ഇന്ത്യ - ഓസ്‌ട്രേലിയ കളിക്കിടെ പട്ടി കുരച്ചു; 20കാരനെ ബിയര്‍ബോട്ടില്‍ കൊണ്ട് കുത്തിക്കൊന്നു!

ബെംഗളൂരു: ആവേശകരമായ മത്സരത്തില്‍ ഓസ്‌ട്രേലിയയെ തോല്‍പിച്ച് ഇന്ത്യ സെമിഫൈനലില്‍ കടന്നു. കളിയുടെ ആവേശത്തിനിടെ ബെംഗളൂരുവില്‍ നടന്നത് ആരും പ്രതീക്ഷിക്കാത്ത ഒരു അക്രമം. കളി കാണുന്നതിനിടെ പട്ടി കുരച്ച് ശല്യമുണ്ടാക്കിയ സംഭവത്തെ തുടര്‍ന്ന് ഒരുകൂട്ടം ചെറുപ്പക്കാര്‍ ചേര്‍ന്ന് യുവാവിനെ കൊലപ്പെടുത്തുകയായിരുന്നു. അവിനാശ് എന്ന 20കാരനാണ് കൊല്ലപ്പെട്ടത്.

നോര്‍ത്ത് സെന്‍ട്രല്‍ ബെംഗളൂരുവിലെ ജെ സി നഗറില്‍ കുറേ സുഹൃത്തുക്കള്‍ ചേര്‍ന്ന് ഇന്ത്യ - ഓസ്‌ട്രേലിയ ക്രിക്കറ്റ് മത്സരം കാണുകയായിരുന്നു. ജോണ്‍ കെന്നഡി എന്ന ചെറുപ്പക്കാരന്‍ ഇവിടെയെത്തി കളി കാണാന്‍ ചേര്‍ന്നു. കളിക്കിടെ പല തവണ പട്ടി കുരച്ചത് കളി കാണുകയായിരുന്ന യുവാക്കളെ അസ്വസ്ഥരാക്കി. ജോണ്‍ കെന്നഡിയോട് പട്ടിയുമായി സ്ഥലം വിടാന്‍ ചെറുപ്പക്കാര്‍ ആവശ്യപ്പെട്ടു.

ജോണ്‍ കെന്നഡി കുറച്ച് സമയത്തിന് ശേഷം കുറെ കൂട്ടുകാരുമായി എത്തി അവിനാശിനെ ആക്രമിക്കുകയായിരുന്നു. ബിയര്‍ബോട്ടില്‍ കൊണ്ടുള്ള കുത്തേറ്റ അവിനാശ് ആശുപത്രിയില്‍ കൊണ്ടുപോകുന്നതിനിടെ മരിച്ചു. ജോണ്‍ കെന്നഡിയെയും കൂട്ടുകാരെയും പോലീസ് അറസ്റ്റ് ചെയ്തിട്ടുണ്ട്. കൊലപാതകക്കുറ്റത്തിന് പോലീസ് ഇവര്‍ക്കെതിരെ കേസെടുത്തു.

മോഹാലിയില്‍ നടന്ന മത്സരത്തില്‍ ഇന്ത്യ ഓസ്‌ട്രേലിയയെ തോല്‍പിച്ച് സെമി ഫൈനലില്‍ പ്രവേശിച്ചു. വിരാട് കോലിയുടെ അപരാജിത 82 റണ്‍സാണ് ഇന്ത്യയെ വിജയികളാക്കിയത്. ഗ്രൂപ്പ് 1 ലെ ചാമ്പ്യന്മാരായ വെസ്റ്റ് ഇന്‍ഡീസാണ് സെമി ഫൈനലില്‍ ഇന്ത്യയുടെ എതിരാളികള്‍. മാര്‍ച്ച് 31ന് മുംബൈയിലാണ് ഈ കളി.

English summary

20-year-old killed after fight over dog barking during India-Australia match in Bengaluru.