ബെംഗളൂവിൽ 5 ദിവസത്തേക്ക് കനത്ത മഴ; കാറ്റിനും ഇടിമിന്നലിനും സാധ്യത..ജാഗ്രത നിർദേശം

കർണാടകയിൽ ഇന്ന് മുതൽ മഴ കനക്കും. ദക്ഷിണ കന്നഡ, ഉടുപ്പി തീരങ്ങളിലെ ഒറ്റപ്പെട്ട പ്രദേശങ്ങളിൽ നേരിയതോ മിതമായതോ ആയ മഴ ലഭിച്ചേക്കാമെന്ന് കാലാവസ്ഥ വകുപ്പ് അറിയിച്ചു. ഉത്തര കന്നഡയിൽ താരതമ്യേന വരണ്ട കാലാവസ്ഥയായിരിക്കും. വടക്കൻ ഉൾനാടൻ കർണാടകയിലെ ബീദർ, കലബുർഗി, യാദ്ഗിർ, റായ്ച്ചൂർ, ബെലഗാവി, ധാർവാഡ്, ഗഡഗ്, ഹാവേരി എന്നിവിടങ്ങളിൽ നേരിയതോ മിതമായതോ ആയ മഴയോ ഇടിമിന്നലോ ഉണ്ടായേക്കുമെന്നും മുന്നറിയിപ്പുണ്ട്.

പ്രധാനമായും തെക്കൻ ഉൾനാടൻ കർണാടകയിലാവും കനത്ത മഴ അനുഭവപ്പെടുക. മെയ് 6 മുതൽ 9 വരെ ഹാസൻ, കൊടക്, മൈസൂരു, മാണ്ഡ്യ, ചാമരാജനഗർ, രാമനഗര, ബെംഗളൂരു (നഗരം, റൂറൽ), കോലാർ, തുമകുരു, ചിക്കമഗളൂരു, ശിവമൊഗ്ഗ, ദാവൻഗെരെ, ചിത്രദുർഗ, ബല്ലാരി, വിജയനഗര എന്നീ ജില്ലകളിൽ 30-50 കി.മീ വേഗതയുള്ള കാറ്റും ഇടിമിന്നലും നേരിയതോ മിതമായതോ ആയ മഴയും ലഭിക്കും. 7നും 9നും ഇടയിൽ മഴയുടെ തീവ്രത കൂടും; മൈസൂരു, കൊടക്, ചാമരാജനഗർ, ഹാസൻ, ചിക്കമഗളൂരു എന്നിവിടങ്ങളിൽ അതിശക്തമായ മഴയ്ക്കും, ബെംഗളൂരു ഉൾപ്പെടെ സമീപ ജില്ലകളിൽ വ്യാപകമായ ഇടിമിന്നലിനും സാധ്യതയുണ്ട്.

ബെംഗളൂരു നഗരത്തിലും റൂറൽ മേഖലകളിലും അടുത്ത അഞ്ച് ദിവസം മഴ കനക്കും. ഇന്നും നാളെയുമായി ഭാഗികമായി മേഘാവൃതമായ ആകാശവും നേരിയതോ മിതമായതോ ആയ മഴയും ഇടിമിന്നലും 40-50 കി.മീ വേഗതയുള്ള കാറ്റും പ്രതീക്ഷിക്കുന്നുണ്ട്. മെയ് 8-9 തീയതികളിൽ മഴ തുടരുമെങ്കിലും കാറ്റിന്റെ വേഗത 30-40 കി.മീ ആയി കുറയും; വൈകുന്നേരങ്ങളിലും രാത്രിയിലും പതിവായി മഴ ലഭിച്ചേക്കും. താപനില 34°C-നും 35°C-നും ഇടയിൽ (പരമാവധി), 21°C-നും 23°C-നും ഇടയിൽ (കുറഞ്ഞത്) ആയി തുടരും,.

കാലാവസ്ഥാ മുന്നറിയിപ്പനുസരിച്ച്, ഈ സ്ഥിതി താൽക്കാലിക വൈദ്യുതി തടസ്സങ്ങൾക്കും ഗതാഗതക്കുരുക്കിനും കാരണമായേക്കാം. വിളവെടുക്കാത്ത കാർഷിക ഉൽപ്പന്നങ്ങൾക്ക് നാശനഷ്ടങ്ങൾ ഉണ്ടായേക്കാമെന്നും മുന്നറിയിപ്പുണ്ട്. പ്രത്യേകിച്ച് ഇടിമിന്നലോടുകൂടിയ ശക്തമായ കാറ്റുള്ളപ്പോൾ . മരങ്ങൾക്കടിയിൽ അഭയം തേടുന്നത് ഒഴിവാക്കാനും, ഇടിമിന്നലുള്ളപ്പോൾ ഇലക്ട്രോണിക് ഉപകരണങ്ങൾ വിച്ഛേദിക്കാനും, മഴ കനക്കുന്ന സമയങ്ങളിൽ ശ്രദ്ധയോടെ യാത്ര ചെയ്യാനും വകുപ്പ് ജാഗ്രത പുറപ്പെടുവിച്ചു.

അതേസമയം കേരളത്തിൽ ഇന്നും യെല്ലോ അലർട്ട് പ്രഖ്യാപിച്ചിട്ടുണ്ട്. പത്തനംതിട്ട, ഇടുക്കി, എറണാകുളം, തൃശ്ശൂർ, കോഴിക്കോട്, വയനാട് ജില്ലകളിലാണ് ഇന്ന് അലർട്ട്. ഒറ്റപ്പെട്ട ശക്തമായ മഴയ്ക്കുള്ള സാധ്യതയാണ് പ്രവചിക്കപ്പെട്ടിരിക്കുന്നത്. 24 മണിക്കൂറിൽ 64.5 മില്ലിമീറ്റർ മുതൽ 115.5 മില്ലിമീറ്റർ വരെ മഴ ലഭിക്കുന്ന സാഹചര്യത്തെയാണ് ശക്തമായ മഴ എന്നത് കൊണ്ട് അർത്ഥമാക്കുന്നത്.

English summary

A Karnataka weather update indicates heavy rain from May 6 to 9, with thunderstorms in Bengaluru and surrounding districts. Expect gusty winds, lightning, and periods of heavy rainfall in southern interior districts, with some areas remaining dry. Residents are advised to take precautions during storms and secure outdoor items.