മോദിയുടെ വെല്ലുവിളി ഏറ്റെടുക്കാന് അംബാനി തയ്യാര്
മുംബൈ: ക്രിക്കറ്റ് - സിനിമാ താരങ്ങള്ക്ക് പിന്നാലെ വ്യവസായ പ്രമുഖന് അനില് അംബാനിയും നരേന്ദ്ര മോദിയുടെ വെല്ലുവിളി ഏറ്റെടുത്തു. ക്ലീന് ഇന്ത്യ ക്യാംപെയ്ന്റെ ഭാഗമായാണ് മോദി അനില് അംബാനിയെ വെല്ലുവിളിച്ചത്. വെല്ലുവിളി സന്തോഷെത്തോടെ ഏറ്റെടുത്ത അംബാനി ബുധനാഴ്ച രാവിലെയാണ് വെല്ലുവിളി ഏറ്റെടുത്ത് മുംബൈയില് ക്ലീനിംഗ് പരിപാടിക്ക് ഇറങ്ങിയത്.
വെല്ലുവിളി ഏറ്റെടുക്കുക മാത്രമല്ല, സ്വച്ഛ് ഭാരത് അഭിയാന് വിജയിപ്പിക്കാനായി ഒമ്പത് പേരെ അംബാനി നോമിനേറ്റ് ചെയ്യുകയും ചെയ്തു. ബോളിവുഡ് നടന്മാരായ അമിതാഭ് ബച്ചന്, ഹൃതിക് റോഷന്, ബോക്സിംഗ് താരം മേരി കോം, തെലുങ്ക് നടന് നാഗാര്ജുന, ടെന്നീസ് താരം സാനിയ മിര്സ, എഴുത്തുകാരായ ശോഭ ഡേ, ശേഖര് ഗുപ്ത, പ്രസൂണ് ജോഷി എന്നിവരെയാണ് അംബാനി ചാലഞ്ച് ചെയ്തിരിക്കുന്നത്.
സ്വച്ഛ് ഭാരത് അഭിയാന്റെ ഭാഗമാകാന് കഴിയുന്നതില് അഭിമാനമുണ്ടെന്ന് അംബാനി പറഞ്ഞു. തന്റെ വെല്ലുവിളി ഏറ്റെത്ത അനില് അംബാനിയെ നരേന്ദ്ര മോദി ട്വിറ്ററിലൂടെ പ്രശംസിച്ചു. ഒക്ടോബര് രണ്ടിനാണ് 2019 ല് ഇന്ത്യ മാലിന്യമുക്തമാക്കാന് ലക്ഷ്യം വെച്ചുകൊണ്ട് നരേന്ദ്ര മോദി സര്ക്കാര് സ്വച്ഛ് ഭാരത് അഭിയാന് ക്യാംപെയ്ന് തുടങ്ങിയത്.
ക്രിക്കറ്റ് ഇതാഹാസമായ സച്ചിന് തെണ്ടുല്ക്കര്, ഉലകനായകന് കമല് ഹാസന്, ബോളിവുഡ് നായികയും ഓണ് സ്്ക്രീന് മേരി കോമുമായ പ്രിയങ്ക ചോപ്ര, ബോളിവുഡിന്റെ മസില്മാന് സല്മാന് ഖാന്, കോണ്ഗ്രസ് എം പി ശശി തരൂര് തുടങ്ങിയ പ്രമുഖര് മോദിയുടെ വെല്ലുവിളി ഏറ്റെടുത്തു. കേരളത്തില് മമ്മൂട്ടിയാണ് ക്ലീന് ഇന്ത്യ ക്യാംപെയ്നിനെ പിന്തുണക്കുന്നവരില് പ്രമുഖന്.