ബെംഗളൂരിൽ ഇന്ന് ഗതാഗത നിയന്ത്രണം: ഈ വഴി പോകരുത്, മുന്നറിയിപ്പ്

ബെംഗളൂരു: കെംപെഗൗഡ ജയന്തി വിപുലമായി ആഘോഷിക്കാൻ കർണാടക സർക്കാർ . കെംഗേരി ട്രാഫിക് പൊലീസ് സ്റ്റേഷൻ പരിധിയിലെ പുതുതായി വികസിപ്പിച്ച കെംപെഗൗഡ ലേഔട്ടിലാണ് പ്രധാന ആഘോഷ പരിപാടി നടക്കുക. മുഖ്യമന്ത്രി ഡി കെ ശിവകുമാർ പരിപാടി ഉദ്ഘാടനം ചെയ്യും. മന്ത്രിമാർ, ജനപ്രതിനിധികൾ, വിവിധ മേഖലയിലെ പ്രമുഖർ എന്നിവരടക്കം 50,000ത്തോളം പേർ ചടങ്ങിൽ പങ്കെടുക്കുമെന്നാണ് റിപ്പോർട്ട്

വൻജനത്തിരക്ക് പ്രതീക്ഷിക്കുന്ന സാഹചര്യത്തിൽ നഗരത്തിൽ ഇന്ന് പ്രത്യേക നിയന്ത്രണങ്ങൾ ബെംഗളൂരു ട്രാഫിക് പൊലീസ് പ്രഖ്യാപിച്ചിട്ടുണ്ട്. ശനിയാഴ്ച രാവിലെ 6 മുതൽ വൈകിട്ട് 4 മണിവരെയാണ് നിയന്ത്രണങ്ങൾ. മൈസൂരു റോഡ്, കൊമ്മഘട്ട മെയിൻ റോഡ്, കെംഗേരി സാറ്റലൈറ്റ് ടൗൺ, മഗഡി മെയിൻ റോഡ്, ഇവയുമായി ബന്ധിപ്പിക്കുന്ന സമീപ റോഡുകൾ എന്നിവിടങ്ങളിലാണ് നിയന്ത്രണങ്ങൾ.

ചരക്കുവാഹനങ്ങൾക്ക് പ്രവേശനമില്ല

മാരിഗോൾഡ് സ്കൂൾ ജങ്ഷൻ മുതൽ ഭീമനകുപ്പെ ജങ്ഷൻ വരെയുള്ള ഭാഗത്ത് എല്ലാ ചരക്കുവാഹനങ്ങൾക്കും നിരോധനം ഏർപ്പെടുത്തിയിട്ടുണ്ട്. ഈ ഭാഗത്തേക്ക് പോകേണ്ട വാഹനങ്ങൾ മൈസൂരു മെയിൻ റോഡ് വഴി ചള്ളഘട്ട മെട്രോ സ്റ്റേഷനിലെത്തി അവിടെ നിന്ന് നൈസ് റോഡ് വഴി പോകണമെന്ന് ട്രാഫിക് പോലീസ് അറിയിച്ചു. കൊമ്മഘട്ട ജങ്ഷൻ (കെംഗേരി ക്ലബ്) മുതൽ ഹോസബ്യരോഹള്ളി ഗ്രാമത്തിലേക്കുള്ള പെരിഫറൽ റോഡിലും ചരക്കുവാഹനങ്ങൾക്ക് പ്രവേശനമുണ്ടാകില്ല. ഹോസകേരേഹള്ളി ഭാഗത്തേക്ക് പോകുന്ന വാഹനങ്ങൾ വിശ്വേശ്വരയ്യ ലേഔട്ട് റിങ് റോഡ് വഴി ഉള്ളാലിലെത്തി, തുടർന്ന് കെ എൽ ഇ കോളേജ് കടന്ന് മഗഡി മെയിൻ റോഡ് വഴി പോകണമെന്നാണ് നിർദേശം.

രാവിലെ 6 മുതൽ വൈകിട്ട് 4 മണിവരെ നഗരത്തിലെ ചില പ്രധാന റോഡുകളിൽ ഗതാഗതക്കുരുക്ക് രൂക്ഷമാകാൻ സാധ്യതയുണ്ടെന്ന് ട്രാഫിക് പൊലീസ് മുന്നറിയിപ്പ് നൽകി. മധു ജങ്ഷൻ മുതൽ കുമ്പളഗോഡ് ജങ്ഷൻ വരെയുള്ള മൈസൂരു റോഡ്,സോംപുര ടോൾ മുതൽ മഗഡി മെയിൻ റോഡ് ജങ്ഷൻ വരെയുള്ള നൈസ് റോഡ്, ചള്ളഘട്ട മെയിൻ റോഡ്, കെംഗേരി സാറ്റലൈറ്റ് ടൗണിലെ റെയിൻബോ ബ്രിഡ്ജ് മുതൽ കൊമ്മഘട്ട ഭാഗത്തേക്കുള്ള റോഡ് എന്നിവിടങ്ങളിൽ കനത്ത ഗതാഗതക്കുരുക്കിന് സാധ്യതയുള്ളതിനാൽ ഈ വഴികളിലൂടെ പോകാൻ ഉദ്ദേശിക്കുന്നവർ കഴിയുന്നതും യാത്ര മുൻകൂട്ടി ആസൂത്രണം ചെയ്യുകയും ബദൽ മാർഗങ്ങൾ തിരഞ്ഞെടുക്കുകയും ചെയ്യണമെന്ന് ട്രാഫിക് പോലീസ് നിർദേശിച്ചു.

യാത്രക്കാർ ശ്രദ്ധിക്കേണ്ടത്

ആഘോഷ പരിപാടിയിൽ ആയിരക്കണക്കിന് ആളുകൾ പങ്കെടുക്കുന്നതിനാൽ ചടങ്ങ് നടക്കുന്ന കെംപെഗൗഡ ലേഔട്ടിനും സമീപപ്രദേശങ്ങൾക്കും ചുറ്റും തിരക്ക് വർധിക്കുമെന്നാണ് വിലയിരുത്തൽ. അതിനാൽ അനാവശ്യ യാത്രകൾ പരമാവധി ഒഴിവാക്കുകയും അത്യാവശ്യ യാത്രകൾക്ക് ബദൽ റൂട്ടുകൾ ഉപയോഗിക്കുകയും ചെയ്യുന്നതാണ് ഉചിതമെന്നും ട്രാഫിക് പൊലീസ് വ്യക്തമാക്കി. താൽക്കാലികമായി ഏർപ്പെടുത്തിയ ഗതാഗത നിയന്ത്രണങ്ങളോടും വഴിതിരിച്ചുവിടലുകളോടും പൊതുജനങ്ങൾ സഹകരിക്കണമെന്നും പൊലീസ് അഭ്യർത്ഥിച്ചു.