നോർത്ത് ക്വീൻസ്‌ലാൻഡ് എക്സ്പോർട്ട് ടെർമിനൽ ഏറ്റെടുത്ത് അദാനി പോർട്ട്സ് & സ്പെഷ്യൽ എക്കണോമിക് സോൺ ലിമിറ്റഡ്

അദാനി പോർട്ട്സ് ആൻഡ് സ്പെഷ്യൽ എക്കണോമിക് സോൺ ലിമിറ്റഡ് (APSEZ) ഓസ്‌ട്രേലിയയിലെ നോർത്ത് ക്വീൻസ്‌ലാൻഡ് എക്സ്പോർട്ട് ടെർമിനൽ (NQXT) ഏറ്റെടുക്കൽ പൂർത്തിയാക്കി. 2030-ഓടെ പ്രതിവർഷം ഒരു ബില്യൺ ടൺ ചരക്ക് കൈകാര്യം ചെയ്യുക എന്ന APSEZ-ന്റെ ലക്ഷ്യം സാക്ഷാത്കരിക്കുന്നതിൽ ഈ നീക്കം നിർണായകമാണ്.

ഈ ഏറ്റെടുക്കലിലൂടെ APSEZ-ന്റെ കിഴക്ക്-പടിഞ്ഞാറ് വ്യാപാര ഇടനാഴിയിലെ അന്താരാഷ്ട്ര സാന്നിധ്യം വർധിച്ചു. NQXT-യുടെ 50 MTP (ദശലക്ഷം ടൺ പ്രതിവർഷം) ശേഷിയും നോർത്ത് ക്വീൻസ്‌ലാൻഡിലെ ദീർഘകാല പാട്ടക്കരാറും APSEZ-ന് കൂടുതൽ സഹായകമാകും.

കമ്പനി നൽകുന്ന പ്രൊഫോർമ കണക്കുകൾ അനുസരിച്ച്, 2026 സാമ്പത്തിക വർഷത്തിലെ EBITDA (പലിശ, നികുതി, മൂല്യത്തകർച്ച, അമോർട്ടൈസേഷൻ എന്നിവക്ക് മുൻപുള്ള വരുമാനം) ₹21,000-22,000 കോടിയിൽ നിന്ന് ₹22,350-23,350 കോടിയായി ഉയരുമെന്ന് പ്രതീക്ഷിക്കുന്നു. ചരക്ക് കൈകാര്യം ചെയ്യുന്ന അളവ് 505-515 എംഎംടിയിൽ നിന്ന് 545-555 എംഎംടി ആയി വർധിക്കുമെന്നും കണക്കാക്കുന്നു. 2030-ഓടെ ഒരു ബില്യൺ ടൺ ചരക്ക് കൈകാര്യം ചെയ്യാനുള്ള ലക്ഷ്യത്തിലേക്കാണ് APSEZ ഇതുവഴി മുന്നേറുന്നത്.

ഇന്ത്യയിലെ ഏറ്റവും വലിയ സംയോജിത ഗതാഗത യൂട്ടിലിറ്റിയായ APSEZ, NQXT ഓസ്ട്രേലിയയുടെ 100% ഓഹരിയും ഏറ്റെടുത്തതായി പ്രഖ്യാപിച്ചു. ഭൂരിപക്ഷം ഓഹരി ഉടമകളുടെയും റിസർവ് ബാങ്ക് ഓഫ് ഇന്ത്യയുടെയും ഓസ്‌ട്രേലിയയിലെ ഫോറിൻ ഇൻവെസ്റ്റ്‌മെന്റ് റിവ്യൂ ബോർഡിന്റെയും ഉൾപ്പെടെയുള്ള വിവിധ അംഗീകാരങ്ങൾ നേടിയ ശേഷമാണ് ഈ നടപടി.

കാർമിക്കൽ റെയിൽ ആൻഡ് പോർട്ട് സിംഗപ്പൂർ ഹോൾഡിംഗ്സ് ലിമിറ്റഡിന് മുൻഗണനാ അടിസ്ഥാനത്തിൽ APSEZ 14,38,20,153 ഇക്വിറ്റി ഷെയറുകൾ, ഒരു ഷെയറിന് ₹2 രൂപ മുഖവിലയിൽ അനുവദിച്ചു. ഈ തന്ത്രപരമായ മുന്നേറ്റം മേഖലയിലെ APSEZ-ന്റെ സ്വാധീനം വർദ്ധിപ്പിക്കുന്നു.

"2030-ഓടെ ഒരു ബില്യൺ മെട്രിക് ടൺ ചരക്ക് കൈകാര്യം ചെയ്യുക എന്ന APSEZ-ന്റെ വളർച്ചാ പാതയിലെ ഒരു സുപ്രധാന നാഴികക്കല്ലാണ് NQXT ഏറ്റെടുക്കൽ പൂർത്തിയാക്കിയത്," APSEZ-ന്റെ മുഴുവൻ സമയ ഡയറക്ടറും സിഇഒയുമായ അശ്വനി ഗുപ്ത അഭിപ്രായപ്പെട്ടു.

