ബെംഗളൂരു-ഹൈദരാബാദ് ബുള്ളറ്റ് ട്രെയിൻ; വിമാനത്തിനേക്കാൾ വേഗത്തിലെത്താം,നഗരാന്തര യാത്രക്ക് 2 മണിക്കൂർ മതി

By Desk

Updated: Friday, May 15, 2026, 23:45 [IST]

കർണാടക മന്ത്രിസഭ തത്വത്തിൽ അംഗീകാരം നൽകിയതോടെ ബെംഗളൂരു-ഹൈദരാബാദ് ബുള്ളറ്റ് ട്രെയിൻ പദ്ധതിയെ കുറിച്ചുളള ചർച്ചകൾ വീണ്ടും സജീവം. ഭൂമി ഏറ്റെടുക്കൽ, പാത നിർണയം, സ്റ്റേഷൻ വികസനം തുടങ്ങിയ നടപടികളിലേക്ക് പദ്ധതി ഉടൻ കടക്കും. നിലവിൽ മണിക്കൂറുകൾ ചെലവഴിച്ച് പോകേണ്ട നഗരാന്തര യാത്രകൾ വെറും രണ്ട് മണിക്കൂറിനുള്ളിൽ പൂർത്തിയാക്കാമെന്നതാണ് പദ്ധതിയുടെ പ്രധാന ആകർഷണം.

ഹൈദരാബാദ്-ബെംഗളൂരു ബുള്ളറ്റ് ട്രെയിൻ ഇടനാഴി ഏകദേശം 607 കിലോമീറ്റർ ദൈർഘ്യമുള്ളതാണ്. തെലങ്കാന, ആന്ധ്രാപ്രദേശ്, കർണാടക എന്നീ മൂന്ന് സംസ്ഥാനങ്ങളിലൂടെ കടന്നുപോകുന്ന ഈ പാതയിൽ കർണാടകയുടെ വിഹിതം ഏകദേശം 101 കിലോമീറ്ററാണ്. തുമകൂരു, ചിക്കബല്ലാപ്പൂർ, ബെംഗളൂരു റൂറൽ ജില്ലകളിലൂടെയാണ് ഈ ഭാഗം കടന്നുപോകുന്നത്. നിലവിൽ റോഡിലോ സാധാരണ ട്രെയിനിലോ യാത്ര ചെയ്യാൻ 8 മുതൽ 12 മണിക്കൂർ വരെ വേണ്ടിവരുന്ന ദൂരം, ബുള്ളറ്റ് ട്രെയിൻ യാഥാർത്ഥ്യമായാൽ 2 മണിക്കൂറും 10 മിനിറ്റും കൊണ്ട് പിന്നിടാനാകും.

ചിക്കബല്ലാപ്പൂരിലെ ആലിപ്പൂർ, ദേവനഹള്ളിയിലെ കെംപെഗൗഡ വിമാനത്താവളത്തിന് സമീപം, ഹൊസകോട്ടയിലെ കൊടിഹള്ളി എന്നിവിടങ്ങളിലാണ് നിർദ്ദിഷ്ട ഇടനാഴിയിലെ സ്റ്റേഷനുകൾ. പൂർണമായും ഉയർത്തിപ്പണിയുന്ന പ്രത്യേക ട്രാക്കിലൂടെയായിരിക്കും ട്രെയിനുകളുടെ സർവീസ്. അതുവഴി വേഗതയും സുരക്ഷയും ഉറപ്പാക്കാനാണ് ലക്ഷ്യം. ബെംഗളൂരു-ഹൈദരാബാദ് റൂട്ടിലെ ഹ്രസ്വദൂര വിമാന സർവീസുകൾക്ക് പോലും ഇത് വെല്ലുവിളിയാകുമെന്നാണ് വിദഗ്ധരുടെ വിലയിരുത്തൽ. വിമാനയാത്രയ്ക്ക് സമയം കുറവാണെങ്കിലും വിമാനത്താവളത്തിലെ സുരക്ഷാ പരിശോധനകളും യാത്രാ നടപടിക്രമങ്ങളും കാരണം ആളുകൾക്ക് വലിയ സമയം നഷ്ടമാകുന്നുണ്ട്. ബുള്ളറ്റ് ട്രെയിൻ ഈ പ്രശ്നത്തിന് വലിയൊരു പരിഹാരമാകുമെന്നാണ് വിലയിരുത്തൽ.

