ബെംഗളൂരുവിലെ വാടക കേട്ടാൽ തല കറങ്ങും, 2 BHK ഫ്ളാറ്റിന് ഒരു മാസത്തെ വാടക 70000 രൂപ! യുവതിയുടെ ട്വീറ്റ് വൈറൽ

നിരവധി മലയാളികൾ അടക്കം പഠന-ജോലി ആവശ്യങ്ങൾക്കായി താമസിക്കുന്ന നഗരമാണ് ബെംഗളൂരു. അതുകൊണ്ട് തന്നെ ഇവിടെ വാടക വീടുകൾക്കും ഫ്ളാറ്റുകൾക്കും ആവശ്യക്കാരും ഏറെയാണ്. ഇത് മുതലെടുത്ത് കുതിച്ചുയരുന്ന വാടകനിരക്ക് പലപ്പോഴും ചർച്ചയായിട്ടുളളതുമാണ്. അടിസ്ഥാന സൗകര്യങ്ങളുടെ അപര്യാപ്തതകൾ നിലനിൽക്കുമ്പോഴും നഗരത്തിലെ പ്രധാന പ്രദേശങ്ങളിലെ ഉയർന്ന വാടക ന്യായീകരിക്കാനാകുന്നതല്ലെന്നാണ് പലരും ചൂണ്ടിക്കാട്ടുന്നത്.

അതിനിടെ എക്സിൽ മാർക്കറ്റിംഗ് പ്രൊഫഷണലായ ലുബ്ന മൽഹോത്ര എന്ന യുവതി പങ്കുവെച്ച പോസ്റ്റ് വലിയ ചർച്ചയായിരിക്കുകയാണ്. കോറമംഗലയിലെ ഒരു 2 ബെഡ്റൂം ഫ്ലാറ്റിന് 70000 രൂപയാണ് പ്രതിമാസ വാടക ഈടാക്കുന്നതെന്ന് ലുബ്ന ആരോപിക്കുന്നു. ഈ സ്ഥലത്ത് ഗതാഗതക്കുരുക്ക്, തുറന്ന അഴുക്കുചാലുകൾ, തകർന്ന റോഡുകൾ തുടങ്ങിയ പ്രശ്‌നങ്ങൾ നിലനിൽക്കുമ്പോഴാണ് ഇത്രയും ഉയർന്ന വാടക കൊടുക്കേണ്ടി വരുന്നതെന്നും ഇവർ ചൂണ്ടിക്കാട്ടുന്നു.

ലുബ്ന മൽഹോത്രയുടെ ട്വീറ്റ് ഇങ്ങനെയാണ്: "ഒരു 2BHKക്ക് 70000 രൂപയോ? കോറമംഗലയ്ക്ക് ലജ്ജയില്ലേ? ഗതാഗതക്കുരുക്കുണ്ട്, തുറന്ന അഴുക്കുചാലുകളുണ്ട്, റോഡുകൾ തകർന്നിരിക്കുന്നു. എന്തുണ്ടായിട്ടാണ് നമ്മൾ ഇത്രയും ഉയർന്ന തുക നൽകുന്നത്?"

ബെംഗളൂരുവിലെ ഏറ്റവും പ്രശസ്തമായ പ്രദേശങ്ങളിലൊന്നാണ് കോറമംഗല. സ്റ്റാർട്ടപ്പ് സംസ്കാരം, കഫേകൾ, പബ്ബുകൾ, റെസ്റ്റോറന്റുകൾ, നെക്സസ് മാൾ പോലുള്ള ഷോപ്പിംഗ് സെന്ററുകൾ എന്നിവയാൽ കോറമംഗല ശ്രദ്ധേയമാണ്. നഗരത്തിന്റെ ഹൃദയഭാഗത്തുള്ള സ്ഥാനവും സജീവമായ സാമൂഹിക ജീവിതവും യുവാക്കൾക്കും വിദ്യാർത്ഥികൾക്കും ഈ പ്രദേശത്തെ പ്രിയപ്പെട്ടതാക്കുന്നു.

തൊഴിലവസരങ്ങൾ, മികച്ച ഗതാഗത സൗകര്യങ്ങൾ, ജീവിതശൈലിക്ക് അനുയോജ്യമായ മറ്റ് സൗകര്യങ്ങൾ എന്നിവ കാരണം ബെംഗളൂരുവിന് ഇപ്പോഴും വലിയ ഡിമാൻഡാണ്. അടിസ്ഥാന സൗകര്യ വെല്ലുവിളികൾ നിലനിൽക്കുമ്പോഴും, ഓഫീസുകൾക്കും ടെക് പാർക്കുകൾക്കും സോഷ്യൽ ഹബ്ബുകൾക്കും സമീപം താമസിക്കാൻ പല പ്രൊഫഷണലുകളും ഉയർന്ന വാടക നൽകാൻ തയ്യാറാണ്.

