കാലവർഷം വരുന്നതിന് മുമ്പേ ബെംഗളൂരുവിൽ റെക്കോഡ് മഴ! ഇനിയങ്ങോട്ട് തണുത്ത് വിറയ്ക്കും...

പ്രീമൺസൂൺ സമയത്തെ മഴയുടെ അളവ് താരതമ്യേന കുറവായിരിക്കുമെങ്കിലും ഇത്തവണ കൂടുതൽ മഴ ലഭിച്ചെന്നാണ് കണക്കുകൾ പറയുന്നത്.

ബെംഗളൂരു: കാലവർഷം എത്തുന്നതിന് മുൻപേ ബെംഗളൂരു നഗരത്തിൽ ലഭിച്ചത് റെക്കോർഡ് മഴ. ജൂൺ ആദ്യവാരം കാലവർഷം ആരംഭിക്കുന്നതിന് മുമ്പ് തന്നെ ബെംഗളൂരുവിൽ വാർഷിക മഴയുടെ 35 ശതമാനവും ലഭിച്ചെന്നാണ് കാലാവസ്ഥ നിരീക്ഷണ കേന്ദ്രത്തിന്റെ റിപ്പോർട്ട്. വാർഷിക മഴയുടെ ശരാശരി 98 സെന്റിമീറ്റർ ആയിരിക്കെ, ഇതുവരെ 35 സെന്റിമീറ്റർ മഴ ലഭിച്ചുവെന്നും റിപ്പോർട്ടിൽ പറയുന്നു.

ജൂൺ മുതൽ സെപ്റ്റംബർ വരെ നീളുന്ന തെക്കു പടിഞ്ഞാറൻ മൺസൂൺ ആരംഭിക്കാനിരിക്കെയാണ് ബെംഗളൂരുവിന് ആശ്വാസമേകുന്ന റിപ്പോർട്ടുകൾ പുറത്തുവരുന്നത്. ജൂൺ മുതൽ സെപ്റ്റംബർ വരെയുള്ള തെക്ക് പടിഞ്ഞാറൻ മൺസൂണിലും, നവംബർ മുതൽ ഡിസംബർ വരെയുള്ള വടക്ക് പടിഞ്ഞാറൻ മൺസൂണിലുമാണ് നഗരത്തിൽ കനത്ത മഴ പെയ്യാറുള്ളത്. ഇതിനിടെയിലുള്ള പ്രീമൺസൂൺ സമയത്തും മഴ പെയ്യും. പ്രീമൺസൂൺ സമയത്തെ മഴയുടെ അളവ് താരതമ്യേന കുറവായിരിക്കുമെങ്കിലും ഇത്തവണ കൂടുതൽ മഴ ലഭിച്ചെന്നാണ് കണക്കുകൾ പറയുന്നത്.

ജൂൺ നാല് തിങ്കളാഴ്ച മുതൽ ബെംഗളൂരുവിൽ തെക്ക് പടിഞ്ഞാറൻ മൺസൂൺ എത്തുമെന്നാണ് കാലാവസ്ഥ നിരീക്ഷകർ അറിയിച്ചത്. ഇതിനുപിന്നാലെയുള്ള ദിവസങ്ങളിൽ കനത്ത മഴയോടൊപ്പം ഇടിമിന്നലിനും സാദ്ധ്യതയുണ്ട്. വരുംദിവസങ്ങളിൽ നഗരത്തിലെ താപനില 21 ഡിഗ്രി സെൽഷ്യസ് വരെ താഴ്ന്നേക്കാം.

തിങ്കളാഴ്ച മുതൽ മൺസൂൺ എത്തുന്നതിനാൽ ബെംഗളൂരു നഗരത്തിൽ വെള്ളപ്പൊക്ക സാദ്ധ്യതയുണ്ടെന്ന് ബന്ധപ്പെട്ടവർ മുന്നറിയിപ്പ് നൽകിയിട്ടുണ്ട്. ബെംഗളൂരുവിലെ എട്ട് മേഖലകളിൽ വെള്ളപ്പൊക്കത്തിന് സാദ്ധതയുണ്ടെന്നാണ് സംസ്ഥാന ദുരന്ത നിവാരണ അതോറിറ്റി മുന്നറിയിപ്പ് നൽകിയിരിക്കുന്നത്.

English summary

Bengaluru already got 35% of annual rainfall.