ഒഡീഷയില്‍ അഞ്ചാംതവണയും നവീന്‍ പട്നായിക്ക് മുഖ്യമന്ത്രി പദത്തിലേക്ക്, രണ്ടാംസ്ഥാനത്ത് ബിജെപി

ഒഡീഷ: ഒഡീഷയില്‍ അഞ്ചാംതവയമും നവീന്‍ പട്നായിക്ക് മുഖ്യമന്ത്രി പദത്തിലേക്ക്. ലോക്സഭാ തിരഞ്ഞെടുപ്പിനൊപ്പം നിയമസഭാ തിരഞഞ്ഞെടുപ്പും നടക്കുന്ന ഒഡീഷയില്‍ എതിരാളികളെ ബഹുദൂരം പിന്നിലാക്കിയാണ് നവീന്‍ പട്നായിക്കിന്‍റെ ബിജെഡി മുന്നേറ്റം തുടരുന്നത്. ഫലസൂചനകള്‍ പുറത്തുവന്ന 145 സീറ്റുകളില്‍ 101 സീറ്റുകളിലും ബിജെഡി സ്ഥാനാര്‍ത്ഥികളാണ് മുന്നിട്ടു നില്‍ക്കുന്നത്.

കഴിഞ്ഞ തവണ 17 സീറ്റുകള്‍ വിജിയിച്ച ബിജെപി ഇത്തവണ 27 നിയോജക മണ്ഡലങ്ങളിലാണ് ലീഡ് ചെയ്യുന്നത്. അതേസമയം 2014 ല്‍ 16 സീറ്റ് ലഭിച്ച കോണ്‍ഗ്രസ് 14 സീറ്റുകളില്‍ മാത്രമാണ് ഇപ്പോള്‍ മുന്നിട്ടു നില്‍ക്കുന്നത്. മൂന്ന് സീറ്റുകളില്‍ മറ്റുകക്ഷികളും മുന്നിട്ടു നില്‍ക്കുന്നുണ്ട്.

അതേസമയം നിയമസഭാ തിരഞ്ഞെടുപ്പിലെ മേധാവിത്വം ലോക്സഭാ തിരഞ്ഞെടുപ്പില്‍ ഒഡീഷയില്‍ ബിജെഡിക്ക് നിലനിര്‍ത്താന്‍ കഴിയുന്നില്ല. എങ്കിലും ഭൂരിപക്ഷം സീറ്റുകളിലും ബിജെഡി തന്നെയാണ് മുന്നിട്ട് നില്‍ക്കുന്നത്. സംസ്ഥാനത്ത് ആകെയുള്ള 21 സീറ്റില്‍ 12 സീറ്റുകളിലാണ് നവീന്‍ പട്നായിക്കിന്‍റെ പാര്‍ട്ടിക്ക് മുന്നിട്ട് നില്‍ക്കുന്നത്.

2014 ല്‍ 20 സീറ്റുകളിലായിരുന്നു ഒഡീഷയില്‍ ബിജെഡി ജയിച്ചത്. അതേസമയം സംസ്ഥാനത്ത് വലിയ മുന്നേറ്റമാണ് ബിജെപി ഉണ്ടായിരിക്കുന്നത്. കഴിഞ്ഞ തവണ 1 സീറ്റില്‍ മാത്രം വിജയിച്ച ബിജെപി നിലവില്‍ 9 സീറ്റുകളിലാണ് ഒഡീഷയില്‍ ലീഡ് ചെയ്യുന്നത്.

English summary

assembly Election Results 2019 - Odisha, bjd leading