അഭിജിത്ത് ബാനര്ജിയെ പിന്തുണച്ച് ദിലീപ് ഘോഷ്.... പ്രതിസന്ധി പരിഹരിക്കാന് സഹായിക്കണം!!
കൊല്ക്കത്ത: നൊബേല് ജേതാവ് അഭിജിത്ത് ബാനര്ജിയെ പിന്തുണച്ച് ബംഗാള് ബിജെപി അധ്യക്ഷന് ദിലീപ് ഘോഷ്. രാജ്യത്തെ സാമ്പത്തിക പ്രതിസന്ധി പരിഹരിക്കാന് ബാനര്ജിയുടെ സഹായം വേണമെന്നാണ് ഘോഷ് ആവശ്യപ്പെട്ടിരിക്കുന്നത്. അതേസമയം കേന്ദ്ര മന്ത്രി പിയൂഷ് ഗോയല് കടുത്ത ആരോപണങ്ങള് അഭിജിത്ത് ബാനര്ജിക്കെതിരെ ഉന്നയിച്ച് നില്ക്കുന്ന സമയത്താണ് ഘോഷ് പിന്തുണയുമായി എത്തിയിരിക്കുന്നത്.
അഭിജിത്ത് ബാനര്ജിയുടെ ആശയങ്ങള് ജനങ്ങള് തള്ളിയതാണെന്നും, കോണ്ഗ്രസിന്റെ ന്യായ് പദ്ധതി അതിനൊരു ഉദാഹരണമാണെന്നും പിയൂഷ് ഗോയല് പറഞ്ഞു. ജെഎന്യുവില് പഠിച്ചത് കൊണ്ട് അദ്ദേഹം ഇടതുപക്ഷ ചിന്താഗതിയുള്ള സാമ്പത്തിക ശാസ്ത്രജ്ഞനാണെന്നും ഗോയല് ഉന്നയിച്ചിരുന്നു. രണ്ടാം ഭാര്യ വിദേശിയായത് കൊണ്ടാണ് നൊബേല് ലഭിച്ചതെന്നും ബിജെപി നേതാവ് പറഞ്ഞിരുന്നു. ഇതെല്ലാം വിവാദമായിരുന്നു. തന്റെ വ്യക്തിപരമായ ജീവിതം രാഷ്ട്രീയമായി കൂട്ടിചേര്ക്കുന്നത് മോശമാണെന്ന് ബാനര്ജി ഇതിന് മറുപടി നല്കിയിരുന്നു.
അതേസമയം ബാനര്ജിയെ കുറിച്ച് വ്യത്യസ്ത അഭിപ്രായങ്ങള് പലര്ക്കുമുണ്ടാകാം. പക്ഷേ അദ്ദേഹത്തിന് സാമ്പത്തിക പ്രതിസന്ധി പരിഹരിക്കാന് നിര്ദേശങ്ങള് നല്കാന് സാധിക്കുമെന്നും ദിലീപ് ഘോഷ് പറഞ്ഞു. സംസ്ഥാനത്ത് ബാനര്ജിയുടെ നേട്ടം വലിയ പ്രചാരണമായി മാറിയിരുന്നു. ഒരുപാട് ആരാധകരും ബാനര്ജിക്ക് ബംഗാളിലുണ്ട്. അദ്ദേഹത്തെ എതിര്ക്കുന്നത് വലിയ തിരിച്ചടിയാവുമെന്ന വിലയിരുത്തലിലാണ് ദിലീപ് ഘോഷ് അദ്ദേഹത്തെ പിന്തുണച്ചതിന് കാരണം.
അദ്ദേഹം വലിയൊരു പ്രതിഭയാണ്. വളരെ വലിയ നേട്ടമാണ് അദ്ദേഹം സ്വന്തമാക്കിയത്. പലരും സ്വന്തം അഭിപ്രായങ്ങള് പറയുന്നുണ്ട്. അത് അവരുടെ അഭിപ്രായം മാത്രമാണെന്നും, അഭിജിത്തിന്റെ നേട്ടത്തെ ഇല്ലാതാക്കില്ലെന്നും ദിലീപ് ഘോഷ് വ്യക്തമാക്കി. രാജ്യത്തെ സാമ്പത്തിക പ്രതിസന്ധി മാത്രമല്ല, ആഗോള തലത്തില് ഉണ്ടായ സാമ്പത്തിക പ്രതിസന്ധിയെ മറികടക്കാനുള്ള നിര്ദേശങ്ങള് അഭിജിത്ത് ബാനര്ജിക്ക് നല്കാനാവുമെന്നും ഘോഷ് പറഞ്ഞു.