NQXT-ക്ക് വ്യക്തമായ ഭൂമിശാസ്ത്രപരമായ മേന്മകളും ശക്തമായ വളർച്ചാ സാധ്യതകളും മികച്ച സുസ്ഥിരതാ രേഖകളുമുണ്ടെന്ന് അദ്ദേഹം ചൂണ്ടിക്കാട്ടി. "ഇസ്രായേൽ, കൊളംബോ, ടാൻസാനിയ എന്നിവിടങ്ങളിലെ ഞങ്ങളുടെ മറ്റ് അന്താരാഷ്ട്ര തുറമുഖങ്ങൾക്കൊപ്പം NQXT, East-West വ്യാപാര ഇടനാഴിയിലെ ഞങ്ങളുടെ സാന്നിധ്യം ശക്തിപ്പെടുത്തും."

"NQXT-യെ APSEZ കുടുംബത്തിലേക്ക് സ്വാഗതം ചെയ്യുന്നതിൽ ഞാൻ അതീവ സന്തുഷ്ടനാണ്, ആഗോള വ്യാപാര രംഗത്ത് ഞങ്ങളുടെ സ്വാധീനം വർധിപ്പിക്കാൻ ഇത് സഹായിക്കുമെന്ന് കരുതുന്നു," ശ്രീ ഗുപ്ത കൂട്ടിച്ചേർത്തു.

ഉയർന്ന വളർച്ചയും പണമുണ്ടാക്കുന്നതുമായ ആസ്തിയാണ് NQXT. പ്രധാനമായും ഉപഭോക്താക്കളുമായുള്ള 'ടേക്ക്-ഓർ-പേ' കരാറുകളാണ് ഇതിന് ആധാരം. 2024-25 സാമ്പത്തിക വർഷത്തിൽ 40 ദശലക്ഷം ടൺ കരാർ ശേഷിയുണ്ടായിരുന്ന NQXT, പ്രൊഫോർമ അടിസ്ഥാനത്തിൽ A$ 228 ദശലക്ഷം EBITDA നേടി. NQXT, APSEZ-ൻ്റെ 2024-25 സാമ്പത്തിക വർഷത്തിലെ വരുമാനത്തിൻറെ 6% ഉം EBITDA-യുടെ 7% ഉം സംഭാവന ചെയ്യുന്നു.

പ്രതിവർഷം 50 ദശലക്ഷം ടൺ ശേഷിയുള്ള ഒരു പ്രകൃതിദത്ത ആഴക്കടൽ, മൾട്ടി-യൂസർ എക്സ്പോർട്ട് ടെർമിനലാണ് NQXT. ക്വീൻസ്‌ലാന്റ് സർക്കാരിൽ നിന്നുള്ള ദീർഘകാല പാട്ടക്കരാറിന് കീഴിലാണ് ഇത് പ്രവർത്തിക്കുന്നത്. ഓസ്‌ട്രേലിയയുടെ വിഭവ വ്യവസായത്തെ പിന്തുണയ്ക്കുന്ന ഒരു നിർണായക അടിസ്ഥാന സൗകര്യമാണിത്.

നോർത്ത് ക്വീൻസ്‌ലാൻഡിലെ അബോട്ട് പോർട്ട് തുറമുഖത്ത് സ്ഥിതി ചെയ്യുന്ന NQXT, ബോവെൻ, ഗലീലി തടങ്ങളിലെ ഖനന കമ്പനികളെയാണ് പ്രധാനമായും സഹായിക്കുന്നത്. വടക്കൻ, തെക്ക്-കിഴക്കൻ ഏഷ്യൻ വിപണികളിലേക്ക് വലിയ തോതിൽ ഈ തുറമുഖം കയറ്റുമതി നടത്തുന്നു. 2025 സാമ്പത്തിക വർഷത്തിൽ ഏകദേശം 88% ചരക്കുകളും ഏഷ്യൻ രാജ്യങ്ങളിലേക്കാണ് കയറ്റി അയച്ചത്.

85 വർഷം ദീർഘിച്ച പാട്ടക്കരാറാണ് NQXT-ക്കുള്ളത്. 2110-ൽ ഇത് അവസാനിക്കും. ക്വീൻസ്‌ലാന്റ് സർക്കാർ അബോട്ട് തുറമുഖത്തെ ഒരു തന്ത്രപ്രധാന തുറമുഖമായും മുൻഗണനാ തുറമുഖ വികസന പ്രദേശമായും പ്രഖ്യാപിച്ചിട്ടുണ്ട്. ക്വീൻസ്‌ലാന്റിലെ പ്രകൃതിവിഭവങ്ങൾ, ഗ്രീൻ ഹൈഡ്രജൻ ഉൾപ്പെടെ, ആഗോളതലത്തിൽ എത്തിക്കാൻ ഈ തുറമുഖത്തിന് കഴിയും.

