീതിയിൽ കുറയ്ക്കാൻ സാധിക്കുമെന്നാണ് കരുതുന്നത്.