നിയമസഭാ തിരഞ്ഞെടുപ്പ് പ്രഖ്യാപനം, മാര്‍ച്ചില്‍

ദില്ലി: കേരളം ഉള്‍പ്പെടെയുള്ള അഞ്ച് സംസ്ഥാനങ്ങളിലെ തിരഞ്ഞെടുപ്പിനുള്ള പ്രഖ്യാപനം മാര്‍ച്ച് ആദ്യവാരം ഉണ്ടാകും. ജനുവരി അവസാനം സംസ്ഥാനത്തെ സ്ഥിതി വിലയിരുത്താന്‍ തിരഞ്ഞെടുപ്പ് കമ്മീഷന്‍ കേരളത്തിലെത്തുന്നുണ്ട്.

കേരളം, തമിഴ്‌നാട്, പശ്ചിമ ബംഗാള്‍, അസം, പുതുച്ചേരി നിയമസഭകളിലേക്കുള്ള വോട്ടെടുപ്പ് ഏപ്രില്‍ അവസാനവാരം മുതല്‍ നടത്താനാണ് കേന്ദ്ര തിരഞ്ഞെടുപ്പ് കമ്മീഷന്റെ ആലോചന. ഇതു സംബന്ധിച്ച പ്രഖ്യാപനം മാര്‍ച്ച് ആദ്യവാരം ഉണ്ടാകും.

കേരളത്തിലും തമിഴ്‌നാട്ടിലും ഒന്നോ രണ്ടോ ഘട്ടങ്ങളായി തിരഞ്ഞെടുപ്പ് നടത്താനാണ് കമ്മീഷന്റെ ആലോചന. എന്നാല്‍ ക്രമസമാധാന പ്രശ്‌നം നിലനില്‍ക്കുന്നതിനാല്‍ പശ്ചിമ ബംഗാളില്‍ മൂന്നിലധികം ഘട്ടങ്ങളായാകും തിരഞ്ഞെടുപ്പ് നടത്തുക.

കേന്ദ്ര തിരഞ്ഞെടുപ്പ് കമ്മീഷന്‍ സംസ്ഥാനങ്ങള്‍ സന്ദര്‍ശിച്ച ശേഷമേ കേന്ദ്ര സേനയെ വിന്യസിക്കുന്നത് ഉള്‍പ്പെടെയുള്ള കാര്യങ്ങളില്‍ തീരുമാനം കൈക്കൊള്ളൂ.

കഴിഞ്ഞ തവണ കേരളത്തില്‍ ഏപ്രില്‍ 13ന് ആയിരുന്നു തിരഞ്ഞെടുപ്പ്. കേരളത്തിലെത്തി രാഷ്ട്രീയ പാര്‍ട്ടികളുടെ നിലപാട് കൂടി കേട്ട ശേഷമേ അന്തിമ തീരുമാനം എടുക്കുകയുള്ളൂ എന്ന് കമ്മീഷന്‍ അറിയിച്ചു.

English summary

Assembly Election may announce march first week