ബെംഗളൂരുവിലെ റോഡില് ഇനി കുഴിയുണ്ടാകില്ല; 8000 കോടി രൂപയുടെ അറ്റകുറ്റപ്പണികളുമായി സര്ക്കാര്
ബെംഗളൂരുവിലുടനീളം 2,500 കിലോമീറ്റര് ദൂരത്തില് 8,000 കോടി രൂപ ചെലവില് റോഡ് നവീകരണ പ്രവര്ത്തനങ്ങള് നടപ്പിലാക്കിവരികയാണെന്ന് കര്ണാടക മന്ത്രി കൃഷ്ണ ബൈരെ. നഗരത്തിലെ പ്രധാന റോഡുകളിലും ഉപ-പ്രധാന റോഡുകളിലുമുള്ള കുഴികള് അടിയന്തരമായി സര്വേ ചെയ്ത് അറ്റകുറ്റപ്പണികള് നടത്തണം എന്ന് കൃഷ്ണ ബൈരെ നിര്ദേശിച്ചു.
അറ്റകുറ്റപ്പണികള് പ്രവര്ത്തനങ്ങള് വേഗത്തിലാക്കാനും ഗുണനിലവാരം ഉറപ്പാക്കാനും നിര്വ്വഹണം സൂക്ഷ്മമായി നിരീക്ഷിക്കാനും ഉദ്യോഗസ്ഥരോട് അദ്ദേഹം ആവശ്യപ്പെട്ടു. കൗണ്സില് ഹാളില് ഗ്രേറ്റര് ബെംഗളൂരു അതോറിറ്റിക്ക് കീഴിലുള്ള അഞ്ച് മുനിസിപ്പല് കോര്പ്പറേഷനുകളിലെ വികസന പ്രവര്ത്തനങ്ങളും നഗരസേവന പദ്ധതികളും അവലോകനം ചെയ്യവേയായിരുന്നു അദ്ദേഹത്തിന്റെ പ്രതികരണം.
നഗരപ്രശ്നങ്ങളോട് പ്രതികരിക്കുന്നതിനപ്പുറം അവയ്ക്ക് കാരണമാകുന്ന സംവിധാനങ്ങളെ പരിഹരിക്കുന്നതിനാണ് മുന്ഗണന നല്കേണ്ടതെന്ന് ഗൗഡ പറഞ്ഞു. 'നഗരത്തില് പ്രവര്ത്തന തകരാറുകള് സാധാരണമായി മാറിയിരിക്കുന്നു. അത് നാം മാറ്റണം,' ഗ്രേറ്റര് ബെംഗളൂരു വികസന മന്ത്രി പ്രസ്താവനയില് പറഞ്ഞു. ഉദ്യോഗസ്ഥരും സര്ക്കാരും ഒറ്റ ടീമായി പ്രവര്ത്തിക്കണമെന്ന് അദ്ദേഹം വ്യക്തമാക്കി.
'വൈറ്റ്-ടോപ്പിംഗ് പദ്ധതികള് ഉള്പ്പെടെ വിവിധ പരിപാടികളിലൂടെ ഏകദേശം 2,500 കിലോമീറ്റര് റോഡ് നവീകരണ പ്രവര്ത്തനങ്ങള് 8,000 കോടി രൂപ ചെലവില് ഏറ്റെടുത്തിട്ടുണ്ട്,' ഗൗഡ പറഞ്ഞു. നടന്നുകൊണ്ടിരിക്കുന്ന പ്രവര്ത്തനങ്ങള് വേഗത്തിലാക്കാനും കര്ശനമായ ഗുണനിലവാര മാനദണ്ഡങ്ങള് പാലിക്കാനും തുടര്ച്ചയായ ഫീല്ഡ്-തല നിരീക്ഷണം നടത്താനും അദ്ദേഹം ഉദ്യോഗസ്ഥര്ക്ക് നിര്ദ്ദേശം നല്കി.
പ്രധാന റോഡുകളിലെയും ഉപ-പ്രധാന റോഡുകളിലെയും കുഴികളെക്കുറിച്ച് സമഗ്രമായ സര്വേ നടത്താനും മുന്ഗണനാടിസ്ഥാനത്തില് അവ അറ്റകുറ്റപ്പണി നടത്താനും അദ്ദേഹം നിര്ദ്ദേശിച്ചു. ജിബിഎ പരിധിയില് ഏകദേശം 840 കിലോമീറ്റര് മഴവെള്ള ഓടകള് ഉണ്ടെന്നും, അതില് 640 കിലോമീറ്ററോളം ഇതിനകം വികസിപ്പിച്ചുകഴിഞ്ഞുവെന്നും അദ്ദേഹം പറഞ്ഞു.
ബാക്കിയുള്ള 200 കിലോമീറ്റര് ഭാഗം 2,000 കോടി രൂപ ചെലവില് വികസിപ്പിക്കുമെന്ന് അദ്ദേഹം പറഞ്ഞു. മഴവെള്ള ഓവുചാല് വികസന പദ്ധതിക്ക് മുഖ്യമന്ത്രി ഡി കെ ശിവകുമാര് ഔദ്യോഗികമായി തുടക്കം കുറിക്കുമെന്ന് ഗൗഡ കൂട്ടിച്ചേര്ത്തു. പദ്ധതിയുടെ പുരോഗതി വിലയിരുത്തുന്നതിനായി പ്രതിമാസ അവലോകന യോഗം ചേരുമെന്നും മന്ത്രി അറിയിച്ചു. ജിബിഎ രൂപീകരിച്ചതുമുതല് 'സഹായ 2.0' വഴി 75,152 പരാതികള് ലഭിച്ചതില് 73,985 എണ്ണത്തിനും പരിഹാരം കണ്ടു.
പരിഹരിച്ചതായി രേഖപ്പെടുത്തിയ പരാതികളില് പ്രശ്നങ്ങള് നിലനില്ക്കുന്നുണ്ടെങ്കില് മുതിര്ന്ന ഉദ്യോഗസ്ഥര് അവ വീണ്ടും പരിശോധിക്കും. ഇതിനായി അവര്ക്ക് പ്രത്യേക ലക്ഷ്യങ്ങളും നിശ്ചയിച്ചുനല്കും. റോഡിലെ കുഴികള്, മാലിന്യം, തെരുവുവിളക്കുകള് എന്നിവയാണ് പ്രധാന പരാതിവിഷയങ്ങളെന്ന് അദ്ദേഹം പറഞ്ഞു.
Click it and Unblock the Notifications
Sign in with Google