ബെംഗളൂരിൽ മഴ കനക്കുന്നു; ചൊവ്വാഴ്ച റെഡ് അലർട്ട്,. അതീവ ജാഗ്രത..മുന്നറിയിപ്പുമായി ട്രാഫിക് പോലീസ്

ബെംഗളൂരു കർണാടകയുടെ മറ്റ് ഭാഗങ്ങളിലും ചൊവ്വാഴ്ച മുതൽ മഴ ശക്തമാകുമെന്ന് കാലാവസ്ഥാ വകുപ്പ്. നാളെ (ചൊവ്വാഴ്ച) തെക്കൻ കർണാടകയിലും 10 ന് സംസ്ഥാനത്തൊട്ടാകെയും റെഡ് അലർട്ട് പ്രഖ്യാപിച്ചിട്ടുണ്ട്.11ന് സംസ്ഥാനത്തുടനീളം ഓറഞ്ച് അലർട്ട് തുടരും.

തിങ്കളാഴ്ച തീരദേശ കർണാടകയിൽ റെഡ് അലർട്ടാണ്. തെക്കൻ, വടക്കൻ കർണാടകയിൽ ഓറഞ്ച് അലർട്ടും നിലവിലുണ്ട്. അടുത്ത ദിവസങ്ങളിലും സംസ്ഥാനത്ത് ശക്തമായ മഴ ലഭിക്കുമെന്നാണ് കാലാവസ്ഥാ വകുപ്പിന്റെ പ്രവചനം.

കർണാടകയുടെ പകുതിയിലധികം പ്രദേശങ്ങളിൽ കാലവർഷം എത്തിക്കഴിഞ്ഞു. കുടക് ജില്ലയിൽ വ്യാഴാഴ്ച കാലവർഷം ആരംഭിച്ചതായി വകുപ്പ് അറിയിച്ചു. കാലവർഷം കൂടുതൽ മേഖലകളിലേക്ക് വ്യാപിക്കുന്ന സാഹചര്യത്തിലാണ് മഴ മുന്നറിയിപ്പ്.

അതേസമയം സംസ്ഥാനത്ത് ഇത്തവണ നല്ല വേനൽമഴ ലഭിച്ചിരുന്നു. 125 മില്ലി മീറ്റർ മഴയാണ് ലഭിച്ചത്. മേഖലാതല കണക്കുകൾ പ്രകാരം വടക്കൻ കർണാടകയിൽ 42 ശതമാനം അധിക മഴ ലഭിച്ചു. തീരദേശ മേഖലകളിൽ 80 മുതൽ 110 മില്ലിമീറ്റർ വരെ മഴ രേഖപ്പെടുത്തി.തെക്കൻ കർണാടകയിൽ മഴ ശരാശരിയേക്കാൾ നേരിയ തോതിൽ കുറവായിരുന്നു.

കനത്ത മഴയ്ക്ക് സാധ്യത; ബെംഗളൂരുവിൽ യാത്രാ മുന്നറിയിപ്പുമായി ട്രാഫിക് പോലീസ്

ബെംഗളൂരു: കനത്ത മഴയ്ക്ക് സാധ്യതയുള്ള സാഹചര്യത്തിൽ ബെംഗളൂരുവിൽ ഗതാഗത തടസങ്ങളും വെള്ളക്കെട്ടും ഉണ്ടാകാമെന്ന് കാലാവസ്ഥാ വകുപ്പ് മുന്നറിയിപ്പ് നൽകി. നഗരത്തിൽ യാത്ര ചെയ്യുന്നവർ ജാഗ്രത പാലിക്കണമെന്ന് ട്രാഫിക് പോലീസ് അറിയിച്ചു.

അത്യാവശ്യമല്ലാത്ത യാത്രകൾ പരമാവധി ഒഴിവാക്കണമെന്നും വെള്ളക്കെട്ടുള്ള റോഡുകളിൽ വാഹനം സാവധാനത്തിൽ ഓടിക്കണമെന്നും നിർദേശമുണ്ട്. വെള്ളം കയറിയ റോഡുകളിലൂടെ വാഹനങ്ങൾ കടത്തിവിടരുതെന്നും റോഡുകളിലെ സാഹചര്യങ്ങൾ നിരന്തരം ശ്രദ്ധിക്കണമെന്നും പോലീസ് അഭ്യർഥിച്ചു.

തത്സമയ ട്രാഫിക് വിവരങ്ങൾ ലഭിക്കുന്നതിനായി ബി.ടി.പി ആസ്ട്രാം (BTP ASTraM) ആപ്പ് ഉപയോഗിക്കാനും പോലീസിന്റെ ഔദ്യോഗിക സോഷ്യൽ മീഡിയ പേജുകൾ പരിശോധിക്കാനും നിർദേശിച്ചിട്ടുണ്ട്. റൂട്ട് മാറ്റങ്ങൾ ഉൾപ്പെടെയുള്ള വിവരങ്ങൾ ഇതിലൂടെ ലഭ്യമാകും.

ആദ്യഘട്ടത്തിൽ നേരിയ മഴ ലഭിക്കുമെങ്കിലും ചില പ്രദേശങ്ങളിൽ ശക്തമായ മഴയ്ക്ക് സാധ്യതയുണ്ടെന്നാണ് വിലയിരുത്തൽ. മഴയുമായി ബന്ധപ്പെട്ട സാഹചര്യങ്ങൾ നിരീക്ഷിച്ചുവരികയാണെന്നും ഗതാഗത തടസങ്ങൾ നേരിടാൻ ആവശ്യമായ ഒരുക്കങ്ങൾ നടത്തിയിട്ടുണ്ടെന്നും ട്രാഫിക് പോലീസ് അറിയിച്ചു.

തെക്കുപടിഞ്ഞാറൻ കാലവർഷം രാജ്യത്ത് കൂടുതൽ സജീവമാകുകയാണ്. കർണാടക, തമിഴ്നാട്, ഗോവ എന്നിവിടങ്ങളിൽ കാലവർഷം എത്തിയിട്ടുണ്ട്. മഹാരാഷ്ട്ര, ആന്ധ്രാപ്രദേശ് എന്നിവിടങ്ങളിലേക്കും കാലവർഷം വ്യാപിച്ചുകൊണ്ടിരിക്കുകയാണെന്ന് ഇന്ത്യൻ കാലാവസ്ഥാ വകുപ്പ് (IMD) അറിയിച്ചു. വരും ദിവസങ്ങളിൽ മഴ ശക്തമാകാൻ അനുകൂല സാഹചര്യമുണ്ടെന്നും വകുപ്പ് വ്യക്തമാക്കി.