ഈ ആകർഷണങ്ങളൊക്കെ ഉണ്ടെങ്കിലും ഉയർന്ന വാടക താമസക്കാർ എല്ലാ ദിവസവും നേരിടുന്ന ബുദ്ധിമുട്ടുകളെ ന്യായീകരിക്കാൻ പോന്നതല്ലെന്ന് ലുബ്ന മൽഹോത്രയുടെ പോസ്റ്റ് വ്യക്തമാക്കുന്നു. തകർന്ന റോഡുകൾ, ട്രാഫിക് ബ്ലോക്കുകൾ, തുറന്ന അഴുക്കുചാലുകൾ എന്നിവയെല്ലാം ഉയർന്ന ജീവിതച്ചെലവിന് അനുയോജ്യമല്ലാത്ത പ്രശ്നങ്ങളാണെന്ന് അവർ ചൂണ്ടിക്കാട്ടുന്നു.

ഈ പോസ്റ്റ് സമൂഹമാധ്യമങ്ങളിൽ വലിയ ചർച്ചയ്ക്ക് വഴിവെച്ചു. ചിലർ ലുബ്ന മൽഹോത്രയുടെ അഭിപ്രായത്തെ പിന്തുണച്ചു. അമിതമായ ഡിമാൻഡ് ചൂഷണം ചെയ്യപ്പെടുകയാണെന്നും, ഈ വാടകയ്ക്ക് ന്യായീകരണമില്ലെന്നും ചിലർ വാദിച്ചു. "ഇതൊരു കൊള്ളയടിയാണ്, മറ്റൊന്നുമില്ല. ഉയർന്ന ഡിമാൻഡിന്റെ പേരിൽ അവർ മുതലെടുക്കുന്നു. ഈ വിലയ്ക്ക് ഒരു ന്യായീകരണം പോലുമില്ല. ഒരു നിയന്ത്രണം കൊണ്ടുവരണം, അല്ലെങ്കിൽ ഇത് തുടർന്നുകൊണ്ടേയിരിക്കും," ഒരു ഉപയോക്താവ് കുറിച്ചു.

മറ്റുള്ളവർ സൗകര്യങ്ങളും ചെലവും തമ്മിലുള്ള ബന്ധത്തെക്കുറിച്ച് തമാശരൂപേണ അഭിപ്രായപ്പെട്ടു. "ട്രാഫിക് കാരണം നിങ്ങൾക്ക് മറ്റെവിടെയും പോകാൻ കഴിയില്ല, അതിനാൽ കഫേകൾക്ക് അടുത്തായിരിക്കാൻ 70,000 രൂപ 'വൈബിന്' വേണ്ടി നൽകുന്നു" എന്ന് ഒരാൾ കമന്റിൽ പരിഹസിച്ചു.

കോറമംഗലയുടെ പ്രൗഢിയും കേന്ദ്രസ്ഥാനവും മൂലമാണ് ഉയർന്ന വാടകയെന്ന് ചിലർ ന്യായീകരിച്ചു. "കോറമംഗല ഒരു പോഷ് ഇടമായതുകൊണ്ടും കേന്ദ്രഭാഗമായതുകൊണ്ടുമാണ് വില കൂടുതൽ. നിങ്ങൾ 10 കിലോമീറ്റർ ഉള്ളിലേക്ക് മാറിയാൽ 65,000 രൂപയ്ക്ക് കിട്ടും," ഒരു ഉപയോക്താവ് അഭിപ്രായപ്പെട്ടു.

ഉയർന്ന വാടക കോറമംഗലയിൽ മാത്രമുള്ള പ്രശ്‌നമല്ലെന്ന് മറ്റ് ചിലർ താരതമ്യത്തിലൂടെ ചൂണ്ടിക്കാട്ടി. "ഇതൊരു ന്യായമായ വാടകയാണ്. വൈറ്റ്‌ഫീൽഡ് ഏരിയയിൽ ഒരു 2BHK ഫ്ലാറ്റിന് 75,000 രൂപ വരെ വാടക കണ്ടിട്ടുണ്ട്," ഒരു കമന്റേറ്റർ കൂട്ടിച്ചേർത്തു.

ഒന്നാം നിര നഗരങ്ങളിൽ ലഭിക്കുന്ന ഉയർന്ന ശമ്പളമുള്ള ജോലികൾക്കും ബിസിനസ്സ് അവസരങ്ങൾക്കുമാണ് ഈ പണം നൽകുന്നതെന്ന് മറ്റൊരു കമന്റ് ചൂണ്ടിക്കാട്ടി. "നിങ്ങൾ താമസിക്കുന്നതിലെ സൗകര്യത്തിനല്ല, ഒന്നാം നിര നഗരങ്ങളിൽ ലഭിക്കുന്ന ഉയർന്ന ശമ്പളമുള്ള ജോലികൾക്കും ബിസിനസ്സ് അവസരങ്ങൾക്കുമാണ് പണം നൽകുന്നത്. ഒന്നാം നിര നഗരങ്ങളിലെ താമസസൗകര്യങ്ങളുടെ ആവശ്യം കൂടുകയും വില വർധിക്കുകയും ചെയ്യും. രണ്ടാം നിര, മൂന്നാം നിര നഗരങ്ങളിൽ അടിസ്ഥാനസൗകര്യങ്ങൾ ഒരുക്കുക എന്നതാണ് ഏക പോംവഴി. ആരും അതിന് തയ്യാറല്ല!"