ബെംഗളൂരു മെട്രോയുടെ ഏഴയലത്ത് വരില്ല ലണ്ടന്‍ മെട്രോ; അനുഭവം പറഞ്ഞ് യുവതി; കാരണങ്ങള്‍ ഇതാണ്

നഗരയാത്ര ഏറ്റവും എളുപ്പമാക്കുക എന്നതാണ് മെട്രോ ട്രെയിനുകളുടെ ദൗത്യം. ട്രാഫിക് കുരുക്കില്‍പെടാതെ, പോക്കറ്റ് കാലിയാകാതെ അതിവേഗം ലക്ഷ്യസ്ഥാനത്ത് എത്താം എന്നതാണ് മെട്രോയുടെ ഏറ്റവും വലിയ ഗുണം. പലപ്പോഴും ലണ്ടന്‍, ടോക്കിയോ പോലുള്ള വിദേശ നഗരങ്ങളിലെ മെട്രോകളുടെ വാഴ്ത്തുപാട്ടുകളാണ് നാം കേള്‍ക്കാറുള്ളത്. ഇന്ത്യന്‍ നഗരങ്ങളിലെ മെട്രോകളെ ആക്ഷേപിക്കുന്ന റിപ്പോര്‍ട്ടുകളും ഇടയ്ക്കിടെ വരാറുണ്ട്. എന്നാല്‍ വിദേശ രാജ്യത്തെ മെട്രോയിലും ബെംഗളൂരു മെട്രോയിലും യാത്ര ചെയ്ത യുവതി നടത്തിയ താരതമ്യം സമൂഹ മാധ്യമങ്ങളില്‍ വലിയ തോതില്‍ ചര്‍ച്ചയാവുകയാണ്.

ലണ്ടനിലെ പ്രശസ്തമായ അണ്ടര്‍ഗ്രൗണ്ട് ട്രെയിന്‍ സര്‍വീസായ 'ലണ്ടന്‍ ട്യൂബും' ബെംഗളൂരു നമ്മ മെട്രോയും തമ്മിലുള്ള യാത്രാനുഭവമാണ് യുവതി താരതമ്യം ചെയ്തത്. യുകെ സന്ദര്‍ശനത്തിനിടെ ലണ്ടന്‍ മെട്രോയിലുണ്ടായ ബുദ്ധിമുട്ടുകള്‍ വിവരിച്ചുകൊണ്ടാണ് ഇവര്‍ ബെംഗളൂരു മെട്രോയെ പ്രശംസിച്ചത്. ലണ്ടന്‍ മെട്രോയിലെ ചൂടേറിയതും തിരക്കേറിയതുമായ യാത്രയ്ക്ക് ശേഷം ബെംഗളൂരുവിലെ മെട്രോയില്‍ യാത്ര ചെയ്തപ്പോള്‍ അത് വളരെ സുഖകരമായി അനുഭവപ്പെട്ടു എന്നാണ് യുവതി തന്റെ അനുഭവത്തിലൂടെ വ്യക്തമാക്കുന്നത്. വിദേശ രാജ്യങ്ങളിലെ യാത്രാ സൗകര്യങ്ങളാണ് എപ്പോഴും മികച്ചതെന്ന പൊതുധാരണയെ തിരുത്തിക്കുറിക്കുന്നതാണ് ഈ നിരീക്ഷണങ്ങള്‍.

ലണ്ടനിലെ പല ഭൂഗര്‍ഭ ട്രെയിനുകളിലും ശരിയായ വായുസഞ്ചാരമില്ലാത്തതും കഠിനമായ ചൂടും അസഹനീയമായ തിരക്കും തന്നെ ശ്വാസംമുട്ടിച്ചു എന്നാണ് യുവതി പറയുന്നത്. എന്നാല്‍ ബെംഗളൂരുവിലെ മെട്രോയില്‍ സഞ്ചരിച്ചപ്പോള്‍ അവിടുത്തെ വൃത്തിയും മികച്ച രീതിയിലുള്ള ശീതീകരണ സംവിധാനവും വലിയ ആശ്വാസമാണ് നല്‍കിയത്. ലണ്ടന്‍ മെട്രോയിലെ പഴക്കമേറിയ അടിസ്ഥാന സൗകര്യങ്ങളെ അപേക്ഷിച്ച് ബെംഗളൂരുവിലെ ആധുനികമായ സംവിധാനങ്ങള്‍ ഏറെ മുന്നിലാണെന്ന് അവര്‍ ചൂണ്ടിക്കാട്ടുന്നു.

