ഒരു മാസം തട്ടീം മുട്ടീം ജീവിച്ച് പോകാൻ 71,000 രൂപ! ബാംഗ്ലൂരിലെ ജീവിത ചെലവ് പറഞ്ഞ് യുവതി

ഇന്ത്യയിലെ ഐടി ജീവനക്കാരുടെയും യുവാക്കളുടെയും ഇഷ്ട്ട നഗരമാണ് ബെംഗളൂരു. മികച്ച ജീവിത സൗകര്യങ്ങളും ഊഷ്മളമായ കാലാവസ്ഥയും ഈ നഗരത്തെ ഏറ്റവും മികച്ചതാക്കുന്നു. എന്നാൽ ഇവിടുത്തെ ജീവിതച്ചെലവ് പലപ്പോഴും സാധാരണക്കാരെ ഞെട്ടിക്കാറുണ്ട്. ഇപ്പോൾ ഇതാ ബെംഗളൂരുവിൽ താമസിക്കുന്ന ഒരു യുവ സോഫ്റ്റ്‌വെയർ എൻജിനീയർ തന്റെ ഒരു മാസത്തെ ചെലവുകളുടെ കൃത്യമായ ബജറ്റ് വിവരിക്കുന്ന വീഡിയോ സോഷ്യൽ മീഡിയയിൽ പങ്കുവെച്ചതോടെ വലിയൊരു ചർച്ചയ്ക്കാണ് വഴിതുറന്നിരിക്കുന്നത്.

പ്രമുഖ കമ്പനിയായ അറ്റ്‌ലാസ്സിയനിലെ സോഫ്റ്റ്‌വെയർ എൻജിനീയറായ അഞ്ജലി എന്ന യുവതിയാണ് ഇൻസ്റ്റാഗ്രാം വീഡിയോയിലൂടെ മെയ് മാസത്തിലെ തന്റെ ആകെ ചെലവ് ഏകദേശം 71,000 രൂപയാണെന്ന് വെളിപ്പെടുത്തിയത്. ബെംഗളൂരു പോലുള്ള ഒരു വലിയ നഗരത്തിൽ ഒറ്റയ്ക്ക് ജീവിക്കുന്ന ഒരാൾക്ക് ഈ തുക അത്ര കൂടുതലല്ല എന്നാണ് അഞ്ജലിയുടെ പക്ഷം.

അഞ്ജലിയുടെ മാസ ബജറ്റ് ഇങ്ങനെയാണ്

ഒരു കോർപ്പറേറ്റ് ജീവനക്കാരിയുടെ ബെംഗളൂരുവിലെ ജീവിതം എങ്ങനെയാണെന്ന് കാണിച്ചുകൊണ്ട് അഞ്ജലി തന്റെ പ്രധാന ചെലവുകൾ വായനക്കാർക്കായി എണ്ണിപ്പറയുന്നുണ്ട്. ബജറ്റിലെ ഏറ്റവും വലിയ തുക പോകുന്നത് താമസത്തിനാണ്. ഒരു 1BHK അപ്പാർട്ട്മെന്റിന്റെ വാടകയും മെയിന്റനൻസുമായി മാസം 28,000 രൂപയാകും. വെള്ളത്തിനും കറന്റിനുമായി 1,000 രൂപ വേറെയും വേണം.

ജോലിസ്ഥലത്ത് നിന്ന് പ്രവൃത്തിദിവസങ്ങളിൽ പ്രഭാതഭക്ഷണവും ഉച്ചഭക്ഷണവും സൌജന്യമായി ലഭിക്കുന്നത് കൊണ്ട് ഈ ഇനത്തിൽ വലിയ ലാഭമുണ്ട്. എങ്കിലും രാത്രി ഭക്ഷണം പാകം ചെയ്യുന്ന കുക്കിന് ശമ്പളമായി 3,000 രൂപയും, പലചരക്ക് സാധനങ്ങൾക്കായി 3,000 മുതൽ 4,000 രൂപ വരെയും ചെലവാകുന്നുണ്ട്. കമ്പനി വക ഓഫീസ് ക്യാബ് ഉള്ളതിനാൽ യാത്രാച്ചെലവുകൾ വളരെ കുറവാണ്. ജിം മെമ്പർഷിപ്പ്, വൈഫൈ, ആർഒ വാട്ടർ സർവീസ്, ഒടിടി സബ്‌സ്‌ക്രിപ്ഷനുകൾ എന്നിവയ്ക്കായി മാസം 3,000 രൂപ മാറ്റിവെക്കുന്നു.

ബജറ്റിലെ വലിയൊരു പങ്ക് വിനോദങ്ങൾക്കാണ്. പുറത്തുപോയി ഭക്ഷണം കഴിക്കാനും വസ്ത്രങ്ങൾ വാങ്ങാനും വാരാന്ത്യ ആഘോഷങ്ങൾക്കുമായി 12,000 മുതൽ 15,000 രൂപ വരെ ചെലവാകും. കൂടാതെ മാസത്തിലൊരിക്കൽ ബെംഗളൂരുവിന് പുറത്തേക്ക് നടത്തുന്ന ചെറിയ ട്രിപ്പുകൾക്കായി 15,000 മുതൽ 20,000 രൂപ വരെ വേറെയും ചെലവുണ്ട്. ഈ വീഡിയോ പുറത്തുവന്നതോടെ വലിയ രീതിയിലുള്ള പ്രതികരണങ്ങളാണ് ആളുകളിൽ നിന്നും ഉണ്ടാകുന്നത്. ചിലർ ഇത് ബെംഗളൂരുവിലെ യാഥാർത്ഥ്യമാണെന്ന് പറയുമ്പോൾ മറ്റ് ചിലർ ഇത് അനാവശ്യ ആഢംബരമാണെന്ന് കുറ്റപ്പെടുത്തുന്നു.

"പലരുടെയും ഒരു മാസത്തെ ശമ്പളമാണ് ഈ കുട്ടി ഒരു മാസം കൊണ്ട് ചെലവാക്കുന്നത്" എന്നായിരുന്നു ഒരാളുടെ കമന്റ്. "ബെംഗളൂരുവിൽ മാസം 10,000 രൂപയ്ക്ക് ജീവിക്കുന്ന എന്നെപ്പോലെയുള്ളവർ ഈ വീഡിയോ കാണണം" എന്ന് മറ്റൊരു വായനക്കാരൻ കുറിച്ചു. എന്നാൽ ഈ തുകയെ പൂർണ്ണമായി പിന്തുണയ്ക്കുന്നവരും ഉണ്ട്. ബെംഗളൂരുവിലെ നല്ലൊരു ലൊക്കേഷനിൽ 28,000 രൂപയ്ക്ക് 1BHK കിട്ടുന്നത് തന്നെ വലിയ കാര്യമാണെന്നും, പ്രീമിയം ബ്രാൻഡുകൾക്ക് പുറകെ പോകാതെ ഈ പണം വീടോ പ്ലോട്ടോ വാങ്ങാനോ മ്യൂച്വൽ ഫണ്ടുകളിൽ നിക്ഷേപിക്കാനോ ശ്രദ്ധിച്ചാൽ ഭാവി സുരക്ഷിതമാക്കാമെന്നും ചില മുതിർന്ന ഉപഭോക്താക്കൾ അഞ്ജലിയെ ഉപദേശിക്കുന്നുണ്ട്. എന്തായാലും ഐടി നഗരത്തിലെ ജീവിതച്ചെലവ് എത്രത്തോളമുണ്ടെന്ന് വ്യക്തമാക്കുന്നതാണ് ഈ പുതിയ ചർച്ചകൾ.