ബെംഗളൂരു-പൂനെ ഗ്രീൻ ഫീൽഡ് എക്സ്പ്രസ് വേ; യാത്രാസമയം 14 ൽ നിന്ന് 7 മണിക്കൂറായി കുറയും

പൂനെ-ബെംഗളൂരു ഗ്രീൻഫീൽഡ് എക്സ്പ്രസ് വേയ്ക്ക് കേന്ദ്രസർക്കാരിന്റെ അന്തിമാനുമതി ഉടൻ ലഭിച്ചേക്കുമെന്ന് റിപ്പോർട്ട്. ചർച്ചകൾ അവസാന ഘട്ടത്തിലാണെന്ന് ഉദ്യോഗസ്ഥരെ ഉദ്ധരിച്ച് ദി ഹൻസ് ഇന്ത്യ ഡോട്ട് കോം റിപ്പോർട്ട് ചെയ്തു. ഏകദേശം 700 കിലോമീറ്റർ ദൈർഘ്യമുള്ളതാണ് ഈ ഇടനാഴി. 45,000 കോടി മുതൽ 50,000 കോടി രൂപ വരെയാണ് പദ്ധതിയുടെ ചെലവ് പ്രതീക്ഷിക്കുന്നത്.

ഏതാനും ആഴ്ചകൾക്കുള്ളിൽ പദ്ധതിയുടെ അലൈൻമെൻ്റ് അനുമതി ലഭിക്കുമെന്നാണ് ഉദ്യോഗസ്ഥർ പറയുന്നത്. ഇത് അംഗീകരിച്ചാൽ ഭൂമി ഏറ്റെടുക്കൽ ഘട്ടത്തിലേക്ക് കടക്കും. തുടർന്ന് നിർമ്മാണ പ്രവർത്തനങ്ങൾ ആരംഭിക്കും. മഹാരാഷ്ട്രയിലെ സത്താറ, സാംഗ്ലി എന്നീ പ്രധാന ജില്ലകളിലൂടെ കടന്ന് ബെലഗാവി വഴി കർണാടകയിലേക്ക് പ്രവേശിക്കുന്നതാണ് ഇടനാഴി. പിന്നീട് വിജയപുര, ദാവൺഗരെ എന്നിവിടങ്ങളിലൂടെ കടന്ന് ഇത് ബെംഗളൂരുവിൽ അവസാനിക്കും.

നിലവിൽ, പൂനെ-ബെംഗളൂരു റോഡ് യാത്രയ്ക്ക് 14 മുതൽ 15 മണിക്കൂർ വരെ സമയമെടുക്കാറുണ്ട്. എന്നാൽ, എക്സ്പ്രസ് വേ പൂർത്തിയാകുന്നതോടെ യാത്രാ സമയം ഏകദേശം 7 മണിക്കൂറായി കുറയും. ഇത് യാത്രക്കാർക്കും ചരക്ക് നീക്കത്തിനും ഒരുപോലെ വലിയ ഉത്തേജനം നൽകും.

ഇടനാഴി സാമ്പത്തികമായും വലിയ രീതിയിൽ മുന്നേറ്റമുണ്ടാക്കാൻ സഹായിക്കുമെന്നാണ് വിലയിരുത്തപ്പെടുന്നത്. മെച്ചപ്പെട്ട കണക്റ്റിവിറ്റി വ്യാവസായിക ക്ലസ്റ്ററുകളിലും ലോജിസ്റ്റിക്സ് പാർക്കുകളിലും വെയർഹൗസിംഗ് ഹബുകളിലും വമ്പൻ നിക്ഷേപം ആകർഷിച്ചേക്കും. പടിഞ്ഞാറൻ മഹാരാഷ്ട്രയും കർണാടകയും തമ്മിലുള്ള വ്യാപാര ബന്ധം ശക്തിപ്പെടുത്തുന്നതിൽ ഈ എക്സ്പ്രസ് വേ നിർണായക പങ്ക് വഹിക്കുമെന്നാണ് അധികൃതർ വിശ്വസിക്കുന്നത്.

വേഗത്തിലുള്ള യാത്രയും മികച്ച റോഡുകളും വിതരണ ശൃംഖല കാര്യക്ഷമമാക്കും. ഇന്ധന, ഗതാഗത ചെലവുകൾ കുറയ്ക്കാനും ഇത് സഹായിക്കും. ഉൽപ്പാദനം മുതൽ കൃഷി വരെയുള്ള വ്യവസായങ്ങൾക്ക് ഇത് പ്രയോജനകരമാകുമെന്ന് വിദഗ്ദ്ധർ ചൂണ്ടിക്കാട്ടുന്നു. ആധുനിക സുരക്ഷാ, ട്രാഫിക് സംവിധാനങ്ങളോടെയാണ് എക്സ്പ്രസ് വേ രൂപകൽപ്പന ചെയ്യുന്നത്, ഇത് സുഗമവും സുരക്ഷിതവുമായ യാത്ര ഉറപ്പാക്കും. അതിവേഗ ഇടനാഴികൾക്കുള്ള വർദ്ധിച്ചുവരുന്ന ആവശ്യം കണക്കിലെടുത്ത്, പൂനെ-ബെംഗളൂരു എക്സ്പ്രസ് വേ മേഖലയുടെ ഒരു പ്രധാന സാമ്പത്തിക ജീവനാഡിയായി മാറുമെന്നാണ് പ്രതീക്ഷ.