NQXT-യുടെ പ്രവർത്തനങ്ങൾ ക്വീൻസ്‌ലാന്റിന്റെ മൊത്തം സംസ്ഥാന ഉൽപന്നത്തിലേക്ക് (GSP) 10 ബില്യൺ ഓസ്‌ട്രേലിയൻ ഡോളറിലധികം സംഭാവന നൽകുകയും ഖനനത്തിലും മറ്റ് വ്യവസായങ്ങളിലുമായി 8,000-ലധികം തൊഴിലവസരങ്ങൾ സൃഷ്ടിക്കുകയും ചെയ്തിട്ടുണ്ട്. സുരക്ഷാ മാനദണ്ഡങ്ങളിലും NQXT മാതൃകയാണ്. 2025 സാമ്പത്തിക വർഷത്തിൽ അപകടങ്ങളോ മരണങ്ങളോ റിപ്പോർട്ട് ചെയ്യപ്പെട്ടിട്ടില്ല.

വൈവിധ്യമാർന്ന തൊഴിൽ സമ്പത്തും NQXT-യുടെ പ്രത്യേകതയാണ്. 21% വനിതാ ജീവനക്കാരും 5% ആദിമ ഓസ്ട്രേലിയൻ, ടോറസ് സ്ട്രെയിറ്റ് ഐലൻഡേഴ്‌സ് വിഭാഗക്കാരും ഇവിടെ പ്രവർത്തിക്കുന്നു. പ്രാദേശിക സമൂഹങ്ങളുമായി അടുത്ത ബന്ധം പുലർത്തുന്ന NQXT, ബോവെൻ, കോളിൻസ്വിൽ എന്നിവിടങ്ങളിലെ സാമൂഹിക പദ്ധതികൾക്കായി 2017 മുതൽ 2.5 ദശലക്ഷം ഡോളറിലധികം ചെലവഴിച്ചു.

അദാനി ഗ്രൂപ്പിന്റെ ഭാഗമായ APSEZ, ഇന്ത്യയിലെ ഏറ്റവും വലിയ സംയോജിത ഗതാഗത കമ്പനിയാണ്. ആഗോള ചരക്ക് കൈകാര്യം ചെയ്യൽ, റെയിൽ ഗതാഗതം, മൾട്ടി-മോഡൽ ലോജിസ്റ്റിക്സ് പാർക്കുകൾ, വെയർഹൗസിംഗ്, റോഡ് ഗതാഗതം എന്നിവയിലൂടെയുള്ള "ഷോർ-ടു-ഡോർ" സേവനങ്ങൾ APSEZ വാഗ്ദാനം ചെയ്യുന്നു. അത്യാധുനിക ഡിജിറ്റൽ ഇൻഫ്രാസ്ട്രക്ചറും AI-അധിഷ്ഠിത ഒപ്റ്റിമൈസേഷനും ഇതിന് കരുത്ത് പകരുന്നു.

ഇന്ത്യയുടെ പടിഞ്ഞാറ്, തെക്ക്, കിഴക്കൻ തീരങ്ങളിലായി തന്ത്രപരമായി സ്ഥിതി ചെയ്യുന്ന 15 തുറമുഖങ്ങളുടെയും ടെർമിനലുകളുടെയും ഒരു വലിയ ശൃംഖല കമ്പനിക്കുണ്ട്. 127 കപ്പലുകളുള്ള ഒരു വൈവിധ്യമാർന്ന സമുദ്ര കപ്പൽ വ്യൂഹം, 12 മൾട്ടി-മോഡൽ ലോജിസ്റ്റിക്സ് പാർക്കുകൾ, 3.1 ദശലക്ഷം ചതുരശ്ര അടി വെയർഹൗസുകൾ, 25,000-ൽ അധികം ട്രക്കുകൾ എന്നിവ ഇതിൽ ഉൾപ്പെടുന്നു.

പ്രതിവർഷം 633 ദശലക്ഷം ടൺ ചരക്ക് കൈകാര്യം ചെയ്യാനുള്ള ശേഷിയുള്ള APSEZ, ഇന്ത്യയുടെ മൊത്തം തുറമുഖ ചരക്ക് കൈകാര്യം ചെയ്യലിൽ ഏകദേശം 28% വഹിക്കുന്നു. 2030-ഓടെ ഒരു ബില്യൺ ടൺ ചരക്ക് കൈകാര്യം ചെയ്യാനാണ് കമ്പനി ലക്ഷ്യമിടുന്നത്. 2025-ലെ S&P ഗ്ലോബൽ കോർപ്പറേറ്റ് സസ്റ്റൈനബിലിറ്റി അസസ്മെന്റിൽ ആഗോളതലത്തിൽ മികച്ച 5% ഗതാഗത കമ്പനികളിൽ ഒന്നായി APSEZ അംഗീകരിക്കപ്പെട്ടു.

വേൾഡ് ബാങ്കിന്റെ 2024-ലെ കണ്ടെയ്‌നർ പോർട്ട് പെർഫോമൻസ് ഇൻഡക്സിൽ APSEZ-ന്റെ അഞ്ച് തുറമുഖങ്ങൾ ഇടം നേടി. ഇത് ആഗോള വ്യാപാരം സുഗമമാക്കാൻ സഹായിക്കുന്നു.