ഇതോടൊപ്പം തന്നെ ബെംഗളൂരു-ചെന്നൈ-മൈസൂരു അതിവേഗ റെയിൽ പദ്ധതിയും മുന്നോട്ട് പോകുന്നുണ്ട്. 435 മുതൽ 463 കിലോമീറ്റർ വരെ ദൈർഘ്യമുള്ള ഈ ഇടനാഴിയിൽ ബെംഗളൂരു-ചെന്നൈ ഭാഗം മാത്രം ഏകദേശം 306 കിലോമീറ്ററാണ്. ഇപ്പോൾ 5 മുതൽ 7 മണിക്കൂർ വരെ എടുക്കുന്ന ഈ യാത്ര, അതിവേഗ ട്രെയിൻ വഴി വെറും 1 മണിക്കൂർ 15 മിനിറ്റിൽ പൂർത്തിയാക്കാനാകും.

ഈ പാതയിലെ പ്രധാന സ്റ്റേഷനുകൾ കെജിഎഫ്, കൊടിഹള്ളി, വൈറ്റ്ഫീൽഡ്, ബൈയപ്പനഹള്ളി എന്നിവിടങ്ങളിലായിരിക്കും. ഹൈദരാബാദ്, ചെന്നൈ ഇടനാഴികൾ ഒന്നിക്കുന്നതിനാൽ കൊടിഹള്ളി ഭാവിയിൽ വലിയ റെയിൽ കൈമാറ്റ കേന്ദ്രമായി മാറും. ഇവിടെ വൻ ഡിപ്പോയും അറ്റകുറ്റപ്പണി കേന്ദ്രവും സ്ഥാപിക്കാനാണ് പദ്ധതി.

രണ്ട് ബുള്ളറ്റ് ട്രെയിൻ പദ്ധതികൾക്കും ആവശ്യമായ ഭൂമി ഏറ്റെടുക്കൽ നടപടികൾ നിരീക്ഷിക്കാൻ കർണാടക സർക്കാർ പ്രത്യേക നോഡൽ ഓഫീസറെ നിയമിച്ചിട്ടുണ്ട്. ഏകദേശം 1,757 ഹെക്ടർ ഭൂമിയാണ് വിവിധ ജില്ലകളിലായി ഏറ്റെടുക്കേണ്ടിവരുക. പദ്ധതി യാഥാർത്ഥ്യമാകുമ്പോൾ ബെംഗളൂരു ദക്ഷിണേന്ത്യയിലെ ഏറ്റവും വലിയ അതിവേഗ റെയിൽ ഹബ്ബുകളിലൊന്നായി മാറുമെന്നാണ് പ്രതീക്ഷ.

ബൈയപ്പനഹള്ളി സ്റ്റേഷനെ നമ്മ മെട്രോ, സബർബൻ റെയിൽ ശൃംഖലകൾ എന്നിവയുമായി ബന്ധിപ്പിക്കാനും പദ്ധതിയുണ്ട്. അതുവഴി യാത്രക്കാർക്ക് അവസാന മൈൽ കണക്റ്റിവിറ്റി എളുപ്പമാക്കാനാണ് ശ്രമം.