യുവതിയുടെ ഈ അഭിപ്രായം സോഷ്യല്‍ മീഡിയയില്‍ വലിയ ചര്‍ച്ചയായിട്ടുണ്ട്. ലോകത്തിലെ തന്നെ ഏറ്റവും പഴക്കമേറിയ മെട്രോ ശൃംഖലകളില്‍ ഒന്നായ ലണ്ടന്‍ ട്യൂബില്‍ പല ലൈനുകളിലും ഇപ്പോഴും എയര്‍ കണ്ടീഷനിങ് സംവിധാനങ്ങള്‍ പൂര്‍ണമായി ലഭ്യമല്ല എന്നത് ഒരു പ്രധാന പ്രശ്‌നമായി പലരും ചൂണ്ടിക്കാട്ടുന്നത്. പ്രത്യേകിച്ച് വേനല്‍ക്കാലത്ത് ലണ്ടനിലെ ഭൂഗര്‍ഭ യാത്രകള്‍ യാത്രക്കാര്‍ക്ക് കടുത്ത വെല്ലുവിളിയാണ് ഉയര്‍ത്താറുള്ളത്. അതേസമയം, ഇന്ത്യയിലെ പുതിയ മെട്രോകള്‍ ആധുനിക സാങ്കേതിക വിദ്യയോടെയും യാത്രക്കാരുടെ സൗകര്യം മുന്‍നിര്‍ത്തിയും നിര്‍മ്മിച്ചവയായതിനാല്‍ അവ അന്താരാഷ്ട്ര നിലവാരത്തിലുള്ള യാത്രാനുഭവം നല്‍കുന്നുണ്ട്.

യാത്രക്കാരുടെ സൗകര്യത്തിന് മുന്‍ഗണന നല്‍കുന്ന രീതിയിലാണ് ബെംഗളൂരു മെട്രോയുടെ ഇന്റീരിയര്‍. പൂര്‍ണമായും ശീതീകരിച്ച കോച്ചുകള്‍ നഗരത്തിലെ ചൂടില്‍ നിന്നും പൊടിപടലങ്ങളില്‍ നിന്നും യാത്രക്കാര്‍ക്ക് സംരക്ഷണം നല്‍കുന്നു.

ആധുനിക സൗകര്യങ്ങളുടെ കാര്യത്തില്‍ ഇന്ത്യന്‍ മെട്രോകള്‍ വികസിത രാജ്യങ്ങളിലെ പല പ്രമുഖ നഗരങ്ങളോടും കിടപിടിക്കുന്നതാണെന്ന് യുവതിയുടെ അനുഭവം വ്യക്തമാക്കുന്നു. വിദേശ യാത്രയ്ക്ക് ശേഷം സ്വന്തം നാട്ടിലെ സൗകര്യങ്ങളെ ഇത്രത്തോളം മതിപ്പോടെ കാണുന്ന യുവതിയുടെ കാഴ്ചപ്പാട് ഇതിനോടകം തന്നെ നിരവധി പേര്‍ പ്രശംസിക്കുന്നുണ്ട്.

ലോകത്തിലെ തന്നെ ഏറ്റവും വലിയ ഗതാഗതക്കുരുക്കുള്ള നഗരങ്ങളിലൊന്നായ ബെംഗളൂരുവില്‍, റോഡ് മാര്‍ഗം മണിക്കൂറുകളെടുക്കുന്ന യാത്ര മിനിറ്റുകള്‍ക്കുള്ളില്‍ പൂര്‍ത്തിയാക്കാന്‍ മെട്രോ സഹായിക്കുന്നുണ്ട്. സിഗ്‌നലുകളോ മറ്റ് തടസങ്ങളോ ഇല്ലാതെ ലക്ഷ്യസ്ഥാനത്തെത്താം എന്നത് വലിയൊരു ആശ്വാസമാണ്.

സുരക്ഷയുടെ കാര്യത്തിലും ബെംഗളൂരു മെട്രോ ഏറെ മുന്നിലാണ്. എല്ലാ സ്റ്റേഷനുകളിലും ട്രെയിനുകളിലും സിസിടിവി ക്യാമറകളും സുരക്ഷാ ഉദ്യോഗസ്ഥരുടെ സേവനവും ലഭ്യമാണ്. ഇത് രാത്രികാലങ്ങളില്‍ യാത്ര ചെയ്യുന്ന സ്ത്രീകള്‍ക്കും കുട്ടികള്‍ക്കും വലിയൊരു സുരക്ഷിത ബോധം നല്‍കുന്നു. നഗരത്തിന്റെ വിവിധ ഭാഗങ്ങളെ തമ്മില്‍ ബന്ധിപ്പിക്കുന്നതിലും മെട്രോ വലിയ വിജയം കണ്ടിട്ടുണ്ട്. മജസ്റ്റിക് പോലുള്ള പ്രധാന യാത്രാ ഹബ്ബുകളെയും വൈറ്റ്ഫീല്‍ഡ് പോലുള്ള ഐടി മേഖലകളെയും എംജി റോഡ് പോലുള്ള വാണിജ്യ കേന്ദ്രങ്ങളെയും ബന്ധിപ്പിക്കുന്നതിലൂടെ നഗരത്തിന്റെ ഗതാഗത ശൃംഖലയെ ഇത് ശക്തിപ്പെടുത്തിയിട്ടുണ്ട്.