അണ്ണാമലൈ പുതിയ ഇന്നിങ്സിന്; രജനികാന്ത് പിന്തുണക്കുമോ? തമിഴ്നാട്ടില് പുതിയ പാര്ട്ടി
ബി.ജെ.പി വിട്ട അണ്ണാമലൈ ഏതാനും മാസങ്ങൾക്കുള്ളിൽ പുതിയ പാർട്ടി രൂപീകരിക്കാൻ ഒരുങ്ങുന്നതായാണ് റിപ്പോർട്ടുകൾ. ഈ സാഹചര്യത്തിൽ, നടൻ രജനികാന്ത് അണ്ണാമലൈക്ക് പിന്തുണ നൽകുമോയെന്ന ചർച്ചകൾ തമിഴ്നാട് രാഷ്ട്രീയത്തിൽ സജീവമാണ്. ഡല്ഹിയിലെത്തി ഉന്നത നേതാക്കളെ കണ്ട ശേഷമാണ് അണ്ണാമലൈ ബിജെപി വിട്ടത്.
2026 ലെ നിയമസഭാ തിരഞ്ഞെടുപ്പിൽ വിജയ്യുടെ ടി.വി.കെ. പാർട്ടി നേടിയ ഉജ്ജ്വല വിജയം പലരെയും അണ്ണാമലൈയുടെ രാഷ്ട്രീയ നീക്കത്തിലേക്ക് ശ്രദ്ധിക്കാൻ പ്രേരിപ്പിക്കുന്നുണ്ട്. കേവലം രണ്ട് വർഷം കൊണ്ട് പാർട്ടി രൂപീകരിച്ച് വിജയ് അധികാരത്തിലെത്തിയപ്പോൾ, അണ്ണാമലൈയുടെ പെട്ടെന്നുള്ള ഈ നീക്കവും രജനികാന്തുമായുള്ള അദ്ദേഹത്തിന്റെ ദീർഘകാല അടുപ്പവും വലിയ ആകാംഷയാണ് ഉയർത്തുന്നത്.
രാഷ്ട്രീയത്തിലേക്ക് പ്രവേശിക്കുന്നതിന് മുൻപേ തന്നെ രജനികാന്തിന്റെ കടുത്ത ആരാധകനും അദ്ദേഹത്തെ വഴികാട്ടിയായി കാണുന്ന വ്യക്തിയുമാണ് അണ്ണാമലൈ. രജനികാന്ത് തനിക്ക് ആത്മീയവും യോഗയും രാഷ്ട്രീയവും ഉൾപ്പെടെയുള്ള വിഷയങ്ങളിൽ ഒരു ഗുരുവിനെ പോലെ നല്ല ഉപദേശങ്ങൾ നൽകാറുണ്ടെന്ന് അണ്ണാമലൈ അടുത്തിടെ മാധ്യമങ്ങളോട് തുറന്നുപറഞ്ഞിരുന്നു. എല്ലാ മാസവും ഒന്നോ രണ്ടോ തവണ താൻ രജനികാന്തിനെ രഹസ്യമായോ നേരിട്ടോ കാണാറുണ്ടെന്നും അദ്ദേഹം വെളിപ്പെടുത്തി.
ഐ.പി.എസ് പദവി രാജിവെച്ച ആദ്യഘട്ടത്തിൽ, രജനികാന്ത് സ്വന്തം പാർട്ടി പ്രഖ്യാപിക്കുകയാണെങ്കിൽ അതിൽ ചേരാൻ അണ്ണാമലൈ കാത്തിരിക്കുകയായിരുന്നു. രജനികാന്ത് ആ തീരുമാനത്തിൽ നിന്ന് പിന്മാറിയ ശേഷമാണ് അണ്ണാമലൈ ബി.ജെ.പിയിൽ ചേർന്നത്.
രജനികാന്ത് അന്ന് മുന്നോട്ടുവെച്ച "ആത്മീയ രാഷ്ട്രീയം", "സിസ്റ്റം മാറ്റം" തുടങ്ങിയ മുദ്രാവാക്യങ്ങൾ അണ്ണാമലൈ ഏറ്റെടുക്കാൻ സാധ്യതയുണ്ടെന്നാണ് വിലയിരുത്തൽ. അതുകൊണ്ടുതന്നെ രജനികാന്തിന്റെ അനുഗ്രഹം അണ്ണാമലൈക്ക് തീർച്ചയായും ഉണ്ടാകുമെന്ന് അദ്ദേഹത്തിന്റെ അനുയായികൾ ഉറച്ചുവിശ്വസിക്കുന്നു.
രജനികാന്ത് വ്യക്തിപരമായി അണ്ണാമലൈയെ അഭിനന്ദിക്കുകയും ആശംസകൾ അറിയിക്കുകയും ചെയ്തിട്ടുണ്ടെങ്കിലും, അദ്ദേഹത്തിന്റെ പാർട്ടിയെ നേരിട്ട് പിന്തുണയ്ക്കാൻ സാധ്യതയില്ല. നിലവിൽ സ്റ്റാലിനുമായും ഡി.എം.കെ.യുമായുമുള്ള സൗഹൃദം കാരണം നേരിട്ട് അണ്ണാമലൈയെ പിന്തുണയ്ക്കുന്നത് രജനികാന്തിന് വെല്ലുവിളികൾ സൃഷ്ടിച്ചേക്കാം.
എങ്കിലും, രജനികാന്തിന്റെ ഫാൻസ് അസോസിയേഷൻ ഭാരവാഹികൾക്ക് അണ്ണാമലൈയെ പിന്തുണയ്ക്കാൻ നിർദ്ദേശം നൽകാൻ സാധ്യതയുണ്ടെന്നും ചില റിപ്പോർട്ടുകൾ സൂചിപ്പിക്കുന്നു. ഡൽഹിയിൽ നിന്ന് ചെന്നൈയിലേക്ക് മടങ്ങിയെത്തിയ ശേഷം അണ്ണാമലൈ രജനികാന്തിനെ സന്ദർശിക്കുമെന്നും വിവരമുണ്ട്. ഇത് തമിഴ്നാട് രാഷ്ട്രീയത്തിൽ വീണ്ടും ചൂടേറിയ ചർച്ചകൾക്ക് വഴിയൊരുക്കിയിരിക്കുകയാണ്.
അണ്ണാമലൈ ബിജെപി നേതൃത്വവുമായി സംസാരിച്ച ശേഷമാണ് പാര്ട്ടി വിട്ടത് എന്നതാണ് എടുത്തുപറയേണ്ടത്. അതുകൊണ്ടുതന്നെ പുതിയ പാര്ട്ടി രൂപീകരിച്ചാലും ഏത് സമയവും ബിജെപിയുമായി സഹകരിക്കാനുള്ള സാധ്യത തള്ളാനാകില്ല. ബിജെപിക്ക് തിരഞ്ഞെടുപ്പില് തിളങ്ങാന് സാധിക്കാത്ത സംസ്ഥാനമാണ് തമിഴ്നാട്. ഈ വേളയില് പാര്ട്ടി പുതിയ വഴി സ്വീകരിക്കുകയാണോ എന്ന ചര്ച്ചകളും സോഷ്യല് മീഡിയയില് സജീവമാണ്.
Click it and Unblock the Notifications
Sign in with Google