ഈ പദ്ധതിയുടെ വലിയ ഗുണഭോക്താക്കളിൽ ഒന്നായി തുമകൂരു ജില്ല മാറുമെന്നാണ് വിലയിരുത്തൽ. നിർദ്ദേശിച്ച പാതയിൽ സിറ മേഖലയിൽ സ്റ്റേഷൻ വരാൻ സാധ്യതയുണ്ട്. അതോടെ തുമകൂരുവിൽ നിന്ന് ബെംഗളൂരുവിലേക്കുള്ള യാത്ര വെറും 20 മുതൽ 30 മിനിറ്റായി ചുരുങ്ങും. ഹൈദരാബാദിലേക്കുള്ള യാത്രക്കും രണ്ട് മണിക്കൂറിൽ താഴെ മതിയാകും. ഇത് ദൈനംദിന ജോലിക്കായി നഗരാന്തര യാത്ര ചെയ്യുന്നവർക്കും വലിയ ആശ്വാസമാകും.

ചെന്നൈ-ബെംഗളൂരു വ്യാവസായിക ഇടനാഴിയുടെ ഭാഗമായ തുമകൂരുവിലേക്ക് കൂടുതൽ നിക്ഷേപങ്ങൾ എത്താനും സാധ്യതയുണ്ട്. ബെംഗളൂരുവിലെയും ഹൈദരാബാദിലെയും കമ്പനികൾ പുതിയ വ്യാവസായിക യൂണിറ്റുകൾ ഇവിടെ ആരംഭിക്കാനിടയുണ്ടെന്നാണ് വിലയിരുത്തൽ. സ്റ്റേഷൻ പ്രദേശങ്ങൾക്ക് ചുറ്റുമുള്ള ഭൂമി വില ഉയരുകയും റിയൽ എസ്റ്റേറ്റ് മേഖല സജീവമാകുകയും ചെയ്യും.

ഗതാഗതം, ഹോട്ടൽ, സർവീസ് മേഖലകൾ എന്നിവിടങ്ങളിൽ പുതിയ തൊഴിലവസരങ്ങളും ഉണ്ടാകുമെന്നാണ് പ്രതീക്ഷ. വിദ്യാഭ്യാസ മേഖലയിലും വലിയ മാറ്റമുണ്ടാകാം. ഹൈദരാബാദിലും ആന്ധ്രാപ്രദേശിലും നിന്നുള്ള കൂടുതൽ വിദ്യാർത്ഥികൾ തുമകൂരുവിലെ വിദ്യാഭ്യാസ സ്ഥാപനങ്ങളിലേക്ക് എത്താൻ സാധ്യതയുണ്ട്. ബെംഗളൂരുവിലെയും ഹൈദരാബാദിലെയും മെച്ചപ്പെട്ട ആരോഗ്യ സേവനങ്ങളിലേക്കുള്ള പ്രവേശനവും എളുപ്പമാകും.

ചിക്കബല്ലാപ്പൂർ ജില്ലക്കും പദ്ധതി വലിയ മാറ്റങ്ങൾ കൊണ്ടുവരും. ആലിപ്പൂർ സ്റ്റേഷനിൽ നിന്ന് ദേവനഹള്ളിയിലേക്കോ ഹൊസകോട്ടയിലേക്കോ വെറും 15 മുതൽ 20 മിനിറ്റിനുള്ളിൽ എത്താൻ സാധിക്കും. നിലവിൽ 8 മുതൽ 10 മണിക്കൂർ വരെ വേണ്ടിവരുന്ന ഹൈദരാബാദ് റോഡ് യാത്ര ഏകദേശം 2 മണിക്കൂറായി ചുരുങ്ങും.

പഴങ്ങൾ, പൂക്കൾ, പച്ചക്കറികൾ എന്നിവയുടെ കൃഷിക്ക് പ്രശസ്തമായ ഈ മേഖലയിലെ കാർഷിക ഉൽപ്പന്നങ്ങൾ വേഗത്തിൽ നഗര വിപണികളിലെത്തിക്കാനും അതിവേഗ റെയിൽ സഹായിക്കും. ബെംഗളൂരുവിന്റെ ഐടി, വ്യാവസായിക വളർച്ച ചിക്കബല്ലാപ്പൂരിലേക്കും ഗൗരിബിദനൂരിലേക്കും വ്യാപിക്കാനും സാധ്യതയുണ്ട്.

