മുലായത്തിന്റെ പിറന്നാള് ആഘോഷം സ്പോണ്സര് ചെയ്യുന്നത് താലിബാന്?
ലഖ്നൊ: കളിയാക്കാനാണ് അസം ഖാന് ഉദ്ദേശിച്ചത് എന്ന് തീര്ച്ച. അല്ലെങ്കില് പിന്നെ സ്വന്തം പാര്ട്ടിയുടെ എല്ലാമെല്ലാമായ നേതാവ് മുലായം സിങ് യാദവിന്റെ പിറന്നാള് ആഘോഷത്തിന് പണം ചെലവാക്കുന്നത് താലിബാനും ദാവൂദ് ഇബ്രാഹിമുമാണ് എന്ന് അസം ഖാന് പറയില്ലല്ലോ. മുലായത്തിന്റെ പിറന്നാള് ഇത്രയും ഗംഭീരമായി ആഘോഷിക്കാന് ഫണ്ടെടവിടെ നിന്നാണ് വരുന്നത് എന്ന് ചോദിച്ചപ്പോഴായിരുന്നു അസംഖാന്റെ പരിഹാസം.
പിറന്നാള് ആഘോഷത്തിന് പണം എവിടെനിന്ന് വരുന്നു എന്നത് എങ്ങനെയാണ് ഇവിടെ വിഷയമാകുന്നത്. തീവ്രവാദ സംഘടനകളായ താലിബാനും ദാവൂദ് ഇബ്രാഹിമുമാണ് പിറന്നാള് ആഘോഷത്തിന് പണം ചെലവാക്കുന്നത് - അസം ഖാന് പറഞ്ഞു. 75 അടി നീളമുള്ള അത്യുഗ്രന് കേക്കാണ് മുലായത്തിന്റെ പിറന്നാളിന് ഒരുക്കിയിരിക്കുന്നത്.
ലണ്ടനില് നിന്നും ഇറക്കുമതി ചെയ്തിരിക്കുന്ന വിക്ടോറിയന് ബാഗിയാണ് മുലായത്തിന്റെ പിറന്നാളാഘോഷത്തിലെ ഹൈലൈറ്റ്. അസം ഖാനോടൊപ്പം 14 കിലോമീറ്റര് മുലായം ഈ പ്രത്യേക കുതിരവണ്ടിയില് സഞ്ചരിക്കും. രാംപൂരില് മെഡിക്കല് കോളേജിന് പിറന്നാള് ദിനത്തില് മുലായം തറക്കല്ലിടും. ഉത്തരാഖണ്ട് ഗവര്ണര് അടക്കമുള്ളവര് ചടങ്ങുകളില് പങ്കെടുക്കും.
മുലായം സിങ് യാദവിന്റെ എഴുപത്തിയാറാം പിറന്നാള് ആര്ഭാടത്തോടെ ആഘോഷിക്കാനാണ് സമാജ് വാദി പാര്ട്ടിയുടെ തീരുമാനം. സമ്ത ദിവസ് എന്ന പേലിലാണ് പാര്ട്ടി ഈ ദിവസം ആഘോഷിക്കുന്നത്. രാംപൂരില് മുലായത്തിനൊപ്പം മകനും മുഖ്യമന്ത്രിയുമായ അഖിലേഷ് യാദവ് ആഘോഷങ്ങളില് മുഖ്യാതിഥിയാകുമെന്ന് സമാജ് വാദി പാര്ട്ടി വക്താവ് രാജേന്ദ്ര ചൗധരി അറിയിച്ചു.