ബാബ രാംദേവ് ആണും പെണ്ണും കെട്ടവനോ?

ദില്ലി: മുലായം സിംഗ് മുതല്‍ അസം ഖാനും അബു ആസ്മിയും വരെയുള്ള സമാജ് വാദി പാര്‍ട്ടി നേതാക്കള്‍ ഇത്തവണ ഒരുങ്ങിത്തന്നെയാണ് ഇറങ്ങിയിരിക്കുന്നത്. ഏതെങ്കിലും ഒരു എസ് പി നേതാവിന്റെ വിവാദമില്ലാത്ത ഒരു ദിവസം പോലും തിരഞ്ഞെടുപ്പ് കാലത്ത് കഴിഞ്ഞുപോകില്ല എന്ന സ്ഥിതിയിലാണ് കാര്യങ്ങള്‍. യോഗ ഗുരു ബാബ രാംദേവ് ആണും പെണ്ണും കെട്ടവനാണ് എന്ന് പറഞ്ഞ് അസം ഖാനാണ് പുതിയ വിവാദത്തിന് തിരി കൊളുത്തിയിരിക്കുന്നത്.

ദളിത് സ്ത്രീകളെ അധിക്ഷേപിച്ചുകൊണ്ടുള്ള രാംദേവിന്റെ പരാമര്‍ശവും മുന്‍പ് രാംലീല മൈതാനത്ത് നിന്നും സ്്ത്രീകളുടെ വേഷത്തില്‍ രക്ഷപ്പെടാന്‍ ശ്രമിച്ചതും ചൂണ്ടിക്കാട്ടിയാണ് ബാബ രാംദേവിനെ അസം ഖാന്‍ കളിയാക്കിയത്. ആണുങ്ങളെ പോലെ മൈതാനത്ത് നിന്നും പുറത്തുപോകേണ്ടതിന് പകരം സ്ത്രീകളോട്് ചുരിദാര്‍ വാങ്ങി ധരിച്ച് രക്ഷപ്പെടാന്‍ ശ്രമിക്കുകയായിരുന്നു രാംദേവ്.

നേരത്തെ കാശ്മീരില്‍ യുദ്ധം ജയിച്ചത് മുസ്ലിം സൈനികരാണ് എന്ന അസം ഖാന്റെ പരമാര്‍ശം വിവാദമായിരുന്നു. ഇതേത്തുടര്‍ന്ന് തിരഞ്ഞെടുപ്പ് യോഗങ്ങളില്‍ സംസാരിക്കുന്നതില്‍ നിന്നും ഖാനെ തിരഞ്ഞെടുപ്പ് കമ്മീഷന്‍ വിലക്കിയിരുന്നു. എന്നാല്‍ അമിത് ഷായ്‌ക്കെതിരായ വിലക്ക് നീക്കുകയും തന്റെ മേല്‍ വിലക്ക് നിലനിര്‍ത്തുകയും ചെയ്ത കമ്മീഷനെതിരെ രംഗത്തുവന്നിരിക്കുകയാണ് ഇപ്പോള്‍ ഖാന്‍. തിരഞ്ഞെടുപ്പ് കമ്മീഷന്‍ നിയമത്തിന് മുകളിലല്ല.

വിവാദ പ്രസ്താവനകള്‍ നടത്തുന്നതില്‍ ഒട്ടും മോശമല്ല ബാബ രാംദേവും. നരേന്ദ്രമോദിയുടെ പിന്തുണക്കാരനായി അറിയപ്പെടുന്ന രാംദേവ്, കഴിഞ്ഞ ദിവസം രാഹുല്‍ ഗാന്ധിയെ അധിക്ഷേപിച്ച് സംസാരിച്ചിരുന്നു. ദളിത് കുടുംബങ്ങളില്‍ രാഹുല്‍ മധുവിധുവിന് പോകുന്നു എന്ന പ്രയോഗം വിവാദമായതിനെ തുടര്‍ന്ന് രാംദേവിനെതിരെ പോലീസ് കേസെടുത്തിട്ടുണ്ട്.

English summary

SP leader Azam Khan stirs another controversy, says Baba Ramdev neither a man nor a woman