ബെംഗളൂരിൽ ഇന്ന് കനത്ത ഗതാഗത നിയന്ത്രണം; ഈ വഴി വാഹനങ്ങൾ അനുവദിക്കില്ല, സ്കൂൾ സമയത്തിലും മാറ്റം

കർണാടക മുഖ്യമന്ത്രിയായി ഡികെ ശിവകുമാറിൻ്റെ സത്യപ്രതിജ്ഞാ ചടങ്ങിൻ്റെ പശ്ചാത്തലത്തിൽ ബംഗളൂരുവിൽ ഗതാഗത നിയന്ത്രണങ്ങൾ ഏർപ്പെടുത്തി. വൈകുന്നേരം 4 മണിക്ക് ലോക് ഭവനിലെ ഗ്ലാസ് ഹൗസിലാണ് ചടങ്ങ് നടക്കുക. രാജ്യത്തിന്റെ വിവിധ ഭാഗങ്ങളിൽ നിന്ന് പ്രമുഖ നേതാക്കളും വിവിഐപികളും പങ്കെടുക്കുമെന്നതിനാൽ നഗരത്തിൽ ശക്തമായ സുരക്ഷാ ക്രമീകരണങ്ങളാണ് ഒരുക്കിയിരിക്കുന്നതെന്ന് ട്രാഫിക് പോലീസ് അറിയിച്ചു. ചടങ്ങിലേക്ക് ക്ഷണിക്കപ്പെട്ടവർക്ക് മാത്രമാണ് പ്രവേശനം അനുവദിച്ചിരിക്കുന്നത്.

സിബിഡി മേഖലയിലാകെ വലിയ ഗതാഗതക്കുരുക്ക് ഉണ്ടാകാൻ സാധ്യതയുള്ളതിനാൽ പൊതുജനങ്ങൾ അത്യാവശ്യ യാത്രകൾ ഒഴിവാക്കുകയോ മുൻകൂട്ടി യാത്ര ആസൂത്രണം ചെയ്യുകയോ വേണമെന്നാണ് ട്രാഫിക് പോലീസിന്റെ നിർദേശം ഉച്ചയ്ക്ക് 12 മണി മുതൽ രാത്രി 8 മണിവരെ കബ്ബൺ റോഡ്, ഡോ. ബി.ആർ. അംബേദ്കർ റോഡ്, റേസ് കോഴ്‌സ് റോഡ്, ക്വീൻസ് റോഡ്, ലോക് ഭവനിലേക്കുള്ള സമീപ റോഡുകൾ എന്നിവിടങ്ങളിൽ വാഹന ഗതാഗതത്തിന് നിയന്ത്രണം ഏർപ്പെടുത്തും.

സമയനഷ്ടവും ഗതാഗതക്കുരുക്കും ഒഴിവാക്കുന്നതിനായി യാത്രക്കാർക്ക് ബദൽ മാർഗങ്ങളും പോലീസ് നിർദേശിച്ചിട്ടുണ്ട്. ശിവജിനഗർ, കണ്ണിംഗ്ഹാം റോഡ്, നൃപതുംഗ റോഡ്, ശിവാനന്ദ ജംഗ്ഷൻ, ഔട്ടർ റിംഗ് റോഡ് എന്നിവ വഴി യാത്ര ചെയ്യുന്നതാണ് ഉചിതമെന്ന് ട്രാഫിക് വിഭാഗം അറിയിച്ചു. നഗരത്തിന്റെ കിഴക്കൻ മേഖലകളിൽ നിന്ന് കെംപഗൗഡ അന്താരാഷ്ട്ര വിമാനത്താവളത്തിലേക്കും ഹെബ്ബാളിലേക്കും പോകുന്ന വാഹനങ്ങളും വഴിതിരിച്ചുവിടും.

ചടങ്ങിനോടനുബന്ധിച്ച് നഗരത്തിലെ പ്രധാന റോഡുകളിലടക്കം പാർക്കിംഗിനും കർശന നിയന്ത്രണങ്ങളുണ്ട്. അംബേദ്കർ റോഡ്, പാലസ് റോഡ്, റേസ് കോഴ്‌സ് റോഡ്, ക്വീൻസ് റോഡ്, കസ്തൂർബാ റോഡ്, കബ്ബൺ റോഡ്, കബ്ബൺ പാർക്കിനുള്ളിലെ റോഡുകൾ എന്നിവയുൾപ്പെടെ ഏകദേശം 20 റോഡുകളിൽ പാർക്കിംഗ് പൂർണമായും നിരോധിച്ചിട്ടുണ്ട്. നിയമലംഘനം നടത്തുന്ന വാഹനങ്ങൾ പിടിച്ചെടുക്കുകയും പിഴ ഈടാക്കുകയും ചെയ്യുമെന്ന് അധികൃതർ മുന്നറിയിപ്പ് നൽകി.

