ഗോലി മാരോ പരാമര്‍ശം നടത്തിയിട്ടേയില്ല... നിങ്ങള്‍ നുണ പറയുകയാണ്, നിഷേധിച്ച് അനുരാഗ് താക്കൂര്‍!!!!

ദില്ലി: ദേശദ്രോഹികളെ വെടിവെച്ച് കൊല്ലണമെന്ന മുദ്രാവാക്യം താന്‍ വിളിച്ചിട്ടില്ലെന്ന് കേന്ദ്ര മന്ത്രി അനുരാഗ് താക്കൂര്‍. ഇത്തരം ചോദ്യങ്ങള്‍ ഉന്നയിച്ച മാധ്യമപ്രവര്‍ത്തകരെ അദ്ദേഹം ശാസിക്കുകയും ചെയ്തു. മാധ്യമപ്രവര്‍ത്തകര്‍ എന്റെ വകുപ്പുമായി ബന്ധപ്പെട്ട കാര്യങ്ങള്‍ മാത്രം ചോദിച്ചാല്‍ മതിയെന്നായിരുന്നു താക്കൂറിന്റെ മുന്നറിയിപ്പ്. സമ്പദ് ഘടനയുമായി ബന്ധപ്പെട്ട ചോദ്യങ്ങളുണ്ടെങ്കിലും നിങ്ങള്‍ ചോദിക്കൂ. ഇത് ഒരു മന്ത്രാലയവുമായി ബന്ധപ്പെട്ട വാര്‍ത്താസമ്മേളനമാണെന്ന് താക്കൂര്‍ പറഞ്ഞു.

ചണ്ഡീഗഡില്‍ നടത്തിയ വാര്‍ത്താസമ്മേളനത്തിലാണ് അദ്ദേഹം മാധ്യമപ്രവര്‍ത്തകരോട് കയര്‍ത്ത് സംസാരിച്ചത്. ആദായ നികുതി വകുപ്പ് വ്യാപാര സംഘടനകളുമായും വ്യാപാരികളുമായും ചേര്‍ന്ന് സംഘടിപ്പിച്ച ചടങ്ങില്‍ പങ്കെടുത്ത ശേഷമാണ് അദ്ദേഹം വാര്‍ത്താസമ്മേളനത്തില്‍ എത്തിയത്. ഇതിനിടെയാണ് ദില്ലിയിലെ തിരഞ്ഞെടുപ്പ് പ്രചാരണ സമയത്ത് അനുരാഗ് താക്കൂറിന്റെ റാലിയില്‍ ഉയര്‍ന്ന് കേട്ട ഗോലി മാരോ ദേശ് കി ഗദ്ദാരോ കോ എന്ന മുദ്രാവാക്യത്തെ കുറിച്ച് മാധ്യമപ്രവര്‍ത്തകര്‍ ചോദിച്ചത്.

ഞാന്‍ എന്താണ് പറഞ്ഞത്. നിങ്ങള്‍ വെറും നുണയാണ് പറയുന്നത്. ഇതുകൊണ്ടാണ് മാധ്യമങ്ങള്‍ പല കാര്യങ്ങളും അറിയില്ലെന്ന് പറയുന്നത്. നിങ്ങള്‍ സ്വന്തം നിലവാരം ഉയര്‍ത്തണമെന്നും താക്കൂര്‍ ആവശ്യപ്പെട്ടു. ഈ വിഷയത്തില്‍ താന്‍ കൂടുതല്‍ കാര്യങ്ങള്‍ പറയാനില്ലെന്നും, അത് കോടതിയലക്ഷ്യമാകുമെന്നും താക്കൂര്‍ പറഞ്ഞു. അര്‍ധ സത്യങ്ങള്‍ അപകടകരമാണ്. അതുകൊണ്ട് പറഞ്ഞ കാര്യങ്ങള്‍ എന്തൊക്കെയാണെന്ന് നിങ്ങള്‍ മനസ്സിലാക്കണമെന്നും താക്കൂര്‍ ആവശ്യപ്പെട്ടു.

ഇപ്പോള്‍ മാധ്യമപ്രവര്‍ത്തകര്‍ ഉന്നയിച്ച കാര്യങ്ങള്‍ എല്ലാം നുണയാണെന്ന് താക്കൂര്‍ ആവര്‍ത്തിച്ചു. അതേസമയം ദില്ലിയില്‍ കലാപമുണ്ടാക്കാന്‍ പ്രേരിപ്പിച്ചവരെ അറസ്റ്റ് ചെയ്യണമെന്നും കേന്ദ്ര മന്ത്രി ആവശ്യപ്പെട്ടു. എന്ത് വ്യക്തതയാണ് ഇതില്‍ കൂടുതല്‍ നിങ്ങള്‍ക്ക് വേണ്ടത്. കലാപം ആളിക്കത്തിക്കാന്‍ ശ്രമിച്ചവര്‍ക്കും, അതില്‍ പങ്കെടുത്തവര്‍ക്കുമെതിരെ ശക്തമായി നടപടി ഉണ്ടാവണമെന്നും താക്കൂര്‍ പറഞ്ഞു. ജനുവരി 27ന് നടന്ന റാലിയിലാണ് ദേശദ്രോഹികളെ വെടിവെച്ച് കൊല്ലണമെന്ന മുദ്രാവാക്യം ഉയര്‍ന്നത്.

English summary

anurag thakur denies raising provocative slogan