നടന് പ്രഭാസിന്റെ വീട് സര്ക്കാര് പൊളിക്കും; നടന് കോടികള് നഷ്ടം, പ്രതികരിക്കാതെ പ്രഭാസും കുടുംബവും
ഹൈദരാബാദ്: നടന് പ്രഭാസിനെ അറിയാത്ത മലയാളികളുണ്ടാകില്ല. ബാഹുബലി എന്ന ചിത്രത്തിലൂടെ ലോക കീര്ത്തി നേടിയ തെലുങ്ക് നടനാണ് ഇദ്ദേഹം. ഇപ്പോള് അടുത്ത ബിഗ് ബജറ്റ് ചിത്രം സഹോയുടെ തിരക്കിലാണ് പ്രഭാസ്. സുജീത്ത് സംവിധാനം ചെയ്യുന്ന സഹോയില് ശ്രദ്ധ കപൂര് ആണ് നായിക. ഈ ചിത്രവും വന് വിജയമാകുമെന്നാണ് പ്രചാരണം.
എന്നാല് പ്രഭാസിന് സങ്കടമുള്ള ഒരു വാര്ത്തയാണ് ഇപ്പോള് പുറത്തുവന്നിരിക്കുന്നത്. നടന്റെ ഹൈദരാബാദിലുള്ള കോടികള് വിലമതിക്കുന്ന വീട് സര്ക്കാര് പൊളിക്കാന് പോകുന്നു. ഉദ്യോഗസ്ഥര് നടപടികള് ആരംഭിച്ചുകഴിഞ്ഞു. വാര്ത്തകള് പ്രചരിച്ചിട്ടും പ്രഭാസ് വിഷയത്തില് പ്രതികരിച്ചിട്ടില്ല. വിവരങ്ങള് ഇങ്ങനെ....
കോടികളുടെ വീട്
ഹൈദരാബാദിലെ റായദുര്ഗം പ്രദേശത്ത് പ്രഭാസിന് ഗസ്റ്റ് ഹൗസുണ്ട്. കോടികള് ചെലവിട്ട് നിര്മിച്ചതാണ് ഈ വീട്. ഈ മാസം 17ന് റവന്യൂ ഉദ്യോഗസ്ഥര് വീട്ടിലെത്തി. വീട് പൊളിച്ചുനീക്കുമെന്ന് നോട്ടീസ് പതിക്കുകയും ചെയ്തു. അടഞ്ഞിരുന്ന വീടിന്റെ വാതിലില് സീല് പതിച്ചാണ് ഉദ്യോഗസ്ഥര് മടങ്ങിയത്.
സര്ക്കാര് ഭൂമി കൈയ്യേറി
സര്ക്കാര് ഭൂമിയിലാണ് വീട് നില്ക്കുന്നതെന്നാണ് ഉദ്യോഗസ്ഥര് പറയുന്നത്. പ്രഭാസിന്റെ വീട് മാത്രമല്ല, പ്രദേശത്തെ ഒട്ടേറെ വീടുകള് സര്ക്കാര് ഭൂമിയിലാണത്രെ. ഈ വിഷയം സുപ്രീംകോടതി വരെ എത്തിയിരുന്നു. പ്രദേശത്തെ 84 ഏക്കര് ഭൂമി സര്ക്കാരിന്റെതാണെന്ന് ഉദ്യോഗസ്ഥര് പറയുന്നു.
വിഷയം സുപ്രീംകോടതിയില്
സ്വകാര്യ വ്യക്തികള് വിഷയം കോടതിയില് ചോദ്യം ചെയ്തു. മൂന്ന് മാസം മുമ്പ് സുപ്രീംകോടതി കേസില് വിധി പറഞ്ഞു. ഭൂമി സര്ക്കാരിന്റേതാണ്. എല്ലാ താമസക്കാരും ഒഴിഞ്ഞു പോണം. ഒഴിപ്പിക്കല് നടപടികളുമായി സര്ക്കാരിന് മുന്നോട്ട് പോകാമെന്നായിരുന്നു വിധി. തൊട്ടുപിന്നാലെ ഉദ്യോഗസ്ഥര് നടപടികളും ആരംഭിച്ചു.
പൊളിക്കാന് വൈകിയത്...
പ്രദേശത്തെ പല വീടുകള്ക്കും ഒഴിഞ്ഞുപോകാന് ആവശ്യപ്പെട്ട് നോട്ടീസ് നല്കിയിട്ടുണ്ട്. പല വീടുകളും പൊളിക്കാനും തുടങ്ങി. അതിനിടെയാണ് നിയമസഭാ തിരഞ്ഞെടുപ്പ് വന്നത്. ഇതോടെ നടപടികള് മന്ദഗതിയിലായി. തിരഞ്ഞെടുപ്പ് ഫലം വന്നു പുതിയ സര്ക്കാര് അധികാരത്തിലേറിയ ശേഷമാണ് നടപടികള് ഉദ്യോഗസ്ഥര് വീണ്ടും ആരംഭിച്ചിരിക്കുന്നത്.
പ്രതികരിക്കാതെ നടന്
സഹോയുടെ സെറ്റിലാണ് പ്രഭാസ്. അദ്ദേഹമോ കുടുംബാംഗങ്ങളോ വിഷയത്തില് ഇതുവരെ പ്രതികരിച്ചിട്ടില്ല. കഴിഞ്ഞ ദിവസം ഉദ്യോഗസ്ഥര് വീട്ടിലെത്തി. വീട് അടഞ്ഞുകിടക്കുകയായിരുന്നു. ഗേറ്റില് നോട്ടീസ് പതിച്ചാണ് ഉദ്യോഗസ്ഥര് തിരിച്ചുപോയത്. വൈകാതെ പൊളിക്കാന് തുടങ്ങുമെന്നാണ് അറിയുന്നത്.
മോദിയുടെ ഉഗ്രന് പ്രഖ്യാപനം; വില കുത്തനെ കുറയും, രാജ്യം കാത്തിരുന്ന തീരുമാനം!! 99 ശതമാനത്തിനും