ചടങ്ങിനായി പ്രത്യേക പാസ് ലഭിച്ച വാഹനങ്ങൾക്ക് വിധാൻ സൗധ, വികാസ് സൗധ, രാജ് ഭവൻ, നെഹ്റു പ്ലാനറ്റേറിയം എന്നിവിടങ്ങളിൽ പാർക്കിംഗ് സൗകര്യം ഒരുക്കിയിട്ടുണ്ട്. പാസ് ഇല്ലാത്തവർക്ക് കാന്തീരവ സ്റ്റേഡിയം, യുബി സിറ്റി, ശിവാജിനഗർ മൾട്ടി ലെവൽ പാർക്കിംഗ്, ഗവൺമെന്റ് ആർട്സ് കോളേജ്, പാലസ് ഗ്രൗണ്ട്സ് തുടങ്ങിയ കേന്ദ്രങ്ങളിലാണ് വാഹനങ്ങൾ പാർക്ക് ചെയ്യാൻ അനുമതി നൽകുക.

ഇതിന് പുറമെ ഉച്ചയ്ക്ക് 12 മണി മുതൽ രാത്രി 10 മണിവരെ ബംഗളൂരു നഗരപരിധിക്കുള്ളിൽ കനത്ത വാഹനങ്ങൾക്ക് പ്രവേശന വിലക്കും ഏർപ്പെടുത്തിയിട്ടുണ്ട്. ചരക്ക് വാഹനങ്ങൾക്കും വലിയ ട്രക്കുകൾക്കും നഗരത്തിലേക്ക് പ്രവേശനം അനുവദിക്കില്ല. നഗരത്തിൽ വിവിധ ഭാഗങ്ങളിൽ സുരക്ഷാ പരിശോധനയും വാഹന പരിശോധനയും ശക്തമാക്കിയിട്ടുണ്ട്.

ഐടി കമ്പനികൾ, സ്വകാര്യ സ്ഥാപനങ്ങൾ, ഓഫിസുകൾ എന്നിവിടങ്ങളിലെ ജീവനക്കാർ സാധ്യമെങ്കിൽ വർക്ക് ഫ്രം ഹോം സംവിധാനങ്ങൾ ഉപയോഗിക്കണമെന്ന് ട്രാഫിക് പോലീസ് അനൗദ്യോഗികമായി നിർദേശിക്കുന്നതായും റിപ്പോർട്ടുകളുണ്ട്. വൈകുന്നേര സമയത്ത് നഗരമധ്യത്തിൽ വലിയ തിരക്കും വാഹനനിരയും പ്രതീക്ഷിക്കുന്നതിനാൽ യാത്രക്കാർ മെട്രോ ഉൾപ്പെടെയുള്ള പൊതുഗതാഗത സംവിധാനങ്ങൾ പരമാവധി ഉപയോഗിക്കണമെന്നും അധികൃതർ അഭ്യർത്ഥിച്ചു.

ഗതാഗതക്കുരുക്ക് ഉണ്ടാകുമെന്ന മുന്നറിയിപ്പിനെ തുടർന്ന് ചില സ്കൂളുകൾ ക്ലാസ് സമയങ്ങളിലും മാറ്റം വരുത്തി. ഡെൽഹി പബ്ലിക് സ്കൂൾ-ബാംഗ്ലൂർ സൗത്ത് ബുധനാഴ്ച ഓൺലൈൻ ക്ലാസുകൾ നടത്തുമെന്ന് അധികൃതർ അറിയിച്ചു. ട്രാഫിക് പോലീസിന്റെ മുന്നറിയിപ്പും നഗരത്തിലെ വിവിധ ഭാഗങ്ങളിലുണ്ടാകാനിടയുള്ള കനത്ത വാഹനത്തിരക്കും കണക്കിലെടുത്താണ് തീരുമാനം എടുത്തതെന്ന് സ്കൂൾ പ്രിൻസിപ്പൽ അനിത ബിജേഷ് വ്യക്തമാക്കി. അതേസമയം, ബിഷപ്പ് കോട്ടൺ ബോയ്സ് സ്കൂൾ സ്കൂൾ സമയം ഉച്ചവരെയാക്കി. ക്ലാസുകൾ ഉച്ചയ്ക്ക് 12.30 ന് അവസാനിപ്പിക്കുമെന്നും സ്കൂൾ ബസുകൾ 12.45 ന് പുറപ്പെടുമെന്നും സ്കൂൾ രക്ഷിതാക്കളെ അറിയിച്ചു. സ്കൂൾ ഓഫീസ് ഉച്ച കഴിഞ്ഞ് 2 മണിക്ക് അടയ്ക്കുമെന്നും അറിയിപ്പിൽ വ്യക്തമാക്കിയിട്ടുണ്ട്