പുതിയ സമരത്തിലേക്ക് അണ്ണാ ഹസാരെ കെജ് രിവാളിനെ ക്ഷണിച്ചു

ദില്ലി: കേന്ദ്ര സര്‍ക്കാരിനെതിരെ നടത്താനിരിക്കുന്ന പുതിയ സമരത്തിലേക്ക് ഗാന്ധിയന്‍ അണ്ണാ ഹസാരെ തന്റെ പഴയ അനുയായിയും ദില്ലി മുഖ്യമന്ത്രിയുമായ അരവിന്ദ് കെജ് രിവാളിനെ ക്ഷണിച്ചു. ഭൂമിയേറ്റെടുക്കല്‍ നിയമത്തില്‍ കേന്ദ്ര സര്‍ക്കാര്‍ ഭേദഗതി കൊണ്ടുവരാന്‍ പോകുന്നതിനെതിരെയാണ് അണ്ണാ ഹസാരെയുടെ നിരാഹാര സമരം.

സമരവുമായി ബന്ധപ്പെട്ട് ഒരു മാധ്യമത്തിന് നല്‍കിയ അഭിമുഖത്തില്‍ കെജ് രിവാള്‍ തന്റെ സമരത്തില്‍ അണിനിരക്കുന്നതില്‍ സന്തോഷമുണ്ടാക്കുന്ന കാര്യമാണെന്ന് അദ്ദേഹം പറഞ്ഞു. അണ്ണാ ഹസാരെയുമായി ചേര്‍ന്ന് അഴിമതിക്കെതിരെ പോരാടി കെജ് രിവാള്‍ പാര്‍ട്ടി രൂപീകരിക്കാന്‍ തീരുമാനിച്ചതോടെ ഹസാരെയുമായി അകലുകയായിരുന്നു.

രാഷ്ട്രീയ പാര്‍ട്ടി രൂപീകരിക്കരുതെന്നായിരുന്നു ഹസാരെയുടെ നിര്‍ദ്ദേശം. എന്നാല്‍ മറ്റൊരു അനുയായിയായിരുന്ന കിരണ്‍ ബേദിക്കൊപ്പം കെജ് രിവാള്‍ ഹസാരെയുടെ മൂവ്‌മെന്റില്‍ നിന്നും വിട്ടുപോവുകയായിരുന്നു. പിന്നീട് ആം ആദ്മി പാര്‍ട്ടി എന്ന പേരില്‍ രാഷ്ട്രീയ പാര്‍ട്ടി രൂപീകരിക്കുകയും ചെയ്തു. എന്നാല്‍ പാര്‍ട്ടിയുമായി ഒരുതരത്തിലും സഹകരിക്കാന്‍ ഹസാരെ ഇതുവരെ തയ്യാറായിരുന്നില്ല.

നിയമസഭാ തെരഞ്ഞെടുപ്പില്‍ അത്ഭുതപ്പെടുത്തുന്ന വിജയത്തോടെ ദില്ലിയില്‍ കെജ് രിവാള്‍ അധികാരത്തിലെത്തിയതോടെയാണ് ഹസാരെ കെജ് രിവാളുമായി അടുക്കാനുള്ള താത്പര്യം കാണിച്ചിരിക്കുന്നത്. എന്നാല്‍ ഹസാരെയുടെ സമരത്തില്‍ കെജ് രിവാള്‍ പങ്കെടുക്കുമോ എന്ന കാര്യത്തില്‍ വ്യക്തതയില്ല.

English summary

Anna Hazare Welcomes Arvind Kejriwal on Stage