ബെംഗളൂരുവില്‍ രണ്ടാമതൊരു വിമാനത്താവളം യാഥാര്‍ത്ഥ്യമാകുമോ? ഡികെ ശിവകുമാറിന് കേന്ദ്രത്തിന്റെ മറുപടി

ബെംഗളൂരു: ബെംഗളൂരു ജനത ഏറെ ആകാംക്ഷയോടെ കാത്തിരിക്കുന്ന രണ്ടാമത്തെ വിമാനത്താവളം യാഥാര്‍ത്ഥ്യമാക്കാന്‍ കേന്ദ്ര സര്‍ക്കാരിന്റെ പിന്തുണ. കര്‍ണാടക സംസ്ഥാനത്ത് നിന്ന് സാധ്യതാ റിപ്പോര്‍ട്ട് ലഭിച്ചുകഴിഞ്ഞാല്‍, ബെംഗളൂരുവിലെ രണ്ടാമത്തെ വിമാനത്താവളത്തിന് ആവശ്യമായ എല്ലാ അനുമതികളും കേന്ദ്രം നല്‍കുമെന്ന് കേന്ദ്ര സിവില്‍ ഏവിയേഷന്‍ മന്ത്രി കിഞ്ചരാപു റാം മോഹന്‍ നായിഡു ഉറപ്പുനല്‍കിയതായി ഉപമുഖ്യമന്ത്രി ഡികെ ശിവകുമാര്‍ അറിയിച്ചു.

കേന്ദ്ര വ്യോമയാന മന്ത്രിയുമായി നടത്തിയ കൂടിക്കാഴ്ചയ്ക്ക് ശേഷമാണ് ഉപമുഖ്യമന്ത്രി ന്യൂഡല്‍ഹിയില്‍ വച്ച് ഇക്കാര്യം വ്യക്തമാക്കിയത്. രണ്ടാമത്തെ വിമാനത്താവളത്തിന് കേന്ദ്ര സര്‍ക്കാര്‍ എല്ലാവിധ പിന്തുണയും ഉറപ്പുനല്‍കിയിട്ടുണ്ട്. സംസ്ഥാന സര്‍ക്കാര്‍ തയാറാക്കുന്ന സാങ്കേതിക പഠന റിപ്പോര്‍ട്ട് ലഭിച്ചാലുടന്‍ ആവശ്യമായ എല്ലാ അനുമതികളും കേന്ദ്രം വേഗത്തില്‍ നല്‍കുമെന്ന് കേന്ദ്രമന്ത്രി ഉറപ്പുനല്‍കി.

നിലവില്‍ മൂന്ന് സ്ഥലങ്ങളാണ് പുതിയ വിമാനത്താവളത്തിനായി വിമാനത്താവള അതോറിറ്റി ഓഫ് ഇന്ത്യ പരിശോധിച്ചത്. സാമ്പത്തിക സാധ്യതകളും യാത്രക്കാരുടെ എണ്ണവും കണക്കിലെടുത്ത് വിശദമായ പഠനം നടത്താന്‍ ഒരു കണ്‍സള്‍ട്ടന്‍സി സ്ഥാപനത്തെ തിരഞ്ഞെടുക്കാനുള്ള ടെന്‍ഡര്‍ നടപടികള്‍ അവസാന ഘട്ടത്തിലാണ്. ഇവരുടെ റിപ്പോര്‍ട്ട് ലഭിക്കുന്ന മുറയ്ക്ക് അന്തിമ സ്ഥലം സംബന്ധിച്ച് തീരുമാനിക്കുമെന്നും ഉപമുഖ്യമന്ത്രി വ്യക്തമാക്കി.

വിമാനത്താവളവുമായി ബന്ധപ്പെട്ട വിഷയം ഉന്നയിച്ചതിന് പുറമെ ബെംഗളൂരു നഗരത്തിലെ കെട്ടിടങ്ങളുടെ ഉയരപരിധി സംബന്ധിച്ച നിയന്ത്രണങ്ങളില്‍ ഇളവ് വരുത്തണമെന്നും ഡികെ ശിവകുമാര്‍ കേന്ദ്രത്തോട് ആവശ്യപ്പെട്ടു. കെമ്പെഗൗഡ അന്താരാഷ്ട്ര വിമാനത്താവളം, എച്ച്എഎല്‍ വിമാനത്താവളം, യെലഹങ്ക എയര്‍ഫോഴ്‌സ് ബേസ്, ജാക്കൂര്‍ എയര്‍ഫീല്‍ഡ് എന്നിവയ്ക്ക് ചുറ്റുമുള്ള നിയന്ത്രണങ്ങള്‍ നഗരത്തിന്റെ വികസനത്തെയും അടിസ്ഥാന സൗകര്യങ്ങളെയും കാര്യമായി ബാധിച്ചിട്ടുണ്ടെന്നും അദ്ദേഹം ചൂണ്ടിക്കാട്ടി.

എച്ച്എഎല്‍. വിമാനത്താവളത്തിന് ചുറ്റുമുള്ള 20 കിലോമീറ്റര്‍ പരിധിയിലെ നിയന്ത്രണം കാരണം നഗരത്തിലെ പ്രധാനപ്പെട്ട 'സ്‌കൈഡെക്ക്' പദ്ധതി പോലും മാറ്റി സ്ഥാപിക്കേണ്ടി വന്ന സാഹചര്യവും അദ്ദേഹം വിശദീകരിച്ചു. മുംബൈ, ഹൈദരാബാദ് തുടങ്ങിയ നഗരങ്ങളുടെ മാതൃകയില്‍ ബെംഗളൂരുവിലും ഉയര നിയന്ത്രണങ്ങളില്‍ ഇളവ് നല്‍കണമെന്നാണ് ആവശ്യം.

സംസ്ഥാനങ്ങളോട് പ്രീമിയം എഫ്എആര്‍ (ഫ്‌ളോര്‍ ഏരിയ റേഷ്യോ) നടപ്പാക്കാന്‍ ആവശ്യപ്പെടുമ്പോള്‍ തന്നെ കെട്ടിടങ്ങളുടെ ഉയരത്തിന് കര്‍ശന നിയന്ത്രണം ഏര്‍പ്പെടുത്തുന്നതിലെ വൈരുദ്ധ്യം അദ്ദേഹം ചോദ്യം ചെയ്തു. പ്രീമിയം എഫ്എആര്‍ എന്നത് ഒരു നിശ്ചിത ഭൂമിയില്‍ നിയമപരമായി അനുവദിച്ചിട്ടുള്ള കെട്ടിട വിസ്തൃതിക്കും അപ്പുറം കൂടുതല്‍ വിസ്തൃതിയില്‍ നിര്‍മ്മാണം നടത്താന്‍ സര്‍ക്കാര്‍ നല്‍കുന്ന അനുമതിയാണ്. ഇതിനായി കെട്ടിട ഉടമ സര്‍ക്കാരിലേക്ക് ഒരു നിശ്ചിത തുക അടയ്‌ക്കേണ്ടി വരും. എന്നാല്‍ കെട്ടിടങ്ങളുടെ ഉയരം വര്‍ധിപ്പിക്കുന്നതിന് കര്‍ശന നിയന്ത്രണങ്ങളുണ്ട്. ഇക്കാര്യത്തില്‍ വ്യോമയാന, പ്രതിരോധ മന്ത്രാലയങ്ങള്‍ ചേര്‍ന്ന് ഉടന്‍ തന്നെ സംയുക്ത യോഗം വിളിക്കുമെന്ന് കേന്ദ്രമന്ത്രി ഉറപ്പുനല്‍കിയിട്ടുണ്ട്.