എവിടെ നിക്ഷേപിക്കണം?സ്വർണം, ഫിക്സഡ് ഡിപ്പോസിറ്റ്, ഷെയർ മാർക്കറ്റ്; പണം ഇരട്ടിയാക്കാൻ ഇതാണ് വഴി

കഠിനാധ്വാനം ചെയ്ത് ഉണ്ടാക്കുന്ന പണം നമ്മൾ എവിടെയാണ് സാധാരണ നിക്ഷേപിക്കാറുള്ളത്? ഭൂരിഭാഗം പേരും ഒന്നുകിൽ ബാങ്കിൽ ഫിക്സഡ് ഡിപ്പോസിറ്റ് ആയി ഇടും, അല്ലെങ്കിൽ സ്വർണം വാങ്ങി വെക്കും. കുറച്ചുകൂടി റിസ്ക് എടുക്കാൻ താല്പര്യമുള്ളവർ മ്യൂച്വൽ ഫണ്ടുകളിലോ ഷെയർ മാർക്കറ്റിലോ നിക്ഷേപിക്കും.

എന്നാൽ, ഇതിൽ ഏതെങ്കിലും ഒരു സ്ഥലത്ത് മാത്രം നിങ്ങളുടെ പണം മുഴുവൻ നിക്ഷേപിക്കുന്നത് വലിയ അബദ്ധമാണ്. കാരണം ഷെയർ മാർക്കറ്റ് എപ്പോൾ വേണമെങ്കിലും താഴേക്ക് പോകാം, ചില സമയത്ത് സ്വർണവില കുറയാം, ബാങ്കിലെ പലിശ നിരക്കുകളും എപ്പോഴും ഒരുപോലെയല്ല. അതുകൊണ്ട്, വിപണിയിൽ എന്ത് മാറ്റമുണ്ടായാലും നമ്മുടെ പണം സുരക്ഷിതമായിരിക്കാൻ സാമ്പത്തിക വിദഗ്ധർ പറയുന്ന ഒരു ലളിതമായ തന്ത്രമുണ്ട് അസറ്റ് അലോക്കേഷൻ തന്ത്രം. വലിയ പേര് കേട്ട് പേടിക്കേണ്ട, കയ്യിലുള്ള പണം ഒരിടത്ത് മാത്രം നിക്ഷേപിക്കാതെ മൂന്നായി തിരിച്ച് നിക്ഷേപിക്കുന്ന രീതിയാണിത്. അത് എങ്ങനെയാണെന്ന് നോക്കാം.

1. ഓഹരി നിക്ഷേപങ്ങൾ: പണം വേഗത്തിൽ വളരാൻ

ദീർഘകാലത്തേക്ക്, അതായത് ഒരു 5 മുതൽ 10 വർഷത്തേക്ക് വലിയൊരു തുക ലാഭം ഉണ്ടാക്കാൻ മ്യൂച്വൽ ഫണ്ടുകളോ ഓഹരികളോ തന്നെയാണ് ഏറ്റവും മികച്ചത്. പണപ്പെരുപ്പത്തെ മറികടന്ന് നല്ല റിട്ടേൺസ് തരാൻ ഇതിന് കഴിയും. നിങ്ങളുടെ പ്രായം കുറവാണെങ്കിൽ കയ്യിലുള്ള നിക്ഷേപത്തിന്റെ നല്ലൊരു പങ്ക് മ്യൂച്വൽ ഫണ്ടുകൾ വഴി ഇതിലേക്ക് മാറ്റിവെക്കാം. കാരണം വരുംവർഷങ്ങളിൽ വിപണി ഉയരുമ്പോൾ നിങ്ങളുടെ പണവും അതോടൊപ്പം വേഗത്തിൽ വളരും.

2. സ്വർണം: പ്രതിസന്ധിയിലെ കാവൽക്കാരൻ

രാജ്യത്ത് എപ്പോഴെങ്കിലും സാമ്പത്തിക പ്രതിസന്ധിയോ യുദ്ധസമാനമായ സാഹചര്യങ്ങളോ ഉണ്ടായാൽ ഷെയർ മാർക്കറ്റ് താഴേക്ക് പോകും. എന്നാൽ അത്തരം സമയങ്ങളിൽ സ്വർണവില കുതിച്ചുയരും. അതുകൊണ്ട് നിങ്ങളുടെ ആകെ നിക്ഷേപത്തിന്റെ 10% മുതൽ 15% വരെ എപ്പോഴും സ്വർണത്തിൽ ഉണ്ടായിരിക്കണം. നേരിട്ട് സ്വർണം വാങ്ങുന്നതിന് പുറമെ ഗോൾഡ് ഇടിഎഫുകളോ ഡിജിറ്റൽ ഗോൾഡോ ഇതിനായി ഉപയോഗിക്കാം. ഓഹരി വിപണി തകരുമ്പോൾ നിങ്ങളുടെ പോർട്ട്ഫോളിയോയെ താങ്ങിനിർത്താൻ ഈ സ്വർണ നിക്ഷേപം സഹായിക്കും.

3. ബാങ്ക് നിക്ഷേപങ്ങൾ: സുരക്ഷിതത്വം

ബാങ്ക് ഫിക്സഡ് ഡിപ്പോസിറ്റുകൾ, മറ്റ് സർക്കാർ സമ്പാദ്യ പദ്ധതികൾ എന്നിവയിൽ വലിയ ലാഭം കിട്ടിയില്ലെങ്കിലും നിങ്ങളുടെ പണം 100% സുരക്ഷിതമായിരിക്കും. കൂടാതെ, വീട്ടിൽ പെട്ടെന്ന് ഒരു മെഡിക്കൽ എമർജൻസിയോ മറ്റ് ആവശ്യങ്ങളോ വന്നാൽ പെട്ടെന്ന് എടുക്കാൻ സാധിക്കുന്ന തരത്തിൽ കുറച്ചു പണം എപ്പോഴും ഇതിൽ സൂക്ഷിക്കണം. ഷെയർ മാർക്കറ്റ് വലിയ രീതിയിൽ ഇടിയുമ്പോൾ കുറഞ്ഞ വിലയ്ക്ക് നല്ല ഓഹരികൾ വാങ്ങാൻ ഈ ഫണ്ടിലെ പണം വരുംകാലത്ത് ഉപയോഗിക്കുകയും ചെയ്യാം.

പണം മുഴുവൻ സ്വർണത്തിലോ ഷെയർ മാർക്കറ്റിലോ ബാങ്കിലോ മാത്രം ഇട്ടുവെക്കാതെ, ഇവ മൂന്നിലും കൃത്യമായ അനുപാതത്തിൽ വിഭജിച്ചു നിക്ഷേപിക്കുക. വിപണിയിൽ എന്ത് തകർച്ചയുണ്ടായാലും നിങ്ങളുടെ സമ്പാദ്യത്തെ അത് ബാധിക്കില്ല എന്ന് ഉറപ്പുവരുത്താൻ ഈ ഒരു ലളിതമായ ശൈലിയിലൂടെ സാധിക്കും.