ക്രിസ്ത്യന്‍ വിഭാഗങ്ങള്‍ക്കെതിരെ അതിക്രമം വർധിക്കുന്നു: രാഷ്ട്രതിയെ ആശങ്ക അറിയിച്ച് പ്രതിനിധി സംഘം

ദില്ലി: വിവിധ ക്രിസ്ത്യന്‍ വിഭാഗങ്ങളില്‍ നിന്നും പ്രതിനിധികള്‍ അടങ്ങിയ സംഘവുമായി കൂടിക്കാഴ്ച നടത്തി രാഷ്ട്രപതി ദ്രൗപതി മുർമു. രാഷ്ട്രപതി ഭവനില്‍ വെച്ച് ഇന്ന് രാവിലെയായിരുന്നു കൂടിക്കാഴ്ച. ആർച്ച് ബിഷപ്പ് അനിൽ ജെ ടി കൂട്ടോ, ബിഷപ്പ് സുബോധ് മൊണ്ടൽ, ബിഷപ്പ് പോൾ സ്വരൂപ്, ഡോ. മൈക്കൽ വില്യംസ്, തെഹ്മിന അറോറ എന്നിവരടങ്ങിയ സംഘമാണ് സംഘത്തിലുണ്ടായിരുന്നത്. പ്രതിനിധി സംഘം വിശുദ്ധ ബൈബിളിന്റെ പകർപ്പും ഫ്രാൻസിസ് മാർപാപ്പ അനുഗ്രഹിച്ച ക്രിസ്തുവിന്റെ സ്മരണികയും സമുദായത്തിന്റെ വിവിധ ആശങ്കകൾ വിശദീകരിക്കുന്ന ഒരു മെമ്മോറാണ്ടവും രാഷ്ട്രപതിക്ക് കൈമാറി.

ഉത്തർപ്രദേശ്, ഛത്തീസ്ഗഢ് സംസ്ഥാനങ്ങളിൽ ക്രിസ്ത്യാനികൾക്കെതിരായ അതിക്രമങ്ങൾ കുത്തനെ വർധിക്കുന്നതിനെക്കുറിച്ച് പ്രതിനിധി സംഘം രാഷ്ട്രപതിയെ ധരിപ്പിച്ചു. 2023 ഫെബ്രുവരി 19 ന്, ഡൽഹിയിലെ 22,000 ത്തോളം ക്രിസ്ത്യാനികൾ ജന്തർ മന്തറിൽ പ്രതിഷേധം സംഘടിപ്പിച്ചിരുന്നു. വിവിധ ക്രിസ്ത്യൻ നേതാക്കൾ അന്ന് മെമ്മോറാണ്ടം തയ്യാറാക്കി ഒപ്പുവെക്കുകയും അത് കൈമാറാന്‍ രാഷ്ട്രപതിയെ കാണാൻ സമയം തേടുകയും ചെയ്തിരുന്നു.

പ്രതിനിധി സംഘത്തെിന്റെ ആവശ്യങ്ങള്‍ കേട്ട ശേഷം രാഷ്ട്രപതി ദ്രൗപതി മുർമു ജാർഖണ്ഡിലെയും ഒഡീഷയിലെയും തന്റെ ദിനങ്ങൾ അനുസ്മരിക്കുകയും പള്ളിയുടെയും കന്യാസ്ത്രീകളുടെയും പ്രദേശത്തെ ക്രിസ്ത്യൻ സമൂഹത്തിലെ മറ്റ് അംഗങ്ങളുടെയും സേവനത്തെ സ്നേഹപൂർവ്വം അനുസ്മരിക്കുകയും ചെയ്തുവെന്നും പ്രതിനിധി സംഘം പിന്നീട് വ്യക്തമാക്കി.

ആരോഗ്യ സംരക്ഷണം, വിദ്യാഭ്യാസം, രാഷ്ട്ര നിർമ്മാണം എന്നീ മേഖലകളിലെ ക്രിസ്ത്യന്‍ മിഷനറിമാരുടെ സേവനത്തെ രാഷ്ട്രപതി അഭിനന്ദിച്ചു. മേഖലയിലെ കന്യാസ്ത്രീകൾക്കൊപ്പം സന്നദ്ധസേവനം നടത്തിയ കാര്യവും മുർമു അനുസ്മരിച്ചതായി റിപ്പോർട്ടുകള്‍ വ്യക്തമാക്കുന്നു. ഓസ്‌ട്രേലിയൻ മിഷനറിയായിരുന്ന ഗ്രഹാം സ്റ്റെയിൻസിന്റെ ദാരുണമായ നഷ്ടവും രാഷ്ട്രപതി അനുസ്മരിച്ചു.

ക്രിസ്ത്യാനികളെ ലക്ഷ്യം വച്ചുള്ള റിപ്പോർട്ടുകൾ താൻ വായിച്ചിട്ടുണ്ടെന്ന് അവർ പറഞ്ഞു, എന്നാൽ ഈ അക്രമാസക്തമായ ആക്രമണങ്ങൾ നടത്തിയത് ഇന്ത്യയിൽ വളരെ കുറച്ച് ആളുകൾ മാത്രമാണെന്ന് വിശ്വസിക്കുന്നു. നാനാത്വത്തിൽ ഏകത്വം ഉൾക്കൊള്ളുന്ന രാജ്യത്തിന്റെ മതേതര ഘടന ഇപ്പോഴും ഊർജ്ജസ്വലമാണെന്ന് രാഷ്ട്രപതി പറഞ്ഞു.

പോലീസിന്റെയും നിയമപാലകരുടെയും അലംഭാവം, അനാവശ്യമായ അറസ്റ്റുകൾ, ക്രിസ്ത്യൻ കുടുംബങ്ങളെ ഉപദ്രവിക്കൽ, സ്ഥാപനങ്ങൾക്ക് നേരെയുള്ള ആക്രമണങ്ങൾ എന്നിവ മെമ്മോറാണ്ടത്തിൽ എടുത്തുകാണിക്കുന്ന വിഷയങ്ങളില്‍ ഇടപെടാന്‍ തന്റെ അധികാര പരിധിയിലുള്ള നടപടികൾ സ്വീകരിക്കുമെന്ന് രാഷ്ട്രപതി പ്രതിനിധി സംഘത്തിന് ഉറപ്പ് നൽകുകയും ചെയ്തു.

English summary

Atrocities against Christian sects are increasing: Delegation expresses concern to President