ദേവനഹള്ളി വിമാനത്താവളത്തിലേക്കുള്ള നേരിട്ടുള്ള കണക്റ്റിവിറ്റി സമീപ ജില്ലകളിലെ ജനങ്ങൾക്ക് വലിയ സൗകര്യമാകും. അതേസമയം കൊടിഹള്ളിയിൽ രൂപപ്പെടുന്ന ജംഗ്ഷൻ സ്റ്റേഷൻ ബെംഗളൂരു റൂറൽ ജില്ലയെ പദ്ധതിയുടെ പ്രധാന കേന്ദ്രമാക്കി മാറ്റും. ഇവിടെ നിർദ്ദേശിച്ചിരിക്കുന്ന ഡിപ്പോകളും അറ്റകുറ്റപ്പണി കേന്ദ്രങ്ങളും പരിശീലന കേന്ദ്രങ്ങളും ആയിരക്കണക്കിന് തൊഴിലവസരങ്ങൾ സൃഷ്ടിക്കുമെന്നാണ് പ്രതീക്ഷ.

ഹൊസകോട്ട, ദേവനഹಳ್ಳಿ, ദൊഡ്ഡബല്ലാപ്പൂർ എന്നിവിടങ്ങളിലെ വ്യാവസായിക മേഖലകളിലേക്ക് കൂടുതൽ ബഹുരാഷ്ട്ര കമ്പനികളെ ആകർഷിക്കാനും പദ്ധതി സഹായകമാകും. സ്റ്റേഷനുകൾക്ക് ചുറ്റുമായി പുതിയ സ്മാർട്ട് നഗരങ്ങളും താമസ മേഖലകളും ഉയർന്നുവരാൻ സാധ്യതയുണ്ട്.

അതേസമയം ബെംഗളൂരു-ചെന്നൈ ബുള്ളറ്റ് ട്രെയിൻ ഇടനാഴിയും ഇരു നഗരങ്ങളുടെയും സാമ്പത്തിക ബന്ധത്തെ കൂടുതൽ ശക്തിപ്പെടുത്തും. നിലവിൽ 5-6 മണിക്കൂർ ട്രെയിൻ യാത്രയും 6-7 മണിക്കൂർ റോഡ് യാത്രയും ആവശ്യമായ ദൂരം വെറും 75 മിനിറ്റിൽ പിന്നിടാനാകുന്നത് ബിസിനസ് മേഖലക്ക് വലിയ മാറ്റമാകും.

ബെംഗളൂരുവിന്റെ സാങ്കേതിക മേഖലയുടെയും ചെന്നൈയുടെ വാഹന നിർമാണ വ്യവസായത്തിന്റെയും സഹകരണം കൂടുതൽ ശക്തമാകുമെന്നാണ് വിലയിരുത്തൽ. കെജിഎഫ്, ഹൊസകോട്ട, വൈറ്റ്ഫീൽഡ് തുടങ്ങിയ പ്രദേശങ്ങളിലെ വ്യാവസായിക ഭൂമികൾക്ക് ആവശ്യകത കൂടാനും സാധ്യതയുണ്ട്.

കോലാർ, ഹൊസകോട്ട പോലുള്ള നഗരങ്ങളിൽ താമസിച്ച് അതിവേഗ ട്രെയിനിലൂടെ ബെംഗളൂരുവിലേക്ക് ജോലി ആവശ്യങ്ങൾക്കായി യാത്ര ചെയ്യാൻ കൂടുതൽ ആളുകൾ തയ്യാറാകുമെന്നാണ് നഗരാസൂത്രകർ പറയുന്നത്. അതുവഴി ബെംഗളൂരുവിലെ ഗതാഗത തിരക്ക് കുറയ്ക്കാനും നഗര വികസനം പരിസര പ്രദേശങ്ങളിലേക്ക് വ്യാപിപ്പിക്കാനും ഈ പദ്ധതി സഹായിക്കുമെന്ന പ്രതീക്ഷയിലാണ് സർക്കാർ.